مع رأي الأخت مهره

كل ما تقوم به لا حياء و لا خجل إنما قلة ذوق وعدم مراعاة لمشاعر الطرف الأخر

لذلك المصارحة بعد الإختبارات ستبين لك الكثير....

وحاول تعرف هل تعاملها معك نابع من شخصيتها أم

أن أحد يؤثر عليها وتطيعه لتقوم بهذا السلوك ...!!!




والله يكتب لك الخير



عزوبي بس رجل

__________________

يا حي يا قيوم برحمتك أستغيث أصلح لي شأني كله ولا تكلني إلى نفسي طرفة عين

قبل يومن اتصلت الوالدة بالأهل وما ردوا ومباشرة دقت على زوجتي وكلمتها ودار بينهم مكالمة طويلة

وكانت للوالدة المره هذي نبرة حادة في الكلام واستفسرت منها عن سر هذه

التصرفات وهل بدر مني شي أو خطأ ، وإن كل هالتصرفات تصرفات وحده ما تبغى الزواج .

وإنها إذا كانت ما تبغى الزواج أو مترددة تقول وتتكلم محد جابرها ولكن البنت تنفي وتقول بالعكس

وقالت لها الوالدة عندك إلى يوم الإثنين ( موعد سفري لهم ) فكري وقرري وهو ( أنا ) جايكم ...

طبعاً أثناء كتابتي لهذا الرد اتصلت على الأهل وسألوني عن جيتي لهم بكرة قلت إن شاء الله

من المطار عليكم ، وطبعاً سئلت سؤال غريب كجس نبض طبعاً

وهو إني ليش ما بكلم زوجتي ؟ قلت خليها لما أجيكم إن شاء الله وراح

نتكلم ونشوف الموضوع ، قالوا الله يكتب اللي فيه الخير .



شكراً لك عزيزي .

__________________

قول لها ، صارحها ؟ أرسل لها رسالة عالجوال إذا ما كانت ترد عالمكالمات

أنا كنت أيام الملكة متعودة إذا أحد دق علي و أكون مشغولة مثلا ، أعطيه مشغول
و أرجع أدق عليه ، و زي كذا مع أهلي متعودين مع بعض

و كنت أعمل كذا مع زوجي
قالي إنه يتضايق من كذا و وقتها انتبهت و شرحت له إني ما أقصد أقفل الخط
بس أقصد إني شفت المكالمة بس مشغولة دحين و شوي و أكلمك

إنت كمان أرسل لها رسالة صريحة و لا تجامل فيها

أهلاً بحضورك الثاني أختي روح الطير

والله نظامك نفس نظامي وهو أفضل طريقة

وهو اللي عودت أهلي عليه من لما كنت في الجامعة

وكنت أقلب الدنيا لو أحد رجع دق علي مرة ثانية ، خصوصاً أوقات الصلاة والمحاضرات ....

المشكلة إنها ما ترجع تدق نهائيا ....

( مرة ما كنت عند الجوال ، مره مافي رصيد ، مره النوم مشقلب ) وأيام الخطبة كانت

الحجة جوال خربان ويعلق ، يلا هذاني جبت جوال وشوفي الأعذار اللي كل يوم شكل !

المشكلة في آخر مكالمة وهي في مشوارها مع أهلها قلت لها لما ترجعي كلميني ابغاكي ...

وكنت ناوي خلاص أبدأ أتكلم في اشياء لاحظتها ما عجبتني ، لكن ليومك ما رجعت دقت علي .

ما راح أستخدم اسلوب الرسايل وراح أنتظر إلين تدق بنفسها أو أسافر لهم الأسبوع الجاي ....

مع إني فكرت إني ما ارد عليها على طول لما تدق علي وأستخدم نفس الاسلوب عشان تحس


إني زعلان وتنقرص شوي وتعرف إنه لكل شي حد ومو كل مره راح أطنش وأفوت ...


أسعدني مرورك الثاني وأطمع في متابعتك كباقي الإخوة لعلنا نصل لشيء بإذن الله .


دمت بود .

