لوهلة اعتقدت المهور لديكم 100 الف وطالع اخي ستيودنت من الاخر
اذا كان مهر الفتاة هو العائق امام زواج الشباب ، وهو كما ذكرت في الموضوع الاخر 50 الف
تزوج امرأة سبق لها الزواج ب 20 الف
وسنها صغير وماعندها اولاد ومن دور بقا .. هذا اذا كان فعلا مشكله الخمسين الف عظيمة عندك

اولاً
اختي لو ترجعين لردي انا ماتكلمت عن المهور فقط. انا تكلمت عن تآخر الزواج بشكل عام.
يعني الواحد مايدري هو يجمع للمهر او لتكاليف ليلة الزواج او تكاليف شهر العسل او تكاليف تجهيز الشقه والسياره الخ.
واذا على التدوير انا قلت لك بردي عن الدوله اللي مهورهم ٧ الاف ريال وذكرت لك ليش انا مارحت لهم. واذا على بكر او ثيب.. بردودك مقومه السالفه ليش الرجل المطلق مايتزوج مطلقه مثله.. يعني انتي ترضينها على المرأه المطلقه تتزوج الرجل اللي غير مطلق لكن العكس لا؟

هذا اذا كان فعلا مشكله الخمسين الف عظيمة عندك
خليني احسب لك التكاليف اللي ذكرتها بردي علشان "فعلاً" تعرفين كم يكلف الزواج وتعرفين "فعلاً" ليش الزواج مكلف بحكم اني ذكرت لك بردي وليش هذا الشيء يسبب مشكله في "العنوسه"
-الاكسنت واللي تعتبر من ارخص السيارات قيمتها ٣٨ الف ريال
- ٦٠ الف ريال مثل ماذكرتي في ردك انه مبلغ لازم الرجل يقدره
- لتكاليف الشقه وخلينا نقول ٤٥ الف
- اجار الشقه خلينا نقول ١٥الف ريال
-شهر العسل وخلينا نقول وديتها لدبي وبيكلف ١٠ الاف وليلة الزواج سويت شي متوسط ٥٠ الف ريال شامل كل شي.
٣٨+٦٠+٤٥+١٥+١٠+٥٠=٢١٨ الف ريال
ارجو اختي انك ماتفهميني غلط لكن من ردودك افهم انك حاطه في بالك ان الرجل غلطان مهما كان، سواء اللي يسويه صح او غلط فهو غلطان.
بردي ذكرت لك تكاليف الزواج كامله واشوف انك رديتي علي بالمهر لحاله وكأن المهر لحاله هو سبب تأخير الزواج.
فلا تاخذين من رد كامل جزء بسيط لمصلحة تفكيرك ودعم لنقطة نقاشك وتتركين الباقي.

المشكله اذا ذكرتوا تكاليف الزواج اول شي المهر وكأن المهر اغلى شي في الزواج وهو اقله البنت مااتاخذ الا المهر باقي الاشياء لك قبل البيت والسفر وغيرها

هل المهر خارج من تكاليف الزواج؟ متى حابه نذكر لك المهر؟ اخر شي؟
طيب والواحد اذا جاء يعقد وهو اول شي في بداية الزواج كيف يخلي المهر اخر شي؟

البنت مااتاخذ الا المهر باقي الاشياء لك قبل البيت والسفر وغيرها
مافهمت بالضبط كلامك،، من اللي بيسكن معي بالبيت؟ من اللي بيسافر معي؟ من اللي بتنقص فرحتها اذا ماسويت لها زواج؟

معك مو لها لحالها طبعا انت تزوج تسعد نفسك اولا
وانت ذكرت تكلفة السيارة بالزوجه او بدونها راح تشتري سيارة
الي اشوفة واسمعه الشباب يدفعون مبالغ اكبر عمرك سمعت احد ندم على تكاليف زواجه
او مهر زوجته الا اذا كان مااتوفق الفلوس تروح وتجي لكن الاساس التوفيق
وفي الزواج اذا الرجل خسر فلوسة المرأة خسارتها اكبر
لكن اذا وفق الله مافيه اي خساره للطرفين

