بسم الله الرحمن الرحيم
والله مدري شقول بصراحه ....بس أنا بقول الي صار وبكل صراحه الي صار من تزوجت الى الأن ....أنا صراحه من كثر ما شفت منهم صرت أرد عليهم أحيانا بس للاسف معظم الأحيان أسكت وأحط بقلبي...لان زوجي مثل أزواج الي سبقوني بالكتابة (ما يرضى على أهله).....وهذي حكايتي مع أن ما في لها حل ولكن الفضفضة تريح وايد....
أنا انخطب خطوبة تقليدية يعني لا أعرفه ولا يعرفني...هو يشتغل مع زوج صديقتي وصديقتي هي كانت الوساطه في الخطبة...المهم الوالد الله يجزاه خير ما قصر شرط على زوجي اني أسكن بشقة لحالي ...وأكمل دراستي وأشتغل اذا حبيت يعني مو على كيفه...(حطو بالكم لهالنقطة)...
التدخل بدى من الخطوبة يعني في كل شي يعني مثلا يوم الجمعه شي معروف اني أروح بيت عمي (ابو زوجي) اوكي وزوجي ما اشوفه الا في هاليوم هذا بس لكن اهله جزاهم الله خير ما قصرو ..كانو أنانيين يعني طول اليوم يبوني أقعد معاهم ...وأنا أتضايق لاني ابي اقعد ويا خطيبي عشان أتعرف عليه والوقت الي عندي ضيق يعني الوالد ما كان يسمح لي أتأخر بره البيت الى بعد 10.. طيب شوفو الي يصير يوم الجمعه وحكموا بانفسكم....
خطيبي يجي ياخذني الساعه 10 الصبح أو بعد الصلاة من بيت الوالد يعني على حسب دوامه ...أروح بيتهم وأقعد معاهم ونتغذى مع بعض يتغذون الساعه2 الظهر ونشرب شاي وسوالف وغيره المهم الساعه 3 اقعد مع خطيبي ...ولكن الساعه 3.30 يبدأون جولتهم للاهل الي تبدأالساعه 3.30وتنتهي بعد الاذان طيب نرجع البيت ونصلي لما أروح غرفة خطيبي كلهم يجون واحد ورا الثاني بحجة ان يبون يتفرجون على الدش ...طيب الساعه 8.30 بالليل يحطون العشى نتعشى ويكملون قعدتهم معانا طبعا العشى ما يخلص الا الساعه 9.00 بالضبط لا وساعات أكثر بعد زين يعني عندي أقل من ساعه لان بيتنا بعيد ويحتاج الى مسافه وطبعا هذا اذا ما حصلنا شي زايد على هالاشياء الي تصير أقصد الطلعات الي تصير ...يعني خطوبة او عرس أوزيارة مريض أو وحدة والدة يعني والذي منه ....طبعا انا لما طفح الكيل خلاص بديت ادافع عن نفسي واتكلم مع زوجي ولكن هو بدأ يقولي ما اقدر أستحي اكلمهم وما اعرف ايش ولما كلمت امي عن الموضوع قالت لي اذا ما في فايدة من الكلام معاه وهو يستحي يكلمهم خلاص انتي خلك وياهم ولا تقعدين معاه حتى اذا صار عندك وقت ...والحمد لله لما سويت كذه هو بدا ينادي علي قدامهم حتى لو في زوار أو اذا قالو بيطلعون يقولهم ما أقدر أنا بطلع مع زوجتي...وكمان كان لما يجي بيتنا كنت أخلي أخواني يجون ويجلسون معانا ولا أخليهم يطلعون وصرت أقعد معاه في المجلس يعني الكل يقدر يجي يقعد معانا وانادي حتى على امي وابوي يقعدون معانا....خخخخخخ (على فكرة أنا كنت قبل ما أخلي أخواني الصغار يقعدون معانا وأطلب من أمي تمسكهم ولكن بعدين قلت خليه يضوق الا أنا فيه شوي عشان يحس ....هذا طبعا غير المضايقات الي احصلها منهم اذا طلعنا مع بعض يعني لو رحنا نزور أحد من أهلهم وجلست مع وحده أسولف تقوم الدنيا ولا تقعد...
وزوجي حاول يقنعني أن نسكن مع أهله عشان نوفر أيجار الشقه لكن بعد الي شفته منهم ابدا ولا أفكر حتى مجرد تفكير اني اسكن معاهم...هذا أيام الخطوبة أما الزواج....
أول شي صار انهم أصرو ان ما نسوي حفلة وبدل الحفلة نسافر ...ولكن انا اصريت عالموضوع وهم أصرو وصارت سالفة طويلة عريضة ولا مثل ما يقولون (شر البلية ما يضحك) لما أصريت على الحفلة قالو أحنا ما عندنا فلوس للملابس للحفلة اذا سوينا لنا ملابس يعني ما بنعطيكم هدية الزواج ...انا قلت لهم على طول لا تجيبون ...ولما اخترت مكان الحفلة ما رضو فيه لان بعيد عن بيتهم ...ولما سويت لي صباحية للعرس وطبعا خبرتهم عنها من مده طويله وحددتها من لما حددت تاريخ الزواج أقصد يعني مكانها أتصلو وهاوشوني وما ادري شنو علشان انهم ما يدرون ولا عزمو الناس الي من صوبهم وفوق هذا زعلو...
ويوم الزواج نفس الشي ما خلا من المشاكل أبدا ...ولما حملت ما كانو يبون أحد يدري عني أني حامل وكنت تعبانه وايد وكان عندي نزيف خفيف وهما عندهم زواج ولما قلت لهم أني ما اقدر أجي اتصلو وهواش وعفسة ولا اتهموني اني ما احب الا في بطني وانه مو مهم عندي واني اكذب وما عندي نزيف ولا شي وهاذي مجرد حجة عشان ما اروح الزواج والكل يدري عني اني حامل ...ورحت الزواج غصبا عني وبعدها بيومين بس زاد النزيف عندي واخذني الوالد الله يحفظه ووداني المستشفى (لاني كنت في بيت الوالد وامي لاحظت اني تعبانه ) وهناك الطبيبة ما رضت لي امشي وخلتني انام بالمستشفى ولكن الحمد لله عدت السالفة على خير .. ولما طلعت من شغلي تدخلو فيني وليش طلعت وما اعرف ايش ....ولكن أنا الحين ما اروح لهم الا يوم الجمعه واقعد معاهم شوي واطلع ما اطول ... ومع ذلك المشاكل ما زالت قائمة ...وفي مواقف كثيرة صارت حتى في اسم ولدي الي للحين ما جه على وجه الدنيا تدخلو في ومو عاجبهم اختياري ...ولكن أنا أدعي ليل نهار ان الله يرزقني ببيت أو حتى شقة بعيد عنهم ...
أسفة لاني طولت عليكم ...وياليت تفيدوني بأرائكم...
تحياتي
__________________
[poem font="Simplified Arabic,4,white,normal,normal" bkcolor="coral" bkimage="" border="double,9,sienna" type=2 line=0 align=center use=ex num="0,black"]
أشدد حيازيمك للموت = فإن الموت لاقيكا
ولا تجزع من الموت= إذا حل بناديكا
كما أضحكك الدهر= كذاك الدهر يبكيكا [/poem]
أم ريــــــم
05-06-2004, 03:36 PM
الله يعينا
ضوابط المشاركة
العرض العادي
