السلام عليكم

قرأت كثيرا و شاركت في حل بعض مشاكل الاخوات في مختلف المنتديات
غير أني وقفت عاجزة عن تفسير شخصية زوجي و بالتالي كيفية التعامل معه
ذهني مشتت و لكني اردت ان افرغ كل ما بداخلي علني اجد تحليلا نفسيا واضحا لشخصية زوجي

بداية احب اخبركم عن الوضع العائلي لزوجي و اللي احس انه أثر عليه كثير
عائلة زوجي تقريبا ملتفة مع بعض بس ابو زوجي شديد جدا و حتى زوجي للحين اهو و أخوانه ما يذكرونه بخير يعني دايما يعيبون تصرفاته لمن كانوا مع بعض بالبيت و لحد الآن ناهيك عن التفرقة في المعاملة بين الأولاد و الاهتمام الكبير بالماديات يعني في نظره انه اللي عنده قرش يسوى قرش و يعامل على انه سيد

والدة زوجي انسانة ضعيفة و شخصيتها مثل سي السيد و أمينة بالضبط بس اللحين صارت شخصيتها شويه اقوى مع تقدم عمي بالعمر ووقوف اولادها معاها

بالنسبة لزوجي طبعه حاد و هذا ماخذه من والده , سريع الغضب واذا غضب ينسى نفسه
مستواه التعليمي ما وصل للجامعي يعني ما اكمل دراسته الجامعية حالته المادية ضعيفة تقريبا
قلبه ابيض مثل الحليب بس ما ينسى اي اساءة الا مع مرور وقت طويل
رومانسي و عنده افكار رومانسية روعه و يحب يفاجأني بمناسبة و من غير مناسبة
لكن

يزعل بسرعة و يبغيني اراضيه مثل الاطفال حتى لو كان اهو الغلطان بس ما انكر انه في احيان كثيرة اذا كان اهو الغلطان يجي يراضيني

المشكلة الحقيقية انه اذا غضب او حصل خلاف بينا يغلط علي بألفاظ تجرح و ما يتأسف على اللي يقوله لي
مثلا اخر مرة حصل خلاف بينا كنت اسوي العشا و اهو ما كان يدري اني بالمطبخ و كنت مخبرته اني مجهزة العشا من بدري بس محتاج تكملة و اعداد المهم العشا تاخر في تحضيره لأنها كانت طبخة جديدة و اكثر من صنف يعني مو انا السبب في هالتأخير طلعت من المطبخ و كانت معاي بنتي الصغيرة و كانت اشوية مريضة والا يناديني و ين انتي قلت انا كنت بالمطبخ بس اللحين طلعت قال اشلون انتي بالمطبخ؟ انا رحت المطبخ ما لقيتك و بنتك تصرخ قلت له توها بس معاي و انا ما صار لي دقايق من طلعت من المطبخ و الا الرجال يصرخ و متنرفز حده و ينه هالعشا انتي مو قايلة انك مجهزته من العصر؟ ليش للحين مو جاهز ؟ مع ان الوقت ما كان متأخر و بصراحة اللي زعلني مو هذا الشي ليشني متعوده منه الغضب و بعدين يصير مثل الطفل البيرئ بس اللي حز في نفسي اني كلما بينت له اني قاعده اجهز فيه و في هالجو الحار بس طلعت شوي علشان ابرد على نفسي و ارد اكمل وما تحملت صراخه انا بعد رفعت صوتي و الا يقول لي ... و الله استحي اقولها لأني ما تصور رجل يحترم زوجته بيقول لها هالكلام
قال لا تنهقين مثل الحمار

انا؟ مع اني ما اتلفظ عليه بكلام يزعله او الفاظ تجرح و عنده شي بسيط تحت اللي يقوله لي شي عظيم يعني مرة قلت له حركات اطفال اللي تسويها قصدي حركات غير مسؤوله اشسوى و اشلون زعل بس اهو ما يفكر في الكلام اللي يقوله

انا احس انه فيه نوع من الغيرة او ما بقول غيرة بس ما يبي يحسسني اني صرت اعلى منه و السبب اني اعمل و راتبي اكثر من راتبه بس و الله ماني محسسته باني افضل منه يعني راتبي في يده وما احاول اشتري شي الا معاه و لا اصرف على نفسي الا كله على البيت

