المشاركة الأصلية كتبت بواسطة mlsstudent

ابتكلم عن مجتمعي واللي اشوفه من الناس اللي حوالي وعن نفسي شخصياً ،يمكن طريقة التعامل او التفكير او او او تختلف عن مجتمعك
ماراح اتكلم عن عمر الزواج وارتفاع العنوسه لكن ابتكلم عن تآخير الزواج بشكل عام..

، بالنسبة للرجل لا احد يلزمك ان تتزوج من عائلة متطلبة ،اذهب للمناسب لك ..

اما بالنسبة لعمر الزواج ، وارتفاع العنوسة، فليس سببه التكاليف الناهضة من الزوجة واهلها
ف بالنسبة للمهر ، بإمكانك ان تقدم ثلاثين الف ! ،

المهر على كيفي؟ اللي يحددون المهر اهل البنت،، بتقولين لا احد يلزمك ان تتزوج من عائله متطلبه؟ طيب انا ابحث عن بنت اطباعها من اطباعي وكل بنت تنساب اطبعاها اطباعي تكون من عائله متطلبه، وش اسوي؟ واذا كنت اببحث فقط عن عائله ماتتطلب فيه احد العضوات ذكرت ان المهر في دولتها وبالتحديد مدينتها تقريباً ٧ الاف ريال وهذا شي كل الناس تعرفه. فليش ماروح لهم؟ لان كل شخص مايرتاح الا مع الناس اللي من طبعه. اطلعي برا المملكه شوفي الطلاب المبتعثين ومن اصدقائهم كلهم او اغلبهم من دول الخليج واذا رحتى لمكان فيه طلاب مبتعثين كثيرين بتشوفين ان كل منطقه تقريباً عندهم تجمعاتهم لحالهم وهذا شفته بنفسي اهل الوسطى لحال واهل الشرقيه لحال واهل الغربيه لحال واهل الجنوب لحال.

كما ان المشهور ان اغلب الرجال الشباب اذا طلقة توجهو لبكر ودفعو مهر يمكن اكثر من الاول وهم مايشوفون الجادة ، وهذا خير دليل انه معهم موب ماعندها شيء
بداية حياة الشخص الوظيفيه مو مثل مايكون له ترقيات وعلاوات وزياده بالراتب. لو اتوظف معيد بعد خمس او ست سنوات راتبي بيزيد بشكل كبير.. بدال مايكون ٨ بيصير ١٢ تقريباً وبيكون عندي شقه جاهزه بس اجددها
وماقد شفت احد من مجتمي يتزوج بكر بعد طلاقه الا واحد

اما حفل الزواج ، يستطيع الخاطب ان يقول أنا من ناحيتي سأقوم حفل رجالي فقط وبسيط ايضا ، وان ارادت الزوجة في هذه الحالة فسيتكفلون بحفل النساء اَهلها .
ياسبحان الله قبل فتره كلمني اخوي عن قريبه لنا وان الزواج كان بينلغي لان الرجل كان بيخليه عائلي او رجال او يكون النص بالنص. فهذا شي صعب الرجل يحدده اذا كان بيتزوج من مجتمع عنده عادات معينه مع العلم ان الرجل من نفس منطقتنا وابوه صديق لابو البنت.

ما الاثاث ليست الزوجة ولا وليها تجار الاثاث ولا تجار العقار ، وهذه مشكلة تواجهها الزوجة ايضا في تجهيز نفسها للعريس الذي دفع دم قلبه ...
جميل يعني انا كرجل مسؤول اجهز الشقه وعن تكاليف تجهيز العروس بالعامي عن كل شي؟

و في الحقيقة أنتم الرجال غير مهتمين إطلاقا بمشكلة العنوسة الا اذا برزت لكم فيه مصلحة ، والمصلحة الان تخفيض المهور ع أساس انها هي العائق عن الزواج مع أني ارى انها اقل من معقول، وايضاً التعدد هذه مصلحة ثانية،
اولاً، النساء امهاتنا واخواتنا وبناتنا فليش مانهتم لهم؟ بالنسبه لاعمامي وبعض من خوالي يمشون على حديث النبي صلى الله عليه وسلم "أَعظم النساء بركة أَيسرهن مؤنة"
لكن اشوف كثير يغالون بالمهر وتكاليف الزواج وتصعيبه وشخصياً مافيه احد من عمري او اصغر مني منهم ولا كان خطبت منهم.
بالنسبه للتعدد المجتمع اللي انا فيه مافيه منهم معددين الا اثنين لان التعدد منبوذ عندنا الا بالحالات القصوى