طيب البنت اذا تزوجت ماتسعد نفسها؟ اذا ماتسعد نفسها ليش تتزوج؟ تقدر ترفض وكل القوانين معها. مافيه احد يقدر يجبرها واذا هي وافقت فهذا من نفسها
وتكلفة السياره من دون زوجة ابشتري سياره افضل واوسع واللي تعجبني لكن مع زوجه ابشتري سياره ارخص واقل مستوى كثير.

ايه صحيح يدفعون مبالغ اكبر لكن بعد ايش؟ بعد مايتدين وياخذ له قروض وانتي ذكرتي باحد ردودك ٢٢٠ اعلى تكلفة وهذا خطأ لانه يعتبر من اقل التكاليف. وواحد من ربعي تعرفت عليه متزوج من سنتين تقريباً راتبه فوق العشر الاف للحين يدفع ديونه وقروضه.

عمرك سمعت احد ندم على تكاليف زواجه
او مهر زوجته
الحين احنا بنفتح موضوع ثاني واللي هو الندم على تكاليف الزواج.
اختي اساس الموضوع تأخير الشباب في الزواج. مو الندم
يا اختي لا تفهمين الموضوع غلط لا بدين ولا بعرف ولا بتقاليد بنات الاسلام اموال الدنيا ماتكفيهم ولا حتى مواطي رجليهم لان هم امهاتنا واخواتنا وزوجتنا وبناتنا لكن حنا نتكلم عن اسباب تأخر الزواج وتآثيره على المجتمع. حنا نتكلم عن الشخص اللي مايملك اموال قارون ولا عماير الوليد ولا شركات ابل.

اشتر السيارة واجلس بدون زوجة محد غاصبك !!
اكيد سنة الحياة لازم تمشي
انا اقول لك مو المشكله في البنات ولا المهور الحياة صارت مكلفه مو مثل اول كل شي غالي وهذا شي البنت واهلها مالهم دخل حتى لو البنت تطلب مهرها 20الف ماراح يقلل من المبلغ الي انت تحسبه هذا قصدي وبعدين حق على الله يعينه ناكح يريد العفاف الي يبغى يتزوج ربي ييسر له
وقريت لك رد في موضوع الشباب يأجلون زواجهم وعندهم القدره للزواج

المهر احنا عندنا من أهل نجد وقبايل متحضرة بعد مبدأنا (يدك وماتجود).
اتفهم بعض القبائل المتعارف عندهم ان المهور عاليه لكن في المقابل مهور بناتهم عاليه يعني ( دهننا في مكبتنا)
ومثلا لو وقعت في موقف انك ماتبي بنت الا من النوع الفلاني اذا تحمل ،تحمل مهرها..او تزوج من نفس الطبايع اللي تبي ارمله وإلا مطلقة .. هذا اذا كان المهر فعلا مؤثر قوي في تأخر الشباب..
اما بالنسبة للوظيفة مايخالف ندري انك في بداية حياتك تواجه صعوبات مو لازم تتزوج وعمرك 23 ، اما من ناحية زواج المطلق بمطلقة انا اللي اشوف حولي المطلق غالبا يطرق أبواب اللاتي لم يسبق لهن الزواج، لي زميله متزوجة بمطلق،وايضاً خالة بنات خالي متزوجة بمطلق وايضاً خالهم مطلق تزوج وحده لم يسبق لها وكلهم بالوقت الحالي .
لكن كلامك والله جيد يعطي المطلقات أمل ان حظهم ما طاح بمجرد الطلاق .
اما الزواج عائلي او لاء ، عندنا القبايل المتحضرة بنجد ، الزواج امر يتفق عليه واهم شيء اعلان الزواج في حفل
تزوجت عمتي وأتذكر حفل زواجها في بيت جدي ونادو من يعز عليهم
وايضاً بنت خالي وابن خالتي تزوجو قريبا وكلاهم زواج عائلي للنساء ومعلن للرجال
انا تزوجت وحفل زواج النساء تكفل به ابي والرجال طليقي
ولاتضع أمامك قيود تستطيع ان تقول لأهل الزوجة حفل الزواج سأقوم بحفل رجال فقط وان طلبو نساء هم يتكفلون به
وان رفضو فهذي غنيمة لك لأنهم بيتعبونك ناس مثل كذا ترفض زواج وتكنسله وبدا فيه التوافق بين الرجل والمرأه عشان شكليات مالهم داعي احمد ربك

