السلام عليكم و رحمة الله و بركاته

عندي قريبة درجة أولى ، كانت طيبة زمان و هادية .. يمكن أنا اللي كنت أشوفها و أحسبها كذا ؟
ما أعرف إيش اللي غيرها بعد ما أنا رجعت من بريطانيا ..
و لا شكلها أخدت راحتها لما أمي المرض أكل جسمها و هد حيلها و ضعفت ..

اتوقع إنها من الناس اللي ( ساكت و سمه ناكت ) ..
و كانت من الناس اللي افترت علي ( بعد موت أمي الله يرحمها ) ..

لإنها ظاهريا تبان هادية و عاقلة و كتومة جدا ،.
و أنا ظاهرياً اجتماعية و اختلط مع الجميع و أرد على أي شي من وقته و خلاص ما يبقى شي بنفسي ..
يعني أنا أبان إني قوية ، مع إني و الله ضعيفة و غلبانة .. و هي العكس ..
فطبيعي راح يصدقوها ، اللي سمعوا لها ..

كذبت علي أكاذيب .. و المشكلة قدامهم قالت لي إنت كذا كذا عملتي ( لماما ) .. bgh
قلت لها أنا ما قلت ، و هي قدامهم عشان تثبت إنها صادقة .. تقول لي ( لا تنكري ) ..
و ألفت قصص من راسها ، لكن العيب مو منها .. من اللي يسمع و يصدق بدون ما يتأكد ..

براحتهم ، هم اللي خسرانين

.
.

المهم يكفيني كلام و شهادة أمي الله يرحمها ..
أمي قالت مرة ، ( عمري ما حسيت إنها بنتي ، تعاملني كأني ( ضرتها ) )
إذا كذا بتعامل أمها ، كيف راح تعاملني أنا ؟

.
.

الحكاية :

إنها كانت تحب تأذي زوجة خالي ( هما عايشين بمكان بعيد ) و أمي الله يرحمها زارتهم مرة ..
و كانت قريبتي تحضن خالي و تلصق فيه و تطنش زوجته بشكل مستفز ..
مع إنها تعرف إنه زوجته ( تغار عليه )
و كانت كمان تحرض أخواتي و أمي على زوجة خالي .. و لدرجة إني صدقتها ..
( عندها اسلوب الاستكانة و الإستضعاف ) <-- ماعرف صح المصطلح ؟

و لما زرت زوجة خالي ، دافعت عنها قدام أهلي بعدين و قلت لهم أي وحدة مكانها ما ترضى اللي
زوجها يعمل فيها ، يعاملها كأنها شغالة .. و وضعت نفسي بمكان زوجته و حزنت عليها فعلاً ..

قريبتي أو بالأصح أختي ، عارضتني وقتها .. و بنفسها اعترفت للكل إنها كانت تعمل حركات عشان تقهرها ،
و تلصق في خالي و تحضنه و تتمشى معاه و تطنش زوجته و زي كذا .. و كانوا كلهم يضحكوا ..
و تقول زوجته نفسها تاكلنا و تستاهل و أنا بالقصد أخليها تنقهر وووو إلخ

جات بعد موت أمي ، و جلست مع زوجة أخوي و نفس الشي عملت حركات ..
مرة أخوي وصل بينها و بين زوجها الموضوع للطلاق ،.

و كلمتني مرة أخوي وقتها لما بيتها كان خلاص بينخرب ، و قالت لي ..
دامها خربانة خربانة .. خليني أقول لك ..
إنه أنا بس راح أدعي إنه أختك تتزوج و تحس بنفس أحاسيسي و يصير لها كل اللي كانت تعمله معايا ..
( طبعا ما علقت على كلامها ، و لا قلت لأهلي عن اللي قالته )
و الحمد لله أخوي و مرته الآن وضعهم ممتاز ..

.
.

قبل كم يوم ، قريبتي أو أختي العروسة ..
^
ما أحب أقول أختي ، لإني اتضايق من نفسي كذا ..


أختي حاليا تشتكي من ( بنت أخت ) زوجها ..
و سبحان الله ، إنه زوج أختي هذا ، عمره ( نفس عمر خالي في الوقت هذاك ) ..
و بنت أخته ، عمرها نفسسسسسسسس عمر أختي بالوقت هذاك ..

أنا ما دققت بالحكاية أبدا و لا ربطت بين الحكايتين ..

لكن أول مرة أشوف أختي زي كذا .. تغار على زوجها بشكل ملفت للأنظار ..
و لدرجة ما تبغى بنت أخوه أو أخته تركب معاهم السيارة .. مع إنهم مو قاصدين يقهروها
بس تقول خلاص خليهم يبعدوا عنه ..

نصحتها طبعا ، بس ما أبغى كمان مشاكل منها و بكرة تتبلى علي و تقول خربت بيتي ..
عشان كذا ، سمعت الحكاية منها بالصدفة .. لإنها كانت تحكي لاخواتي و كانها من زمان تعاني من الشي هذا
و لإني ما أحب اتدخل ، فما عمري كنت أسألها .. و لا أتدخل ..

.
.

طيب الواحد اللي ما يرضاه على نفسه ، لا يرضاه على غيره ..

هي كانت تقهر زوجة خالي ، و مرة أخوي ..
و كل مكان تروح معاهم ..

