|
هل أنا مخطيء في اختيارها زوجةً لي ؟
بسم الله والصلاة والسلام على رسول الله لا أدري من أين ابدأ ولا كيف ! مشكلتي أني تملكت وبعد الملكة بدأت تظهر لي بعض العادات والتصرفات التي لا ترضيني والتي لم أنشأ وأتربى عليها .... وللاسف لم أتمكن أن أوصل لها هذه الأمور لعدم تمكني من التواصل هاتفياً معها لأنها ببساطة ومثل أغلب البنات لا ترد على الإتصالات وإذا اتصلت ( بعد ثلاث أربع ايام ) لا تكون المكالمة طويلة لأنها ما تتصل من تلفونها وأحيانا تتصل وهي في الطريق لمشوار معين وشوي تقول أنا وصلت يلا مع السلامة ! ووييين إلين يصير بيننا مكالمة ثانية ونفس الموال ... أمها وابوها منفصلين وعايشة مع أهل ابوها ، اللي وكما يبدو لي إنهم مقسين البنت على أمها صحيح إنها تزورها وتواصلها لكن ما أعتقد إنه كثير وإنه فيه صلة قوية بينهم .... اتصلت مره بعد الملكة على الأم اسلم عليها ووجدت كل ترحيب وتقدير ونصائح ، وإنه لو عندي أي استفسار او ملاحظة أو رأي في شي إني أبلغها وهي توصلها لبنتها بطريقتها الخاصة ، فرحت للأمر هذا ولكن لم ابادر به لعدم رغبتي في فتح مجال وباب للتدخلات الاسرية في أي مشكلة تواجهنا كأي زوجين ... وقررت إنه أي شي يكون بيني وبين زوجتي فقط وحنا نحل مشاكلنا بنفسنا .... ولكن للاسف أنا ماني قادر أتواصل معاها بسبب عدم ردها على الإتصالات .... لدرجة إني مره سمعت إنها مرضت ودقيت عليها ولا ردت أرسلت رسالة ( سلامات طمنيني عليكي ) حتى ما كلفت خاطرها تقول الله يسلمك رغم مرور أسبوع .... غيرت وقت اتصالاتي مافيه فايدة ! دورت أكثر من عذر وحطيت عدة احتمالات حتى إن أسوأها كان إنه إما تكون بطلت في الزواج أو إنه جايتها عين عملاً بقول النبي صلى الله عليه وسلم ( التمس لاخيك سبعين عذراً ) وضح استيائي من الوضع قدام الوالدة وقدام خالتي ولكن لم أظهر أي شي .... حاولت الإتصال بوالدتها أكثر من مرة وفي أوقات مختلفة ما ترد ، هنا شعرت بأنه أهل البنت طالبين من الأم إنها ما تتدخل وإنها تبتعد عن حياة البنت ( وصدقوني شعوري أبدا ما يغلط ) وأحس إن هذه الأم مغلوب على أمرها ... لم أعد أسطيع الكتمان وانعكس هالشي على عملي فصرت كل يوم أروح متأخر لأني ما أقدر أنام في الليل من التفكير ، وما أنام إلا من شدة التعب بسبب التفكير .... لا أعرف الكذب وبدأ الإستياء يبين علي يوم بعد يوم إلى أن لوحظ الأمر علي ( وحجرتلي خالتي عندنا في البيت :d ) وعرفت السالفة وكلمت أمها بعد عدة محاولات ، وشرحت لها الموضوع ... طبعا الأم استنكرت وخجلت من تصرفات بنتها واعتذرت عنها ، وقالت بنتي صغيرة وغشيمة وما تشيل جوالها معاها دايما ( ومن هالأعذار ) حتى أنا أحياناً أدق عليها ما ترد علي وترجع تتصل إلا ثاني يوم ( زلة لسان من الأم طبعاً :25: ) - مسكينة هذي الأم واضح إنها عانت الأمرين أثناء زواجها وبعد الإنفصال ! المهم ، لنا ثلاث أسابيع متملكين ولا قدرت أكلمها غير تقريباً خمس مرات وكلها لدقائق معدودة .... آخر مكالمة قبل اسبوع وهي في طرقها لحفل مدعوة فيه ... وقلت لها لما ترجعي وتشوفي نفسك نشيطة وما فيكي نوم كلميني ( أبغاكي ) ومر أسبوع ولا اتصال ولا رسالة ولا شي ! قبل كم يوم دقت البنت على أمي وكأغلب المرات من جوال أهلها _ ( سأستخدم كلمة أهل لحاجة في نفسي عشان ما أحدد جوال مين بالضبط ) وكيف حالكم طيبين وحشتونا ، قالت أمي طيب ليش ما تردي على اللي واحشينك ؟! وتعذرت هالمرة بالإختبارات رغم إنه باقي اسبوع ! - ( طيب قبل حجة الإختبارات وينك ؟! ) المهم أمي ما طولت معها بس اللي عرفته إنه امي طلبت منها إنها تتصل علي أنا بعد عشر دقايق ، قالت لها طيب وليومكم ما دقت ! بعد مكالمتها مع الوالدة حسيت إن البنت هذي مجبورة على الإتصالات لأنها إما تدق من جوال أهلها وهذا الغالب ، و لما تدق من جوالها تدق قدامهم وهم معها وتخليني أكلم الجميع بعد طلبي ذلك طبعاً . لا أخفيكم أني بديت أبرد من ناحية البنت هذي .... واحترت