"يا أهلا بالامتحانات" - منتدى عالم الأسرة والمجتمع

02-01-2006, 10:02 PM

princees

من كبار شخصيات المنتدى

تاريخ التسجيل: Mar 2005

المشاركات: 2,815

"يا أهلا بالامتحانات"

كل سنة وإنتم كلكم طيبين، الامتحانات على الأبواب.. يدوبك كام يوم وتبدأ الامتحانات.

طبعا دي مش مناسبة يتقال فيها يا أهلا وكل سنة وإنتم طيبين، بس أهو لازم نبتديها كده علشان الرقابة التحريرية ما هو مش معقول.. ييييييييه أهي الامتحانات جات من تاني.

المهم، طبعا بما إني كنت طالبة فأنا عارفة كويس إن المذاكرة مابتبتديش غير أخر السنة والمذاكرة لازم يطول وقتها من قبل الضهر لغاية الفجر؛ لأن خلاص ماعادش فيه وقت فنبدأ نشرب شاي وقهوة ونسكافيه، واحنا متوهمين إن الحاجات دي بتسهر وبتخلي الواحد أو الواحدة مننا يركزوا أكتر..

هم ممكن يكونوا بيعملوا كده مع ناس صحيح بس المشكلة إن ضرر الحاجات دي أكتر من نفعها ميت مرة.

سامعاكم بتقولوا يعني خلاص مفيش أمل في السهر؟ طيب هنلم المناهج دي كلها ازاي؟ تفتكروا برضه إني هاسيبكم في موقف زي ده، لأ طبعا أكيد جايبة لكم معايا حل...

الحل..... الحل.......... الحل....... الحل في الأكل، مش قصدي إنكم تفضلوا تاكلوا وتشربوا طول النهار وتسيبوا المذاكرة.. أكيد ده مش قصدي خالص.

أنا قصدي إنكم تستخدموا الأكل اللي بتاكلوه في زيادة تركيزكم وفهمكم للي بتذاكروه.

يعني هاحاول أقول لكم على كام نوع أكل وشرب بيزود الفهم وبيساعد على التركيز، وكمان بينمي الذكاء ونبدأ بالمشروبات يلا قرب وجرب.

المشروبات

يا البرتقالة

البرتقال يا سلام عليه لو عرفتم فوايده.. متهيألي الناس كلها تمشي وفي إيدها عصير برتقال.

شرب كوباية واحدة من عصير البرتقال الصبح مع الفطار بيخفف التوتر والضغط العصبي اللي هم طبعا أعداء المذاكرة.

ده كمان بيساعد بشدة على التركيز وده لأنه غني بفيتامين C وB وA وE وكمان بيحتوي على الكالسيوم والماغنيسيوم والبوتاسيوم والفسفور.

يعني من الآخر فاكهة جامدة جدا جدا.

عليكِ وعلى المرمرية

ياريت تستبدلوا الشاي والقهوة بالمرمرية وأوراقها بتشبه أوراق النعناع بس أطول.

دي بقى بتساعد على تنشيط خلايا المخ والدورة الدموية كمان.

ده كمان الناس بتنصح بشربها أيام الامتحانات بالذات لأنها بتقوي الذاكرة فبتساعد على الحفظ.

لأ وكمان دي بتقاوم الأرق اللي بيحصل لمعظم الناس قبل الامتحانات.

سر الحياة

اوعوا تنسوا المية.. دي بقى أهم حاجة بانصحكوا بيها، لأنها غير إنها بتحافظ على الصحة العامة للجسم فشربها بيدي حيوية للجسم وانتعاش وده بالظبط اللي الجسم محتاجه ساعة المذاكرة.

لو مش بتحبي المية ممكن تعصري عليها ليمون. أو تحطي عليها معلقة عسل
دول شوية مشروبات مفيدة جدا، دول بالإضافة لليمون وطبعا اللبن اللي بيمد الجسم بطاقة هايلة.

الأكلات

الكوسة هي الحل

ما أقصدش طبعا الكوسة اللي بالي بالك..

أقصد الخضار اللي اسمه الكوسة وعلشان أضحكك أكتر اسمها بالعربي القرع.

ودي ليها فايدة كبيرة جدا جدا في مجال التركيز وتقوية الذاكرة.

كليها مطبوخة ومسلوقة ويا سلام بقى لو قدرتوا تحطوها في السلطة زي ما هي نية كده تبقي بتاخدوا كل فايدتها.

الفواكه

الفواكه بكل أنواعها مفيدة جدا للجسم لأنها بتحتوي على الفيتامينات الضرورية.

ده بالإضافة للسكريات اللي بتنشط الجسم من غير ما تزود الوزن وده مطلوب جدا في الفترة دي؛ لأنك تقريبا طول الفترة دي قاعدة في البيت قدام الكتب والمذكرات.

وماتنسيش تاكلي الفاكهة كلها طازة يعني لا معلبة ولا مجففة.

السمك مقلي كل وبرق لي

ويا سلام بقى لو كان مشوي.. الفايدة تبقى الدوبل.

نيجي بقى للسمك أبو الفسفور اللي بيخلي الدماغ تشتغل إيه.. فوريرة.

وده بالظبط اللي احنا بنحتاجه كلنا في الامتحانات.

طبعا ملاحظين إن كل الأكل اللي احنا جايبينه المرة دي "صحي ومفيد" ده طبعا ليه سبب..

لأنكوا لازم تبعدوا أيام الامتحانات بالذات عن الأكلات السريعة والدسمة لأنها بتؤدي للخمول والرغبة في النوم.

كمان خدوا بالكوا كويس قوي من صحتكوا في الأيام دي بالذات؛ علشان بعد الشر مايحصلّكوش حاجة –العملية مش ناقصة- يعني ماتتعرضوش لأي تيارات هوا، عارفة إن االشتاء السنة دي ثلج بس لازم تستحملوا كويس.

وفي الآخر لازم أقول لكم دعاء كانت مامتي بتقول لي عليه دايما لما يكون عندي امتحانات، أو لما خلاص ماقدرش أفهم حاجة..

"اللهم لا سهل إلا ما جعلته أنت سهلا، وأنت تجعل الحزن إن شئت سهلا يا رب العالمين".

وبادعي لكم كلكم بالتوفيق والنجاح يا رب العالمين.

بس خلاص..

__________________

ضوابط المشاركة
لا تستطيع إضافة مواضيع جديدة لا تستطيع الرد على المواضيع لا تستطيع إرفاق ملفات لا تستطيع تعديل مشاركاتك BB code متاحة الابتسامات متاحة كود [IMG] متاحة كود HTML معطلة قوانين المنتدى

روابط سريعه