فكري في كلامها

أنا مع الأخت .. وكلامها صحيح

مسا الخير بنات

تطورات كثيره صارت هاليومين لازم اقول لكم عنها

جو اهل زوجي مع زوجي المصون علشان يعتذرون ويصلحون الوضع

كسرت خاطري ام زوجي مره حبابه وماتوقعتها تبكي بهالحرقه ...

الزبده ان صار مد وجزر وهواش وشد ولين يعني من كلووووو ....


طلب زوجي بالاخير انه نتكلم بروحنا ..

وافقت اب اشوف وش عنده .... وش يبغى يبرر بعد ؟

ماعلق على اللي سويته بالشقه لان ماله عين اصلا واللي سويته ولا شي

جلس يتكلم ويبرر انه كله منها وهي اللي لزقت وانه مايحبها بس نزوه ومن هالخرابيط

ودي اسامحه بس والله والله مو قااااااااادره احس لو بعيش معاه مره ثانيه يمكن احتقر نفسي

ولا بعامله زين ...

قلت له تدق عليك الحين ؟ قال لا من ذيك الليله مادق ولا دقت

هه تحسبني بصدقك زي اول ؟

جلس يحلف عالمصحف ومدري ايش

طيب قلت له اسامحك بس بشرط ...

ماصدق على الله اجيب طاري المسامحه

المهم طلبت منه انه يقول لها بنفسه وانا اسمعه انها كانت نزوه وانه يحتقرها ومن ذا الكلام

قال الحين اتصلي فيها واقول لها قدامك ....


لا لا ياحبيبي مو الحين ....

لما انا اتصل فيك واقول لك يالله يعني يالله .....


طبعا اكتشفت ان عندها رقم خاص بس لزوجي وهو سيد الحسن برضه نفس الشي ( امحق )


يوم الخميس الظهر رحت بيتهم وانا ادري انها مو موجوده لانها تشتغل حاليا تطوع باحد الجمعيات

والله ومتطوعه بعد !!!!

المهم رحت وانا ارتجف والله بس ماسكه اعصابي مررررررره ومسويه نفسي بارده

امها اللي استقبلتني ومسكينه كسرت خاطري بس حرتي اكبر

وجلست تشره وتقول ماتجين وبنتها متغيره وماتاكل ...بالطقاااااااق جعل الزقوم يكون غداها وعشاها

قلت ياخاله ابستنى ( فلانه )...

وسألت عن مرة اخوها متعمده ... وقلت واحشتني موووووت ابغى اسلم عليها وانا قصدي انها تسمع

كل اللي يصير .....

جت مرت الاخو وجلسنا سوا وحسافه ان الزفته ماعندها خوات بس اخو واحد....

شوي الا هلت ست الحسن والدلال وتمنيت ان لحظة ماشافتني خذت لها صوره

وجهها صار اصففففففر وزي اللي يدها قامت ترجف طبعا سلمت علي بيدها وانا احس فيها ترجف

وانا اسألها ببرود....شخبارك ؟علامك ماتسألين ؟ورا متغيره ؟

حسيت انها بتخق خلاص...قالت بالاذن بروح ابدل ...

قلت بصرخه ( لحظه ) ......عندي لك امانه ابغاك تاخذينها

امها ومرت اخوها استغربو لهجتي يسألوني شفيك ؟شصاير ؟

وتناظرني بنظره حسيت انها استعطاف انو بليز لا تقولين شي... اسوي اللي تبين ...

قلت لها ....

زوجي يسلم عليك كثييييييييييييييير ويبغى يقول لك كم كلمه من القلب يا حبيبة القلب

بنات لا تسألوني عن حالي ذيك اللحظه حتى صوتي يرتجف بس ماحبيت ابين اني شوي واطيح



اخذت منه جواله اللي كان يكلمها منه وفيه كل الرسايل ....ورقمها طبعا .....

اخذته ودقيت منه على جوال زوجي الاصلي وحطيته على السبيكر وقلت ...

.... ياروحي قل اللي قلت لياه امس ....

تكلم زوجي وهي احسها خلاص ... وامها ومرت اخوها احسهم مو قادرين يستوعوبون ....

وزوجي يتكلم يقول لها انتي حشره لزقتي فيني وانا متزوج صاحبتك وجيتيني الشقه وانا صديتك

وانا احب زوجتي ولا احب هالخرابيط ...ومن هالكلام اللي يسم

طبعا انه صدها كذب بس علشان نبين حقارتها ... وطبعا مستحيل بتقول لاهلها .. انا رحت ونمت معاه ...

