سوء فهم بين والدي وخطيبي (مملكة )
السلام عليكم
والله مادري من وين أبدأ احس بالحرج..
مشكلتي مو عاطفية مشكلتي مع والدي للاسف.
احرجني قدام زوجي قبل شوي احس،منحرجة بقوة من زوجي..
صار موقفين الموقف الاول ابوي بناء عليه تصرفه مع زوجي بالموقف الثاني.
تتذكرون سالفتي يوم اقولكم عدم الراحة مع زوجي اول ماتملكت.. قررت اشوفه كثير واناقشه كثير عشان ارتح ياامشي معه يااتركه.. والحمد الله مشت اموري .. لكن ابوي يرفض علاقتنا الهاتفيه ويبينا نتكلم بالدقايق وبرسميه يخاف اطيح من عين زوجي.. ..
انا ماسمعت كلامه.. لانه عمره بالسبعين وطالع ..ومو متفهم حاجت الشباب
احنا زمن مختلف احنا نشوف بعض طول الوقت بالبيت ونطلع مطاعم مقاهي سفر استراحات جمعاات مناقشات يقيس العلاقة بين الرجل والمرأة الان مثل قبل 100 سنة..
ادري طولت وتفلسفت.. المهم
زارني زوجي .بعلم ابوي وطول شوي ويوم طلع جالسنا نتكلم بالتليفون بالساعات و انجن وهاوشني،وقالي،سكري السماعه لا تطولين معه بالسواليف وعطن محاظرة طويلة عريضة
بعدها ب 3 اسابيع
ابوي اكتشف اني تمشيت مع زوجي (مملكة ) بالسيارة بغى ينجلط وعطاني كمية دعواي بعدم التوفيق.. وتخيلي انه صار لك حادث و دروا الناس انك معه ؟ (ثقافة العيب )
ليه انا طالعه مع خويي مثلا ! هذا ردي وقاطعني بعدها..
.
.
من عاداتنا اهل البنت يتكفلون بالزواج. . المصيبة ايش
زوجي حس انه ابوي يبالغ بعدد ذبايح الزواج وتخفيف منه عن ابوي قال ياخال ماله داعي هالعدد.. علما ان زوجي مايدري اني انا الي دافعه ثمن هالذبايح
ابوي،قاله مالك شغل. بأسلوب جدا سيء اقسم بالله انحرجت وانا اسمعها احس،وجهي طاح بالتراب عروس ومابقت على دخلتي شئ واعيش الالام وجروح من ابوي احسه احرجني قدامه زيادة على ذلك يقوله وبعدين مو انت وهي الي تحكمون وش احط ومااحط يقصدني
ياناس اهنت.قدام الرجل الي بعيش معه ..
زوجي قاله ياخال مب قصدي اتدخل بس مابي تكلف ع نفسك وتذبح واحنا جماعتنا شويين وانا سألتها وهي قالت ابوي،بيذبح كيذا وكيذا فماحبيت تكلف نفسك
لكن تصحيح زوجي للا معلومة مايفيد مع ابوي لانه لو ( الشريان) بنفسه يقنعه ويفهمه مقصد زوجي مافهم علما ان ابوي كذا مع كل من يخالف رأيه..
ياعالم انا اسمع شكاوي خواتي واخواني من احراجات ابوي.مع عوايل ازواجهم و احرج
لكن انه يصير لي شخصيا وخاصة ببداية حياتي الزوجية لا مصيبة ماقدر اتحمل..
انصحوني.. اهلي مستخفين بالمشكلة ومستبسطينها
- علما ان ابوي مب معجبينه اهل زوجي لان اسمهم مش رنان وان كانوا من ارحام العايلة البعيدين ؟
- زوجي يقول لي شكل ابوك زعل عليك ويسوي نفسه مازعل منه.. بس زوجي حساس و هادي ومايحب يبين مشاعره .. اخاف يحقرني بعدين عشان ابوي اهنن
اخاف ابوي،يستلم زوجي بالطالعه والنازلة ويصير ضحيته الجديدة.. ابوي مافي امل يتغير . لكن كيف ارد ع زوجي لو حاول يكتشف وش السالفه ؟ كيف الطف مابينهم و اقرب وجهات النظر ..
التعديل الأخير تم بواسطة رائحة البخور ; 24-11-2015 الساعة 01:59 AM
18-11-2015, 10:28 PM
ضوابط المشاركة
العرض الشجري