ما انكر انه امين على فلوسي يعني اهو بعد ما يسحب من راتبي الا مخبرني و لا يصرف شي الا مخبرني سواء من راتبه او من راتبي
يعني احنا متفاهمين على اساسيات حياتنا بشكل كبير و بينا دائما حوار مفتوح بس لحظات الغضب اتضيع كل لحظة جميلة نعيشها مع بعض

بعض الأحيان احس بكره تجاهه يعني مو كفاية الحالة المادية البسيطة اللي معيشني فيها حتى لو بغض النظر عنها و بتحمل لكن على الأقل يحيطني بحبه و اهتمامه و احترامه مو على اقل غلط او سوء تفاهم بينا ينسى اني زوجته وام عياله

و ما اخفي عليكم حتى الضرب يضربني و بعدين يرجع يتأسف و يقول انتي اللي توصليني لهالحالة و تخليني اغضب و انسى نفسي و يقعد يبكي في بعض الأحيان و نفس الحال مع اعيالي حنون عليهم لاقصى درجة لكن اقل شي يخليه يعصب عليهم و يضربهم بقسوة و يرد يحضنهم مثل اللي يتأسف لهم
و الله احترت مع زوجي احيانا رومانسي و طيب و حتى اللعب يلعب معانا و احيان قاسي و بغيض

ما انكر انه الحالة المادية وايد مأثرة فيه يعني التزامات وايد و قروض و راتب قليل بس الحمد لله راتبي مع راتبه وايد مسهل امورنا طبعا مو عايشين مثل اللي حوالينا بس احسن من غيرنا
و بعد العمل وايد مأثر عليه في طريقة نقاشنا و في طريقة تعامله معاي انا و عيالنا ما كان جديه بس طبيعة عملة اللي مخليته يتعامل بنفس الأسلوب اللي يعامل فيه زباين الشركة و انا بينت له هالشي اكثر من مرة

ادري طولت عليكم بس حبيت اوضح كل جوانب المشكلة يمكن تقدرون تتفهمون وضعي

و تقدرون تفسرون لي ليش يصير مثل الشيطان في اوقات مع انه اساسا رومانسي و طيب و حبوب؟ انا حاولت وايد اني اتفادى غضبه بس اذا سكت يصرخ اكثر و يبغاني اناقشه بنفس الحدة اللي يناقشني فيها ما يبيني اكون هادئة يعتبره برود في الكلام يخليه يغضب اكثر

و احاول انفذ له كل طلباته حتى طريقة لبسي و نوعية الملابس اللي البسهم في كل شي و خليته يتحكم في حياتي بس علشان ارضيه و لا طلعات و لاشي الا معاه
ما انكر اني متأقلمة مع هذا التحكم و احس انه يفهم اكثر مني بالحياة بس بعد المفروض يقابل هذا كله باحترام لي مو يهيني حتى جدام عيالي و لا يبالي
لا تفكرون اني شخصية ضعيفة و الكل يشهد لي من اهلي و اهلة بقوة الشخصية و الحكمة في تدبير الأمور و اني زوجة مثالية و حتى اهله دايما يحرضونه على احترامي و انه الفضل بعد الله لي في استمرار حياتنا الزوجية بسبب صبري عليه و حتى اهو نفسه دايما يقول اذا بدخل الجنة فانتي السبب و اي لحظة سعيدة بحياتي انتي سببها
لكن مثل ما قلت لكم طبايعه متقلبة وقت الي يغضب يصير له مسح للذاكرة و يصير انسان ثاني

شاكرة لكم قراءة مشاركتي الطويلة

__________________

أختي الفاضلة زوجك طبعه عصبي

فيه كثير ناس قلوبهم طيبة لأبعد درجة لكنهم لما يعصبون يتحولون لشخصيات مغايرة بس يرجعون يندمون على أفعالهم لما يرضون

وهذي طباع البشر كل شخص له شخصية تختلف عن الأخر

حاولي أن تناقشيه في موضوع عصبيته عندما يكون هادءً وحاولو إيجاد حل

وأقرني هذا بالدعاء والتضرع للخالق عز وجل

بهذا تكوني عملتي الذي عليكي والباقي على الله

وأحمدي ربك على كل حال فغيرك العصبية هي الأصل في التعامل لديهم

أختي العزيزة عليك بتحمل عصبية زوجك في بعض الأحيان (حسب ما فهمت منك أنه يمر بمشاكل) مما يجعله عصبي في أكثر الأحيان. عليك بتحمله وتهيئي له الجو المناسب في المنزل لتهدئته وبهذا تكونين زوجة صالحة واشكري الله تعالى أنه يندم بعد عصبيته.