ردي عليك مو للعنوسه لكن لتآخير الزواج
خليني اكلمك عن نفسي وانتي احكمي بعقلانيه لاني اشوف من ردودك انك تدافعين عن المرأه بزياده
عمري الحين ٢٥ سنه وابتخرج بعد سنه ونص ان شاء الله
اذا رجعت لديرتي الوظيفه مو مضمونه وكثير من زملائي الخريجين شفتهم قاعدين فتره على ماحصلوا الوظيفه.
- خلينا نقول رجعت وحصلت وظيفه على طول.(مع العلم ان معادلة الشهاده وانهاء اجرائات التخرج بياخذ مني اقل شي شهر ونص )وراتبها متوسط مثلاً معلم سمعت انه ٨٠٠٠ ريال وماني متأكد لكن متآكد انه بهالحدود.
-على الاقل اول ثلاث اشهر ماراح اقدر اجمع ولا ريال. لان ابي اهدي امي واخواتي واخواني والناس اللي وقفوا معي لين تخرجت.
- مصاريفي الشخصيه خلينا نقول ٢٠٠٠ ريال فاتورة جوال على اكل على بنزين على روحات وجيات والتزامات وملابس، علشان اضغط على نفسي واجمع مبلغ اشتري لي سياره وحالياً الاكسنت واللي تعتبر من ارخص السيارات قيمتها ٣٨ الف ريال يعني لازم اصبر تقريبا ست اشهر
-الحين ابجمع مبلغ ٦٠ الف ريال مثل ماذكرتي في ردك انه مبلغ لازم الرجل يقدره وانه مناسب وهذا بياخذ مني عشرة اشهر
-بعدها ابجمع مبلغ لتكاليف الشقه وخلينا نقول ٤٥ الف ريال مع اني اشتريت لاهلي براد وفريزر وغساله ب٢١ الف ريال قبل فتره سنه ونص يعني هالمبلغ راح نصه على اشياء بسيطه باقي غرفة النوم ، الصاله ، المجلس ، اغراض المطبخ ، والكماليات.
مع اجار الشقه خلينا نقول ١٥الف ريال يعني لازم اجمع عشر اشهر
-شهر العسل وخلينا نقول وديتها لدبي وبيكلف ١٠ الاف وليلة الزواج سويت شي متوسط ٥٠ الف ريال شامل كل شي.
وبكذا لازم اجمع لي مبلغ ٦٠ الف ريال لمدة عشر اشهر.
-باقي الهدايا والخرابيط الثانيه وخلينا نقول تكاليفها ابدفعها من الراتب لاني كنت مجمع الباقي.
احسبي لي كم المده اللي ضغطت على نفسي. ماشتريت سياره مناسبه لعمري ووظيفتي. ولا فكرت اشتري جوال جديد او لابتوب جديد او اسافر مع اصدقائي او مع اهلي. او اسوي عزيمه او اهدي امي واخواتي. يعني انا ضغطت على نفسي لمدة ثلاث سنوات بس علشان اتزوج
بهالحاله عمري بيكون ٣٠ سنه
كل هذا بسبب تكاليف الزواج العاليه. بداية من المهر ونهاية بقاعة الزواج.
لا تقولين لي اللي مو قد الزواج لا يتزوج.. اجل وش تبيني اسوي؟ لا تظنين ان كل الناس اهلهم يساعدونهم بزواجاتهم ولا تظنين ان كل الناس وارثين. مثال الوالد الله يرحمه توفى وكل املاكه متنازلين لها لاخواتي بحيث يكون تأمين لهم بعد الله. واخواني كل واحد مشغول بحياته وهم مو مكفولين فيني.


يعني بدال ما اضغط على نفسي ثلاث سنوات اجمع لي على هداوه وافلها واستانس واتعرف على فلانه واطلع للشارع الفلاني واسافر للدوله الفلانيه. وانا متأكد انك شايفه او سامعه عن سهولة الانحراف في وقتنا. والحين البنات هم اللي يتحرشون بالعيال.

لكن انا مابي هالطريق انا شخص ابحث عن الحلال. وبدال مايكون سهل يتم تصعيب الموضوع وتسهيل الحرام. الحين الواحد اذا شاف ولده طالع مع بنت او ممسوك مع بنت مايسوي له شي. والبنات اخر مره ارجع السعوديه رحت للسوق مع امي شفت شي يشيب الراس وهم مع اهاليهم.

المشاركة الأصلية كتبت بواسطة ياسر !!

