اللهم آمين ...

جزاك الله كل خير .


ممنونك .

__________________

السلام عليكم أخي الكريم
أنا متابع موضوعك من أول ما كتبته .. ومتابع جميع الردود .. وانتظرت زيارتك لبيتهم ونتائج الزيارة

تصرفك سليم بإنك ما حددت موعد الزواج "أنصحك تعيد التفكير مرة ثانية" .. أنا مملك .. ومستحيل تكون البنت هذي وافقت عليك عن قناعة .. البنت هذي مترددة + إنها بنت ترغب برجل "تتحكم هي فيه" .. وهذا مناقض تماماً لشخصيتك ..

فكر مرة أخرى واستخير .. مهما كان الخوف الموجود والحذر وعدم الشعور بالأمان .. فهو غير مبرر إطلاقاً للي حصل وإنت مسافر .. بل وللي حصل وإنت عندهم في البيت .. أنا بعد ما عقدت قراني على زوجتي .. من أول ما طلعت من بيتهم أرسلت لي رسالة .. ومن ثاني يوم الصباح كنا نكلم بعض على الجوال .. وخلال أسبوع كنت فاهمها وكانت فاهماني .. لكن اللي حصل معك لا يتقبله عقل .. فكر مرة ثانية .. وأسأل الله إنه يرزقك بنت الحلال اللي تملى عينك وتريح قلبك ..

بالتوفيق

انا مع الاخ ابو قتيبه

والله يسهل امرك وكثر من الاستخاااااااره ..

__________________
اول مايسال العبد في قبره عن صلاته ..فهل اعددنا جوابا لهذا السؤال؟

للأسف أنه أنا اللي إنقال عني شخص غامض ...

كان هذا في جلسة مصارحة ولحظة هدوء قبل ما أطلع من عندها

( صحيح كلن يناظر الناس بعين طبعه ) !

طبعاً صححت لها فكرتها ، وقلت لها أنا شخص هادي ولدت وكبرت وعشت لوحدي

ولا كان عندي حتى أخوان أحتك وأتفاعل معهم ، وهذا اللي انعكس على شخصيتي

وخلاني شخص هادي وكلامي قليل ، وليس غموض مثل ما تقولي بل إنه البعض فسر هذا

الهدوء واعتبره غرور فيني .



بصراحة معدني مرتاح ومتحمس للزواج منها ، وفعلاً أحس إني اخطأت الإختيار ، ولكن

أبيها منهم لأني وربي لو طلقت بدون ما أسترجع شي من اللي حطيته لها معناه

إني بقعد عزوبي إلين أقدر اكون نفسي من جديد وانا سني مو صغير ،

مجموع اللي دفعته 83000 ريال ! ولسه باقي ورانا شراء بيت ، بالله هذي بسيطه ؟!

الله يعجل لنا بالخراج منهم على خير يارب .

الوالدة صارت نفسيتها زفت بسبب وضعي ، وأنا صاير في حالة توتر وسرحان كثير

وابسط شي في هالموضوع ينرفزني ويعصبني ، ومالي متنفس إلا هنا معكم

علماً أني من يوم رجعت للرياض ما دقيت عليها ولا دقت علي

ما غير مكالمة الأهل لي يوم ما وصلت من السفر !



شكراً لك أختي الكريمة وآسف على الإطالة .

__________________

السلام عليكم
انا الصراحه متابعه مشكلتك من البدايه وكنت انتظرك ترجع وتبشرنا خير
اقول مشاء الله عليك يعني احس بالك طويل
الي اكتشفته من كلام ان البنت متردده او في بالها احد ثاني حتى ماتحس انها واضحه مره
يعني تصرفاتها بحركه مسك جوالها وترسل وهي قدام زوجها وخاصه انه لسى مابعد جاء موعد الزواج ومانت عليه يعني عيب الصراحه وتتركك تنطق ولا تجي حضرتها لك يعني يكفي انت متعني عشانها واهي تسوي كذا
وانك تقول الي تبيه من حقك انا اشوف زوجي طلب مني اشياء كثيره وانا يعني كنت مقتنعه بهذا الشي
يعني وضحلي عبايه الراس وانا اساسا البسها وطلب مني البس تنانير طويله مع اني البس اقصر بس يوم فكرت قلت للاخره ازين انا وش ابي من الدنيا بالعكس خلك واضح من البدايه عشان تعرفك
استخير مره ثانيه والله يكتب لك الخيره ويعطيك على قد نيتك

الحين انت ماتقدر تسترد خسايرك اذا انت طلبت الانفصال ..؟

__________________
اول مايسال العبد في قبره عن صلاته ..فهل اعددنا جوابا لهذا السؤال؟

أخي الكريم .. طالما أن الانفصال تم قبل الدخول بالزوجة .. فلك أن تسترد نصف المهر .. ولو أتيتهم بالحسنى والتفاهم وو .. فقد يعيد لك أهل الزوجة حقك كاملاً تقديراً منهم لدينك وأخلاقك وطبيعة زوجتك

وفقك الله لكل خير

^
^
^

صح كلا ابو قتيبه لك النص اذا كان في وقت الملكه..

__________________
ربي لا أعلم بما تحمله لي الأيام لكن ثقتي بأنك معي تكفيني ~

أهلين أختي

لحد الآن ومن يوم ما رجعت من عندهم

لا اتصلت عليهم ولا اتصلوا علي ....

طبعاً حصل موقف ما كان بالحسبان أبداً ، وحسيت إني في موقف لا أحسد عليه ...

