انا عندي مشكلة ولا ادري وش حلها وبنفس الوقت ماقدر افضفض لحد لاني اعتبرها انكسار و استحقار للذاتي واهانة للنفسي التي كرمها الله.
انا ادرس الكلية واشتغل بوظيفة متواضعه بمرتب 6000 ريال خطبت كثير عند اكثر من 30 بيت عند قبيلتنا ولا احد زوجني وكتب الله لي نصيب وتزوجت وبعد فترة بسيطه جداً حملت زوجتي واختلفنا وطلقتها جابت بنت وحاولت ارجعها ولكن اهلها طلبوا مبلغ وقدرة رضوه ورفضت والى الان جالس اخطب تخيلوا بعد طلاقي خطبت اكثر من 20 بيت. انا طابت نفسي وانقهرت خصوصاً نظرات اهلي وكانهم يشفقون علي الى درجة امي جالسه تكلم المشايخ وتقول ولدي مادري ليش ينرفض ابوي شوي شديد وعصبي وكلامه شوي جارح الى درجه يقول لي انا بحياتي ماشفت مثلك انا معادني بخاطب لك كل شوي يرفضونا اهنت نفسي للي يسوى والي مايسوى
اختي تقول لي لو انا مو اختك وانت خطبتني مراح اوافق لان وظيفتك مش اوكيه وتقول تفكير البنت تبي واحد يدلعها وتبي سوق ومصاريف مو واحد راتبه 6000 بس وضعي المادي ممتاز ساكن بفله ابوي ولله الحمد تاجر وضعنا المادي ممتاز بس ماني عارف ليش الرفض. الحين الحمد الله تخرجت من الكلية وطلعت خارج المملكة ادرس لغة وتوني مخلص اللغة ورجعت للسعودية والى الان مازال الرفض مستمر والمصيبه اني اشوف ناس اقل مني وظايف ومتزوجين وبعضهم راعي شراب وامورهم ماشيه. والمصيبه اني ماشوف فيني عيب و شكلي مقبول وايام كنت خارج السعودية كانوا الطالبات الي معاي يبون يرتبطون فيني بس انا كنت ارفض لاني عارف ان اهلي بيرفضون واكثر الاجانب يقولون لي انت وسيم و ذكي ليش ماتزوجت الى الحين وعمري الحين 27 ومطلق لي اكثر من 3 سنوات شي يقهر وادري بتقولون لي اطلع برا قبيلتك انا ماعرف احد ومستحي اكلم احد من اخوياي لانه بيقول لي وين ربعك وجماعتك وامي ماتعرف احد برا الديرة
تصدقون اني تمنيت اني مو سعودي لاني شفت الاجانب يقابلون بنات وينعجبون فيهم ويتزوجون
لا ابي الحرام وتقتلني نظرات الشفقه من اهلي وهم يحاولون يواسوني وانا بنفجر لاني ماقدر افضفض عند احد احس انها انكسار وبعض قرايبنا ينشدون يقولون ليش العالم يرفضونه اكيد هو خربان او فيه شي. تكفون عطوني حل

(تم تعديل العنوان ليتناسب مع المضمون)