السلام عليكم

أسعد الله لحظاتكم ❤

متزوجة منذ مايقارب سنة وحامل حاليًا بآخر الشهور
حاليًا انا عند اهلي وهو كذلك بسبب عدم الاستقرار المؤقت
بننتقل من مدينة لأخرى قريب إن شاء الله .
مع ذلك اشوفه كل ويكند نطلع نتمشى وناخذ لنا
اوتيل، وحريصة كل الحرص ما احسسه اني بعيدة عنه
عاطفيًا خلال هالفترة .

حياتنا ماشية الحمد لله متفاهمين وهو متعلم وواعي وانا كذلك ، صحيح انه عنيد شوي عناد الرجال
المعتاد الغير زايد عن الحد
وقادرة اتعايش مع هالشيء، اخضع واقول ما يصير خاطرك الا طيب
بدون انتقاص من شخصي الحمد لله.
وهو يلين راسه بعد ذلك ويحس بخطأه ، لانه يستحق و الله ما اشوف فيه اللؤم اللي يخليني اعانده ولا اطيب خاطره .

المشكلة ماتتعلق في زوجي بشكل مباشر قد ما هي متعلقة فيني .


أخوي مدمن ،ادمان وصل حده بمعنى اني اخاف منه
ما استبعد يتهجم علي يوم من الأيام .
علاقتي مع امي وابوي رسمية جدًا جدًا بحدود الأوامر فقط
مع اني احاول اكسر الحاجز دائمًا لكني طبيعيتي الكتومة تزيد الامر سوء
يعني ما اقدر اصرح بمشاعري السلبية لاني ماتعودت اولًا ولأن فيهم اللي مكفيهم .
وعندي اخت مطلقة ومتعبتني شوي بطريقتها صحيح انها مرت بظروف صعبة
لكنها عنيدة واولادها و الله اني امهم الثانية ومتعلقين فيني مرة لدرجة
اذا جيت اطلع مع زوجي دموع وحالة، لكنها للاسف ماعلمتهم الانضباط
يعني يسوون حركات جدًا تضايق و تزعل مرة اذا نصحتها وببالها اني صغيرة و لا اعرف عن الحياة والاولاد شيء .
يعني ممكن يخطون علي بكلمة او بشي فهي تجي تبرر لهم
المهم ما يطلعون مخطئين بنظرنا .
المهم علاقتي فيها مضطربة بسبب تنافر الطباع وهذا لا يغني اني ما احبها
احاول اداري واتغاضى وهي ع العكس تماما
ولا همني لاني مؤمنة ان الحياة كذا واحد شاد
واحد مرخي .
وفيه عند اخت قريبة مني الله يخليها نجلس سوا ونسولف
يعني الحياة مو ذاك السوء عند اهلي لكني ذكرت ابرز الامور السلبية عشان احطكم بالصورة ، ولا المقصد مو تذمر من ظروف الحياة
يارب لك الحمد في السراء والضراء ومالنا الا الصبر()

المشكلة
اني ما احس بالأمان والاستقرار ببيت أهلي طاقة سلبية غالب الوقت وخوف ، و اجاهد نفسي اني ما أتأثر .
وانا ما ودي زوجي يحس بهذا الشي ، لكني احس يبان علي
رغم اني ما اتكلم .
حتى احيانًا اشتاق له بس ما ابين اخاف يحس اني مو مرتاحة
ودايم اقوله متى نستقر واعلل الامر باني بمرحلة حمل واحتاج مؤازرة نفسية .
واحيانًا احسه يحس اذا جاء يسلم على اهلي ان وضع البيت مضطرب ، ومو مريح ، مدري بس احس يوصله هالاحساس بطريقة او باخرى ، لان في اشياء تكون ظاهرة على السطح .
اخرها امس جاء يسلم وكان الجو ممتاز بالبداية ، بعدها دخلوا الصغار وضايقوه شوي بالجلسة وكملها اخوي الله يهديه
كان جالس يضحك بلا سبب ويطلع ويدخل ويسلم كم مرة
يعني يسوي حركات مو طبيعية ، صحيح انه يدري بادمانه .
بس اول مره يطلع علينا ويشوفه كذا تنرفز وطلع ولا الومه لكن المفترض يبدي شوي تفهم انا مالي علاقة .
حاولت فيه يجلس قال خلاص المهم سلمت وبعدين انتي شايفة الوضه يساعد اجلس ؟
قلت خلاص اجلس معي شوي لو بالملحق ، رفض قال خلينا نطلع
وطلعنا .
وطول الطريق سوالف سلبية يعطينا نصائح عن تعليم الابناء الانضباط
وانه وصلي لامهم انها لازم تربيهم ، قلتله تراهم بزران
قال والصغار مايوجهون ؟ قلت الا لكن انا مالي سلطة عليهم
تكلمني ليه ؟ قال يعني ما اتكلم قلت : ما قصدت كذا لكن تكلمني بشي مالي علاقة فيه وانا مشتاقتلك بالامكان تأجيل الكلام .
استمر بإلقاء الملاحظات وسؤالي عن وضع اخوي هل بتخلونه كذا
شرحت له اني نسعى بعلاجه .
انا بصراحة طفيييت واحبطت بعد كلامه هذا وصار ودي ارجع البيت باسرع وقت
شوي كأنه حس ع دمه وقال معليه توهم صغار وكذا وظلينا ساكتين
قلتله لو ادري متنرفز ماطلعنا قال لا انتي اللي متنرفزة
مدري هذا وسيلة تهرب منه ولا انا فعلًا محملة سلبية دون ما احس .