قبل يومين جاني اتصال من رقم غريب وما لحقت أرد عليه ، تركته نص ساعه ورجعت دقيت عليه

كان معه انتظار ( مكالمة أخرى ) قفلت ، ورجع بعدها دق علي ...

وسؤال طويل الأمور والأحوال والأخبار ... إلخ ، وأنا لم أعرفه ، توقعت في البداية إنه أحد عمانها

( المطوع الوحيد في العائلة ) وياليته كان هو ، طبعاً طول معي في الكلام يبغاني أتعرف عليه ولا عرفته

قالي شوف أنا لازلت محتفظ برقمك ( يا ولدي ) أنا زادت حيرتي وقلت من هذا اللي يقولي ( يا ولدي )

في الأخير عرف بنفسه ، وطلع أبو وحده تقدمت لها قبل زوجتي أنا قلت بيني وبين نفسي

الله يستر من وين طلعلي هالرجال الطيب طبعاً انا صرفت نظر عن بنته لأنه كان يبغاها تطلع بعثة

وأنا ما أقدر أترك وظيفتي ووالدتي لوحدها هنا ، غير إنه كانت أمورهم غير واضحة ، هو كان يقول إنها بتروح

والأخبار اللي بتوصلني إنها ما راح تروح ، ويوم طلعت الأسماء وما كان اسمها ضمن المبتعثين

رجعنا وكلمناهم ، وطلبوا مهلة إضافية يمكن تجيها بعثة ( يعني كانوا حاطينني بديل ) وهذا اللي

ضايقني وصرفت النظر عنها ...

المهم يوم كلمني الرجال سألني وش صار علي قلت والله تملكت ، قال ولا تعزمنا ؟

قلت والله الأمور جات بسرعة وشكلها ما راح تستمر ، وشرحت له الأمور كلها ، لما سمعت عنه

أيام خطبتي لبنته من كلام طيب ، طبعاً هو قالي انت لازلت في بالي ، وإنه كان عندي لك عروس ( سبق

كلمني عنها يوم جلس معي جلسة التعارف الأولى ) متخرجة طب بشري وأبوها متوفي وحطني قبل

وفاته الوكيل الشرعي لهم ، وإن هالبنت ظروفها مناسبة لي ولا عندها سفر وبعثة وهالكلام ...

كانت في جده مع أخوها وتخرجت وتعينت في الرياض ( وأعتقد أهلها هنا في الرياض واخوها

بس اللي في جده ) ...

طبعاً الرجل نصحني بعدم الإستعجال وبحث الأمور مع زوجتي وإنها يمكن تكون مصابه بعين

واستشهد لي ببنت أخوه إنها خمس مرات تصاب بعين في خطوبتها والآن

متزوجة نفس الرجل وعندها منه اثنين ...

وإنه مستعد للوقوف معي وتقديم النصح والمشورة في هذا الأمر ووصاني بأن لا أتردد في اللجوء إليه

عندما أحتاجه ، وقال شوف لإيش توصل وطمني والله يكتبلك الخير وين ما يكون ....

سبحان الله ، والله إني استشعرت محبة الرجل لي وشراءه لي

برغم إنه ظروف بنته ما تناسبني إلا أن الرجل ما نسيني ، ويبي يدلني ويساعدني عشان أكمل نصف ديني

ممكن الأغلبية يتوقعون إنه جس نبض عشان يزوجني بنته بس أنا أستبعد هالشي ، لأنه مو معقول

الرجل يكذب في أمر مثل الزواج ...

أنا لا أنكر أن اختياراتي لزوجتي صعبه ومتعبة ولكنها ظروفي التي تحتم علي

الموقف ، وسبق أن عرض علي غيره ، أخوات لهم ، ( وقالوا لي لو ما إننا نشوفك رجال وولد

ناس ما عرضنا عليك ) ولكني رفضت الفكرة مره بسبب اختلاف المنطقة والعادات ومره لأن

المواصفات غير مطابقة رغم أننا من نفس المنطقة ....

عموماً أنا كل تفكيري مركز على الورطة اللي أنا فيها مع زوجتي الحالية ، لا إننا اللي اتفقنا ولا حنا اللي

قررنا الإنفصال ، لأني حتى لو جيت بتقدم لغيرها ما راح أقدر لأني حطيت مبالغ كبيرة ، أحتاج

على الأقل لسنتين أو ثلاث حتى أجمع مثلها من جديد .



شكراً لمرورك الثاني والنابع من اهتمامك ...

__________________

آه يازمن وش ذا الافلام


ماشاءالله أحداث وأكشن!!!



أجل الحين أنت مخطوب

طيب أنت متابع الردود معنا لان أحس فيه حوسه بردودك مع احترامي لان أنا والعضو أبو قتيبه قلنا انك تقدر تسترد نص المهر ولا عقبت على ردنا

مادري ليش؟؟؟؟؟؟؟؟؟؟

خلاص بامكانك تسترد نص مهرك وتدور لك بنت حلال ثانيه......طيب ممكن سؤال ؟؟؟؟؟؟؟؟؟عادي أنت خبرت الرجل هذا أبو خطيبتك السابقه باللي حصلك؟؟؟!!!!

مو لو انك متحفط الى ان تحسم الموضوع أحسن ؟؟؟أنا هذا رأيي .

وموفق مره آخرى


آه يازمن أتمنى ترد على تساؤلاتي

__________________
ربي لا أعلم بما تحمله لي الأيام لكن ثقتي بأنك معي تكفيني ~