الموضوع سهل يا اخوي ولو انا في مكانك ارسلت لها رسالة على جوالها اقول لها اذا انتي مجبوره على الزواج وماتبين تتزوجيني قولي لي ايه وانا انهي الموضوع ولا تدخل نفسك في تفكير وهم تتعب نفسك فيه يا اخي هذا الحل الانسب
وابعد عنك القروشه وترى ذا زواج ماهو لعبة

لا أحبذ أسلوب الرسائل لانه قد تفهم كلمة من كلماته خطأ

يعني الوضع غير لما يكون بالكلام الشفهي حتى لو ما كان وجهاً لوجه ....

وأقسم لك بالله خمس ممكالمات قبل الملكة صارت بينها وبن الوالده وفي

كل مره تتأكد من موافقتها وتسألها ....

وأول مره غابت بعد الملكة رجعت هي دقت على الوالدة وسألتها يابنتي موافقة وتقول لها ايوة

طيب ليش هالغياب ووينك ، أحد قالك اثقلي ولا تدلعي ؟ وحلفت بأنه مافي شي من هالكلام

وإنها بس كانت تعبانة مع إن أهلها قالوا وش فيها تعبانه ( لاهي اللي غطرفت ولا هي اللي غنت ولا شالت

وحطت ، حنا الكبار اللي انهدينا وتعبنا ) ! والله حاس إن الأهل يبوني وهي اللي قامت تتعلت وتلعب على

الحبلين قدام أهلها وأهلي شي ومعي أنا تصرفات متناقضة ! كأنها تبيها مني عشان لا يرجعولي اللي دفعته

لكن لو هذا اللي في بالهم والله ما ينولونه لو تنطبق السما على الأرض دام ها أسلوبهم .

لكن صدقني أرجع واقول الأهل هم اللي عليهم الملامة لأنه ما هيؤوا بنتهم قبل ما يزوجونها

معودينها على الروحة والجية والتماشي والبسطة وشغل البيت والسنع حاطينه انتظار لساعة الصفر !

ألف شكر لمرورك عزيزي ....

.. اولا مبــــروووك الخطبة .. والله يتمم لك على خير ..

.. طيب أطلب من امها انها تدعوها لزيارتها في بيتها ( بيت امها ) .. وتكون انت موجود هناك من غيــر ما خطيبتك تعرف ..

.. وكلمها وقل لها كل الا بخاطرك .. وعاتبها على المكالمات الا ما ترد عليها , وكلمها تفاهم معاها على التصرفات الا مو عاجبتك فيها ..

.. والا فضل انكم تجلسوا لوحدكم من غيــر أمها .. يعني تكون متفق مع امها انك ودك تتفاهم معاها لوحدكم ..

.. اعتقد هذا أنسب حل , خصوصا انه خطيبتك ما ترد عليك , وأنك يمكن تستحي تزورها في بيتها ..

.. طمنا عليك ,,

__________________

أهلاً يا أختي وشاكر في البداية لما تفضلتي به في تعقيبك

أتمنى والله يكون للأم مجال ولكن يبدو لي العكس وإنها بعيد عن بنتها بسبب أهل الأب ....

الأم ما حضرت الخطوبة الرسمية ولا الشوفة الشرعية ولا الملكة لانها كانت في بيت أهل الأب

ولما صارت الشبكة ( حفل مصغر في قاعة ) حضرت مثل الضيفة لوحدها ومشت بدون محد يحس فيها

وقت الزفة ، حتى إنه لما غابت عني بعد الملكة وقعدت أتصل عليها وما ترد حاولت اللجوء للأم ودقيت ولا

ردت وبعد كم يوم لما رجعت زوجتي ودقت علي ( من جوال أهلها طبعاً ) قلت لها وينك دقيت عليكي وعلى

فلان وفلانة ولما قلت على أمك ، سألتي بنبرة خوف أو مفاجأة كلمتها ؟ قلت لا بس كنت بسلم عليها

ولا ردت ( سويت نفسي بسأل عن الكل لأني بديت أشك في الوضع ) ! ليش هالأم ماني قادر اوصل لها ؟!