طبعًا حصل بعدها سوء فهم بس ان شاء الله بأقدر احله بالسياسة
واحس سببه اصلًا سوء مزاجه بسبب النرفزة .

الآن سؤالي يتلخص في :
كيف اقدر احسسه ااحساس عكس الحقيقة واني مرتاحة و ومطمئنة ببيت اهلي ؟ اخاف اسوي شي ويتضح له غير ما اللي ابيه يعني ااخاف يحس اني ما صدقت اجي ببيت اهلي والشوق معدوم خصوصا ان احنا بعاد .


الامر الاخر ودي ما اعوده يقحم اهلي وظروفهم او حتى اهله في نقاشاتنا ، لانه ابدًا مو منطقي اجي اقوله ليه اختك تسوي كذا او ليه ولد اخوك يسوي كذا ؟ لان ما احد له سلطة على احد ، وليه نزعل على بعض بسبب غيرنا ؟
بس وش الطريقة ؟ هو متفهم ويجي بالنقاش الهادي لكن ودي اتجنب سوء الفهم وودي ايضًا ما احسسه اني استقعاد ولا اعدي واتغاضى فافكر أأجل الموضوع لحد مايتكرر مرة ثانية واوضح له
بس اقول لنفسي ان فيه امور تستحق التحدث ، ولازم ينحط لها خط احمر من البداية
أفيدوني بأرائكم الله ينور بصيرتكم.

شاكرة لكم الوقت اللي قضيتوه في قراءة مشكلتي
واعتذر على الإطالة ، قسمت الموضوع لكم رد تجنبًا
للملل 🌸
وأرجوا من المشرفين تعديل عنوان الموضوع حسب
ماينسب

الحمد الله زوجك ماشاء الله علية حسب كلامك انسان كويس الله يبارك لك فية
وبنسبة لمك وبوك ليش العلاقة رسمية احترامهم واجب ولكن يجب ان تدخلين
السرور على قلوبهم بضحك بمزحة بسالفة ظريفة بهدية.
بنسبة لخدتك المطلقة لا اعلم بس اتوقع الغيرة تلعب دور كبير انتي متزوجة ومبسوطة
وحامل وهي مطلق. ولكن لاتنسين نفسك من الرقية ولا تذكرين محاسن زوجك عندها

__________________
سبحان الله وبحمده سبحان الله العظيم

انتبهي زوجك يعرف نقطة ضعفك في بيت اهليك
ربما تستغل هذاي النقطة

__________________
سبحان الله وبحمده سبحان الله العظيم

اظهار امتعاظه من الصغار قل ذوق الصراحة
حاولي تتجنبي الكلا معاه عن بيت اهلك لانها خصوصيات ما لو علاقة فيها
لو تكلم علي اخوك قولي مبتلي الله يرفع عنه و مو مؤذينا بشيئ و اقطعي السالفة
ابدا لا تكلميه عن ضيقك في بيت اهلك حتي لو سالك قولي مرتاحة الحمد لله
معرفته ما راح تفيدك بشيئ هذا اذا ما ضرتك

__________________

عشان كذا انا اسأل: كيف أقدر ما أبين له ؟
وبخصوص علاقتي مع أمي وأبوي أنا احاول اصنع جو لطيف
لكن طبعهم كذا جافين ولا اقوله انتقاص او تقليل لكني أصفهم فعلًا .
لكن يبقون امي وابوي احاول اسعدهم بالكلمة الطيبة والهدية حتى
لو مو شايفة ردة فعل .
واختي تجيني افكار بهذا الخصوص لكن اتعوذ من الشيطان واحاول ماتسيطر
هالفكرة براسي وانا اصلًا طبعي كتومة فقلما اقول سلبيات او ايجابيات .


ابدًا ابدًا ما احكي معه بخصوصيات اهلي .
لكن احيانًا تتصل اختي تسأل عن امورها بالمحكمة او امي تشتكي من اخوي
فهو يحس .
فيسألني واعطيه كلام مقتضب مو تفصيل .
واحيانًا ما اجيب طاري نهائيًا لكن هو يحس اذا جاء يمر علينا ان
مافي ألفة واسنقرار .
اما بالضيقة ببيت اهلي لاتلميح ولا تصريح اقوله .
اعلل كل شوقي واحتياجي لتغيير جو البيت بالحمل، واحيانًا اكتم شغوري
الشوق الحقيقي خوفًا من انه يحس اني مو مرناحة

تتوقعين الايحاء ينفع ؟
او في طريقة اخرى احسسه اني مرتاحة
ممنوتك 🌸

بصراحة بصراحة الوضع واضح وضوح الشمس .، و اذا حاولتي حتى تغطين كله واضح أساسا .. في حالة تعليقاته على الاطفال و بما ان كلامه صحيح اول شي بوافقه فعلا ان البزر يحتاج يتوجهه و لكن هم أطفال في طور التربية و الله يعين امهم .،
و بخصوص اخوج المدمن .. و اللي إدمانه طلع بيني له انزعاجكم من الموضوع و أنكم تحاولون علاجه خصوصا من سواله واضح انه مستنتج برودكم في الموضوع .،

و بعد ما يتكلم مرة اخرى قوليله بكل جديه ابا بيت استقر فيه و إربي فيه طفلي بيني و بينك و لو سمحت استعجل فالموضوع .،


و يوم تسكنون ف بيت واحد ساعتها ابدا لا تسمحين له يدخل و لو بسؤال في اهله

__________________