أسميها لا مبالاة أو إنها ما ودها بالزواج وحست نفسها استعجلت ، ولا إنها مجبورة ، ولا إن الأهل ما هيؤوها للزواج ولا هي مطنشه وتبي تزهقني إلين ما أنا أطلب الإنفصال عشان ما يرجعلي شي من اللي دفعته ولا وش ؟! احترت وتعبت من التفكير ، حتى الموضوع ماكنت عارف كيف أكتبه لكم هنا ! أمور كثيرة حسستني بأني اخطأت في الإختيار وانها ليست الزوجة المناسبة لي علماً أن فارق السن تقريبا 11 سنة ... تصرفات لا منطقية مع عدم القدرة على ايصال حالة عدم الرضى بسبب تجاهل اتصالاتي وعدم المبادرة منها ! في انتظار آراءكم |
وعليكم السلآم
جربت تستخير ؟؟ أنصحك بالإستخآره مرتين وثلآث لحد مآتتعدل النفسية.. وهذا زوآج مآهي لعبه علشآن تقول أخطيت بإختيارها ولاأدري... لو إنت شايفها مو مناسبه كزوجه وست بيت مآفي شي يجبرك عليهآ!! كلم أهلهآ بخصوص موضوع بنتهم وخلك جدي حآول توصلهم بأن البنت تتجاهلك كليآ لا مكالمات ولا بيننا رسايل ولآ حتى تناقشنا بخصوص الزواج ووضعه .. ولآ أدري هل هي مجبوره علي ولآ إيش السبب اللي يجعلها تتجاهلني... وإن شآءالله تتفهم عليك وتأكد النقآش مفيد جدآ للي مثل وضعك البرنسيسه~N |
طيب لايكون في أحد ناصحها وقايل لها اثقلي عليه ولاتردين على اتصالاته وخليه يلاحقك
يعني تتغلى!!!!!!!!!!!! وممكن انها ماتبغى المكالمات قبل الزواج!!!!!! الا اذا كانت صغيره يكون هذا تطنيش واستهتار منها؟؟؟ كم عمرها؟؟؟؟؟ |
ربما تحب خطيبتك أن تشاهدك ملهوفا عليها ..
وتتباهى أمام زميلاتها بأنها استطاعت أن تشدك وتأسر قلبك وتجعلك كالخاتم .. الخ أقول ربما تحمل هذا الفكر .. لكن عاملها بالمثل .. وتجاهلها بالكلية .. ثم انظر كيف يكون الموقف .. وفقك الله .. |
سؤال يطرح نفسه...
البنت كم عمرها؟؟؟؟ |
الحل المبدئى فى امرك هو انك تعاملها بتطيش عشان تشوف وش قصدها
لالااسف مفاهيم البنات على الزواج تغيرت كليا ود فى الاستخارة الله يوفقك |
أنا حسيت إنها خايفة تكلمك ؟
يمكن أهلها يمنعوها تكلمك من جوالها و تخاف إنها تعمل شئ من وراهم ؟؟؟؟؟؟ الدليل إنها تكلمك يوم تكون خارجة مشوار لمكان و ما تقدر تطول بالمكالمة معاك لإنه ماتبغاهم يسألوها تكلمي مين ؟؟؟؟ |
عليكم السلام ورحمة الله وبركاته
استغفر الله واتوب اليه ليش انتم يشباب دايم مندفعين ياخي يمكن انه من عاداتهم ان البنت ما تكلم خطيبها ولا يشوفها الا ليلة الزواج وهذا عادي او ان البنت حييه وخجول وانت لا يلعب فيك الشيطان انه ما تبيك او او وتقعد تضيع مستقبلك علشان مجرد مكالمه من خطيبتك وهذي الامور عاديه تبون تزوجون وتملون من بعضكم فيه ناس عاداتهم البنت اذا تملكت حتى اهله ما يشوفونها ولا فيه شوفه شرعيه او مكلمات بعد الملكه ليله زواج ياخذ العريس عروسته ويمشي الى عش الزوجيه وناجحه زواجاتهم في هذي الطريقه ما شاء الله انت ما عليك الا اصبر وتبكير في زواجكم حياه سعيد بذن الله |
اقتباس:
|
اقتباس:
من باب حسن الظن أنا مستبعد إنه في أحد قايل لها اثقلي حتى إنه الوالدة سألتها في البداية عن هالشي وقالت لا وحلفت لها أما عن كونها ما تبغى المكالمات قبل الزواج ، فهذا غير صحيح لأنه وبمبادرة من أهلها خلوها تكلمني قبل الملكة أكثر من مره عن طريق جوال الأهل ، رغم اعتراضي في البداية لعدة أسباب ووافقت في النهاية مراعاة للاسباب التي شرحوها لي . وبعد الملكة خرجنا للعشاء مع بعض وكان معنا أخوها وأختها الصغيرة ، يعني تقريبا كسرنا شي من الحاجز ، وفي هذي الطلعة كانت أولى الملاحظات والتي لم أستطع حتى اليوم إيصالها لعدم وجود تواصل مستمر بيننا ! ما أنكر إني سميت هالإستفسار بأنها استهتار أو لا مبالاة مثل ما تفضلتي أختي ولكن ايضا كل يوم أحط عذر لها .... وبدون نتيجة ! وبخصوص العمر ذكرت إنه بيننا 11 سنة يعني مستحيل تكون أقل من 20 :cool: شكرا لمرورك . |
| الساعة الآن 04:57 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لموقع و منتدى عالم الأسرة و المجتمع 2010©