حتى العشا اللي طلعنا له أنا وهي وأخوها وأختها بعد الملكة كنت أتمنى تكون معانا واتعرف عليها

بس شكله فيه أحد اعترض على الموضوع ، وأذكر إنه الأم دقت على بنتها وقت العشا ، وكأني لاحظت

شي من التوتر على البنت وقالت لأمها ( مو وقته ) - أنا طبعاً سويت نفسي ما أدري عن شي ولا سمعت

وهذا الأمر بصراحة مقلقني ، لأن البنت هذي لو هذي طريقتها مع أمها كيف بتكون طريقتها وتعاملها مع أمي

اللي بتكون معنا في نفس البيت ( اللهم إنه كل وحده في دور مستقل ) ...

بالعربي قلت في نفسي إذا ما فيها خير في أمها كيف بيكون لها خير في أمي ؟!

أنا ممكن أتغاضى عن أي شي إلا في حق من حقوق أمي

وهذي برضو أحد النقاط اللي ناوي أتطرق لها وأتكلم فيها مع البنت ....

الأم والله مسكينة ما بينت شي لأن قلب الأم كبير ولا يمكن يصدر منها أي شي يمس ضناها مهما بدر منه

لكن ما نقول غير الله الهادي ، والله يبلغنا رضاهم والجنة يارب ....

و يوضح لي كل الحقائق قبل فوات الأوان يارب .

أنا فهمت انك حريص على المكالمات علشان توضح لها الاشكاليات أو الاشياء اللي مو عاجبتك فيها

طيب الان ارسل لها مسج قلها في حاجه أبغاك فيها ضروري أول ماتشوفين المسج دقي علي واذا دقت قل اللي بخاطرك لها طبعا بأسلوب لبق..

واذا مادقت ارسل لها رساله وقلها انتظرتك تدقين ومادقيتي على العموم أنا طلبت منك تدقين علشان كذا وكذا وكذا >>>طبعا اللي في خاطرك

وباذن الله راح تستجيب وترد عليك أو أقلها راح يتضح لك شي من وجهة نظرها وتفكيرها..

الله يوفقك ويرشدك للصواب ويكتب لك كل خير....

__________________
ربي لا أعلم بما تحمله لي الأيام لكن ثقتي بأنك معي تكفيني ~

يا هلا أختي ...

أقسم بالله الذي لا إله إلا هو إني كنت ممهد لكل شي حبّة حبّة طلما إنه الزواج مبدئياً مقرر في الحج

عشان ما تختاف أو تفهمني غلط وتقول هذا من أولها بيبدأ يتأمر ويعطي توجيهات ....

لكن بعد ما شفت هالاساليب وبديت ألاحظ أشياء غريبة ومحاولةإخفاء اشياء كثيرة واضحة إنه مخبيتها

قلت ( لأ ) ضروري يتغير الوضع وتعرفني من البداية ويكون اتفاق بيننا من الآن ....

لأنه الوضع اللي هي عليه ما يمشي معي وصعب اعيش وأستمر معها وهي بالطريقة هذي سواء معي

او مع أمها أو بوضع الإستهتار والبرود واللا مبالاة اللي هي فيها ...

لذلك أنا منتظر فترة الإختبارات تعدي خلاص بكره آخر يوم ، وراح اسافر يوم الإثنين وأقول اللي عندي

بس محتار هل قدام أهلها ولا لحالنا ، وفي نفس الوقت الموقف راح يبين كل شي وقتها ...

لأني راح أطلب كرت العائلة حق أبوها وأروح الثلاثاء أسوي كرت العائلة حقي فإن عطوني إياه ولا تحدد

الموقف والراي في كلامي ، إذا ماهي مقتنعة باللي أقوله ، راح أقول يعني وش اللي تبغينه ؟ أنا اللي

عندي قلته وأشوف ردها إن قالت لا يعني كل واحد مننا بطريق وراح يوصل كلامها لاهلها ...

أنا عندي نظام معين وبنتكم ما هي مقتنعة فيه ، يعني محنا متفقين وش رايكم ؟

إن أيدوها بقولهم أنا هذا كلامي فكروا وردولي يا نكمل يا ننفصل ، آخذ حقي وامشي

والله يوفقني ويوفقها ويسخر لنا جميعاً ، زي ما دخلنا بالمعروف نطلع بالمعروف ( وسمع الله لمن حمده ) .