يا شيخ ينصرلي والدينك..
اخيرا كل الي في قلبي طلعته لي بطريقة دبولماسية...
مدري كيف يبون الشاب الي راتبه لا يتعدى عشرة الاف ريال في بداية وظيفته . يتزوج بالمصاريف هذي كلها..

لما الشباب يطولون بالعمر عزاب طبيعي يصير فيه عنوسة.. لأن ما احد يرغب الا بوحدة في بداية العشرينات..

المشكلة هذي حقيقية وشي يصير في المجتمع لكن الجميع غير واعي بحجم المشكلة وماهيتها..

حتى ان الكثيير من شيوخ بعض القبائل قامو بتحديد المهور والغاء الحفلات والاشياء ذات المصاريف .. وعلى حسب ما سمعت انهم حددو المهور ليس لمساعدة شبابهم ! ..
لكن حددو المهور لأن كثيير من نسائهم كبرو وماتزوجو فقامو يلحقون على المشكلة..

المشاركة الأصلية كتبت بواسطة mlsstudent

اقتبست من جريدة الرياض
(يذكر أن دراسة سعودية صدرت مؤخرا ، أشارت إلى ارتفاع نسبة العنوسة في المملكة العام الجاري إلى 4 ملايين فتاة، مقارنة بقرابة 1.5 مليون فتاة في عام 2010م، في وقت أرجع اختصاصيون اجتماعيون ارتفاع النسبة إلى غلاء المهور، وتكاليف الزواج الباهظة.)
يعني زادت النسبه 150٪

المشاركة الأصلية كتبت بواسطة احلام الورد88

من وضع النسبة ومن اي عمر وكم عدد سكان السعودية وكم نسبة المتزوجين والاطفال والرجال والنساء !!!
نسبة لايصدقها الا غبي او احمق
هذا الهدف تسعون لهم مثل ماقال الاخ خل الاعلام يهول ويكبر الكل يخدم مصالحه

المشاركة الأصلية كتبت بواسطة mlsstudent

ادخلي جريدة الرياض وابحثي عن موضوع "تحديد المهور بـ 50 ألف ريال للبكر و 30 ألف للثيب"

نسبة لايصدقها الا غبي او احمق
هذا الهدف تسعون لهم مثل ماقال الاخ خل الاعلام يهول ويكبر الكل يخدم مصالحه
وليش مايصدقها الا غبي او احمق؟
وش الدلائل اللي تبينها؟
تبينهم يعدونهم قدامك؟ وينادونك كل ماطلعوا يسوون احصائيات؟

او تبين الكلام من وزارة؟ اتصلي على وزارة التخطيط واسأليهم كم عدد النساء اللي اعمارهم فوق 30 سنه وماتزوجوا عام 2010 وعام 2015
وعليها شوفي كم النسبة ولا تقولين لمن يصدق هالكلام احمق او غبي لان اقدر اخذ من ردودك اشياء واخليها "حماقة" و "غباء" لمن يذكرها

المشاركة الأصلية كتبت بواسطة احلام الورد88

هل نظام المنتدى يسمح بوضع روابط
كل الاحصائيات تقول اكثر 60٪‏ من السعوديين تحت سن الثلاثين اخر احصائية تقول عدد الذكور السعوديين اعلى من الاناث
السعوديات بمختلف اعمارهم 10مليون اكثر من الربع عوانس فوق الثلاثين كم بقي من المتزوجات والاطفال والنساء فوق الخمسين والمطلقات والارامل
لو كان عدد السعوديين اربعيين مليون راح اصدق لكن عقليا غير مقبوله النسبة

المشاركة الأصلية كتبت بواسطة mlsstudent

ما اعرف اذا يسمح او لا واذا يسمح انزل لك روابط من الف موقع وموقع واذا انتي مو مقتنعه بالكلام قلت لك اتصلي على وزارة التخطيط لان الخبر من عندهم

واذا حابة تتكلمين بالعقل والمنطق.
في وقتنا الحالي اعمار اللي تزوجون من الرجال كم؟ وكم اعمار اللي يتزوجونهم؟
اذا قلنا الرجل يتزوج عن عمر 30 سنه واللي تزوجها اصغر منه بثلاث سنوات يعني عمرها 27 سنه. اللي اكبر منها من اللي بيتزوجها؟
الرجال يتزوجون بعمر 30 سنه ويتزوجون في الغالب بنات اصغر منهم بثلاث سنوات فغالباً مايكون فيه عزوبيه اعمارهم فوق 30 سنه لكن يوجد بنات اعمارهم 28 وطالع
لان اللي مايحصل وحده عمرها 27 سنه بيدور على وحده اصغر منها