السلام عليكم ورحمة الله وبركاته
انا والحمدلله متزوجه من سنتين من انسان احبه جدا وهو يحبني حب شديد .. حياتنا مستقره من كل النواحي واجمل شئ بيننا الصراحه .. زوجي انسان يخاف الله ومستقيم واخلاقه عاليه جدا جدا وهذا الشئ اللي معلقني فيه بزياده .. واحيانا اشعر انه اكبر من سنه ودايما ينتقد الشباب على تصرفاتهم الطايشه ..
انا حبيت اعطيكم صوره عن زوجي اللي اثق فيه وعمري ماظنيت فيه الا الخير ..
قبل يومين سألته ايش رايك في الشات طبعا هو انتقده وان الناس اللي تدخله فاضيه واغلبهم شباب يدورون على بنات والعكس .. وقالي انا زملائي اغلبهم يدخلونه ويستغربون مني اني ماادخله ومره وحده دخلته ولقيته تافه ومضيعه للوقت وبعدها مادخلته .. نقاش عادي وكنت متوقعه رد زوجي لاني اعرفه كويس ..
اللي صار امس زوجي كان فاتح الماسنجر ويكلم زميله بالجوال وانا جنبه سبحان الله ما ادري ايش اللي خلاني اشوف الايميلات اللي عند والناس اللي ضايفهم عنده ..
انصدمت صدمة عمري ..
فاطمه.. عايشه .. نوال .. الحلوه .. سويتي .. جواهر .......!!!!!
طبعا ما يحتاج اوصفلكم شعوري قعدت اصيح وانفعلت وانت تكذب علي طول الوقت تقول عمري ماعرفت غيرك .. وانا ماراح اثق فيك بعد كذا .. ايش تتوقعون ردة فعل زوجي ؟؟
قعد يبكي ويضمني ويجري وراي للغرفه ويحلف بالذي رفع السماء انه قبل سنوات وقبل ما اتعرف عليك وقبل مااتزوجك .. وحلف عمري ماكلمت بنت بالتلفون كانت مجرد دردشه ماسنجر ..
طبعا انا جن جنوني من وين عرفتهم .. قالي من الشات وهم اضافوني .. قلتله تضحك علي .. اكيد انت اعطيتهم ايميلك او اخذت ايميلاتهم .. يحلف يقول هم ياخذون ايميلي بدون ما ادري ويضيفونه عندهم وقالي وهذا مو شات المنتديات العادي لا في الياهو .. طبعا انا مااعرف في ذي الامور لكن اللي اعرفه انه قبل اضافتهم وكلمهم ..
طبعا طول الليل يحاول يراضيني وانا ما اكلمه ..
والله من الصدمه .. عمره ماجا في بالي ان زوجي كان يكلم بنات ولا يسوي كذا دايما صورته في بالي النظيف الشريف المثالي ..
انا في داخلي مصدقته ومصدقه انه كان طيش شباب طبعا انا سألته ليش مخليهم للان مادامه قبل سنين على قولتك قالي والله هذا ايميل قديم ماادخله كثير ونسيت احذفهم .. ويحلفلي انه تاب ومن يوم تزوجني ما عرف غيري ..
ابغى منكم التصرف الصحيح انا اكيد راح اسامحه لان الله غفور رحيم ..
لكن ماودي ارجع بسرعه واسامحه على طول .. نفسي ينقرص شوي يعني يحس بفداحة الموضوع ..
ارجوكم اشيروا علي لوكنتم مكاني ايش تسوون ..؟؟