وأما سؤالك انا كرجل مسؤول عن تجهيز الشقة وزوجتي
أقول لك نعم انت مسؤول شرعا .

اما عن عمرك ودراستك اعتقد انك متخرج من الماجستير لان واخد بعمرك يفترض يكون متوظف اقل شي من سنتين ادا كان دارس زين ، واعتقد ان مرتبك لايقل عن 8000 هذا اذا مازاد
انا اعرف لك رجال فتحو بيوتهم براتب 5000 ووضعك أفضل منهم ماشاء الله
نقول تزوجت وعمرك 28 وش بيصير !
ايضا دور لك مساهمات تشتغل فيها ماجينا لها الدنيا وكلش مدنى لنا..
اما عن سيارتك وين سيارتك يوم كنت بالسعودية يعني بعتها خلاص وين فلوسها لو كنت بعتها وش تستخدم لو جيت هنا؟ وعادي اشتر فكتوريا اعرف انها تكد
وارتاح في وظايف ان شاء الله بس اهم شيء معدلك كويس عشان نقاطك تكون عاليه بجداره .
الان نجي نقسم راتبك لو كان 8000
الان عمرك 25 لو افترضنا صار عمرك 28 وبدأت البحث عن العاروسة في منتصف 27 بتكون جمعت في خلال ثلاث سنوات مبلغ 216 الف
60 الف مهر
10 آلاف تجهيزات العريس مادري اذا مناسبه او لاء
25 الف شقه
15 غرفة نوم
7 الاف مطبخ
5الاف صاله
3 الاف ثلاجة ببرادها وغساله
6 آلاف ثلاث مكيفات سبيلت يعطون معاها هديه براده خخخ
5 آلاف تحف بسيطه وسفره اكل (179 في ايكيا 6 حبات من كل قطعة ) واشياء مطبخ مثل ملاعق كم بياله ومفرش ( حلوه حقات ايكيا،او سنتر بوينت او الاسواق الشعبيه نظامها ناعم ما تتجاوز ال 500)
20 الف حفل زواج رجالي والزوجة اذا بغت اَهلها يسون لها
15 الف سفره مملوحه
يصفالك 45 الف نقول شريت بها سيارة
هذا اذا افترضنا ان حسابك الحالي 0 ، وأنك لم تدخر أبدا اي مبلغ ولم تطرق باب اخر لتوفير دخل اضافي، واعتمدت فقط على الدراسة

بالنسبه زواجي لمطلقة وانا عزوبي وغير مطلق يعكس نظريتك بان المطلق مايتزوج الا مطلقه سواء هذا اللي تشوفينه عن الناس اللي حواليك او لا، لان الموضوع هدفه النقاش وتغيير الفكر وانتي تبين تغيرين الفكر ان المطلق مايتزوج الا مطلق نفس ما انا حاب اغير تغيير فكر المصاريف الزايده للزواجات.
انا جيت اناقش ليش البنت المناسبه اللي ماسبق لها الزواج هذي تكاليف الزواج منها اذا انا شاب ماسبق لي الزواج. فانا اعرف ان فيه مطلقات واعرف ان فيه ارامل. لكن ليش اتحمل واجبر نفسي على تكاليف الزواج الباهظه او اشوف لي مطلقة او ارمله.