الزبده وهو يتكلم كان يسجل الكلام ....

هي حسيتها انهارت خلاص وامها جلست وخفت تجيها ازمه قلبيه وابتلش لان وجهها كان اصففففر

ومرت الاخو مو مصدقه مفهيه ....

الحمد لله ان ابوها مر بذيك اللحظه الحمد لله لان قلت اكيد الام ومرت الاخو بيسترون على البنت

وانا ابوها اسميه عمي وخلاص متعوده عليه ...

قلت ياعمي ....ذي الامانه لبنتكم ....(اللي هو الجوال ) وفيه كلللل شي

ناظرني وهو موب فاهم يقول اي امانه ؟؟؟

قلت خليها هي تفهمك .....



سلاااااام .....


وطلعت ومرت الاخو كانت تنادي تقول لحظه لحظه وانا ما وقفت طلعت على طول مدري وش تبي .....

الجوال هذا ....

فيه رسايلها لزوجي ....

شي من جوالها الثاني اللي مطلعته ..... وشي من جوالها الاصلي .....

انا مسحت كل الرسايل اللي كان مرسلها زوجي وخليت رسايلها ....

بتقولون حتى هي بتوري اهلها رسايل زوجج ؟

بقول ربكم كريم...

زوجي كان يراسلها على جوالها الثاني اللي مطلعته واللي مايدرون عنه اهلها ويراسلها من رقمه الثاني

لما بتوري اهلها الرسايل اول شي بيكتشفون ان عندها جوال ثاني....ثاني شي بيشوفون الرقم انه مو رقم زوجي الاصلي ....بطاقه بدون اسم ....

ورسايله اللوح كلها مافيها شي يدل انه هو فلان ...

لكن هي الغبيه كانت تراسله احيانا من جوالها الاصلي اللي يعرفون اهلها ....وكانت تكتب اول مابدت تراسله

انا فلانه .....ومفتخره بعد الغبيه ....


بس وش اللي صار بعدين ؟

مدري ولا يهمني وبالطقااااااااااااااااااق .....ولاول مره من صارت السالفه ابتسم ...طلعت وانا مبتسمه

خربت بيتها ؟؟؟!

ايوه خربت بيتها لحد يلومني .... خل اهلها يلمون بنتهم .....

خل يأدبونها ....

اللي سويته فيها حرام ؟؟؟؟

ادري اللي سويته منذله بس خلاااااص لو ماسويت كذا كنت راح انجن والا اموت

تستااااهل ولا بمتحسفه ابدا ابدا ....

الحين طلعت قدام اهلها ان هي اللي لزقت بزوجي وهو اللي يصدها ومايقدرون يثبتون عليه شي

ورسايلهم كللللها ناسختهم بجهازي...




بعدين لما كلم ...على باله اني سامحته خلاص وصافي يا لبن ...

خليت اخوي يرد عليه وقال له ....تقول لك اذا ولدت بالسلامه تفكر تسامحك والا لا .....

ومن الحين ليما تولد ماتبي تسمع صوتك ولا تشوفك ولا تقرب من البيت ...




احس اني مرتاحه الحين ...

مو كثير

بس طلعت حرتي

اما بالنسبه له هو روميو زمانه ....

من جد مالي خلق افكر زياده .... برجع لدوامي بكره ....واذا ولدت بفكر .....ويحمد ربه بعد ....

واذا طلق قبل كذا ابرك من ساعه ....بس مااعتقد بيطلق لانه يبغى يرجعني بأي طريقه.....



وبس



شرايكم باللي صار ؟

تعجبني المرأة القوية...ولو كنت مكانك لما اكتفيت بما فعلتِه...

تحياتي..

__________________

عفواً ..
بس لو اكتفيتِ بفرد واحد من أهلها ..
معاكِ حق .. حتى تنتبه لنفسها
وفي نفس الوقت تكوني خففتي عن نفسك

لكن تفضحيها بهذا الشكل قدام الوالدين مع زوجة الأخ
لا والله مالك حق ..
حرام عليك قلب الأم والأب ..


يعني تخيلي زوجك - لا قدر الله - استمر في خياناته
راح تروحي عند أهل كل وحدة !!؟؟

عارفة إنها صديقتك ..
لكن الستر طيب ... خاصة عند الوالدين الله يكون بعونهم
ومن ستر مسلماً ستره الله

ولو ما شجعها زوجك ..
ما كان حصل اللي حصل !!

الله يعافينا ويعافيك،،