اما تجهيز الشقه والزوجه شرعاً انا اعرف عن هذا الشي بس ليش التشرط والتكاليف؟ ليش ماترضى البنت انها تبدا حياة بسيطة ويبدا التكوين؟

اما عن عمرك ودراستك اعتقد انك متخرج من الماجستير لان واخد بعمرك يفترض يكون متوظف اقل شي من سنتين ادا كان دارس زين ، واعتقد ان مرتبك لايقل عن 8000 هذا اذا مازاد
اتمنى لو اني تخرجت بكالوريوس لكن تآخرت بالدراسه لظروف خاصه منها وفاة الوالد الله يرحمه واهتمامي بأمي لانها كبيره بالسن.
وغيري اللي تأخروا بالدراسه لظروف اقسى من ظروفي وش يسوون؟

انا اعرف لك رجال فتحو بيوتهم براتب 5000 ووضعك أفضل منهم ماشاء الله
انا اعرف وانتي تعرفين لكن هذولا يعتبرون من النوادر والاهالي مايرضون غالباً يزوجون بنتهم لرجل راتبه مثل كذا

اما اعتمادي على دخل اضافي ومساهمات فالتجاره ربح وخساره مو كل من دخل التجاره بيربح ومو كل شخص فاهم فيها ومو كل شخص تناسبه التجاره. فيه ناس الله موفقهم بالتجاره وفيه ناس الله موفقهم بالدراسه. وانا شخص مالي بالتجاره اعرف ادرس واجتهد وان شاء الله بحصل الوظيفه المناسبه لي ولطموحي.


ولاتضع أمامك قيود تستطيع ان تقول لأهل الزوجة حفل الزواج سأقوم بحفل رجال فقط وان طلبو نساء هم يتكفلون به
وان رفضو فهذي غنيمة لك لأنهم بيتعبونك ناس مثل كذا ترفض زواج وتكنسله وبدا فيه التوافق بين الرجل والمرأه عشان شكليات مالهم داعي احمد ربك


انا حامد ربي وشاكره على النعمه اللي انا فيها انام وانا مرتاح وبأمان واكل وشارب وغيري الله يعينهم متبهذلين. وسبب ذكري لهذا الشيء انه صار شي سائد. اهل البنت صاروا مايشوفون هل الرجل كفو او لا على كثر مايشوفون كم بيدفع والماديات صارت اهم من غيرها.
اعطيك لك مثال واقعي واعطيني حل ولا تقولين تحمل واصبر لان هذا الشيء اللي انا مسويه وابظل عليه لين مالله يفتحها..
حالياً انا مبتعث وعمري ٢٥ واذا تزوجت بيعطوني راتب لي ولزوجتي ممتاز. لكن اغلب الاهالي مايزوجون المبتعث لان ماعنده وظيفه مضمونه بعد التخرج. طيب الولد اذا تخرج يتوظف بمطعم ولا أي مكان براتب ٥٠٠٠ ريال او حواليها لين مايحصل الوظيفه المناسبه. لكن لا مايرضون براتب مثل كذا لازم يكون راتب حلو ووظيفه كويسه.
انا اعرف واجزم ان كثير بنات يبحثون عن شخص يشاركهم حياتهم بالحلوه والمره فقط لكن الاهالي يبحثون عن الرفاهيه لبناتهم ونظرتهم ماديه اكثر من غيرها. وهالنظره بتنتقل لبناتهم لا اراديا وتصير نظرة البنت للغير نظره ماديه، وانا متأكد انك شفتي بنات حواليك يماشون بعضهم لامور ماديه فقط مثل مانا صرت اشوف هذا الشي بالعيال. صار الواحد اذا كان عنده السياره الفلانيه او شاري الغرض الفلاني عنده اصدقاء اكثر من الشخص اللي محافظ على معايير الصداقه ويقدرها.