و دحين تشتكي من أخوات زوجها و بنات أخواته ، كييييف لاصقين في زوجها ..
و لدرجة زوجها لاحظ و قالها إنت تكرهي أهلي ..

.
.

بصراحة ، اللي جاب الموضوع براسي ..
إني حبيت أواسي ( Queen ) و كل وحدة تتعرض للأذية من أخت زوجها أو قريبة زوجها ..
و إنه الدنيا دوارة ..

.
.

و أنا سلفتي ( زوجة أخو زوجي ) كانت تتعرض للأذية من أهل زوجها و أخواته قبل لا يتزوجوا ..
و تقول كنت ادعي عليهم ، و دحين لما تزوجوا و ذاقوا كيف أذية أهل الزوج ..

صاروا يقولوا لأخواتهم الصغار ، لا تضايقوا مرة أخوكم ..
نحن ندمانيين فعلا و ما حسينا غير بعد ما جربنا ..

.
.

لو كل وحدة فكرت بالطريقة هذه ..

( الدنيا راح تظل بـ خير ) ..

سبحان الله

الدنيا سلف ودين


ربك ينصر كل مظلوم

سبحان الله كما تدين تدان...الظلم عاقبته وخيمة ...جزاك الله خيراً ياروح لذكرك هذه القصةولمواساةالغالية كوين فرج الله همها وأبدله سعادةوحبوراً.

__________________
سبحان الله وبحمده..سبحان الله العظيم

قبل امي تموت الله يرحمها
كان اخوي يوقف مع اختي ضد امي .. يشوف انه امي تظلمها
مع اني شايفة تعامل اختي من وراء اخوي .. جدا قاسية على امي
و قدام اخويا .. مرررررة بريئة و ضعيفة و مسكينة

امي قالت لي ..
انا أتمنى شي واحد ..
انه مثل ما اختك ترد عليا قدّامه و تكشر في وجهي و هو ساكت و يدافع عنها ..
انه بنته تكبر و ترد على أمها ( زوجته ) قدّامه .. و يحس وقتها ..

بعد ما امي ماتت الله يرحمها ..
اخوي ما قدر يتحمل اختي عنده .. و قالي اني اكتشفت فيها طبائع غريبة مختلفة عنا !
لكن قدام زوجته ( اخوي كان مضطر يوقف في طرف اخته امام زوجته )
لكن صارحني انه اختي عملت حركات و هو اول مرة يكتشف انه فيها الطبائع هذه ..

.
.

انا اصلا ما صرت مثل زمان ..
و لا أتدخل و لا اعلق ..

لو عندي كلمة طيبة اقولها .. ماعندي شي ..
اسكت

عشان كذا اضطريت اجي اكتب هنا ..
سامحوني ..

.
.

لكن جالسة اشوف كيف الدنيا تدور !

كانت دايم تتريق على مرة اخوي انها تبغى اخوي لها و بس
و دحين هي نفس الشي مع زوجها .. تقول ليش ماعندهم اخوان و اولاد غيره !
حتى اخواتي توهم يكتشفوا انها هي الي قوية .. لانها تحرض زوجها على امه ..
و حماتها مرة ضعيفة و مريضة و طييييييبة ..

انا كانوا يحسبوني قوية .. لاني صريحة و ما اسكت لما احد يتعدى علي و يغلط علي او يجرحني ..
لكن مستحيل اظلم إنسان او أتعدى على شخص ضعيف
حتى بعد مشكلة زوجي الاخيرة

اخواتي يقولوا ( و الله اكتشفنا انه روح الطير غلبانة و متحملة أشياء كثيرة ما نقدر نتحمّل نحن ربعها )

ما اعرف ..

انا ماني متألمة لنفسي ..
احس اني الى الان .. متألمة ( لألم أمي ) الله يرحمها ..

صحيح انا مرات كنت أزعل امي مني ..
لكن ارجع اتاسف و أندم و ابكي و ادعي و استغفر ..

و ما أكون متقصدة و لا اني مخططة و لا اني امثل قدام البقية اني أعاملها كويس
و من وراهم شي تاني !

بالشهادة لما كانوا يقولوا لامي ..
ايش معنى روح الطير ما تزعلي منها و هي تعصب مرات !
امي كانت تقول .. لانه قلبها ابيض مثل الطفل و مثل أبوكم الله يرحمه
مجرد ما تخرج الي بقلبها تنسى خلاص و تسامح ..

و لما ازعلها و اخاصمها ..
ترجع تكلمني و تقلب الزعل لضحك ..
و لما اقول لها غيري الفستان هذا ما يصير تلبسيه .. ما ترد عليا و تعاندني مثلكم ..
تغيره على طول و بدون ما تتكلم ..

.
.

مو مثلكم تطنشوني كم يوم و لا تتصلوا لحد ما ادق عليكم !
و لا تقفلوا الباب على نفسكم بصوت عالي و لا تكشروا بوجهي او تردوا علي بطريقة تجرح !

.
.

ما امدح حالي ..

لكن طلعوني يوم موت امي و لسى تونا راجعين من الدفن
العاقة .. الي تكره أمها .. و الي و الي و الي !؟
و هما الملائكة.!

مع انه قبل امي تموت كانوا دايم يعلقوا و يقولوا لامي انت بس تحبيها هي ..
بعد موتها مباشرة خلوني البنت الي أمها تكرهها !

و اختي هذه أكدت لهم بحكايات من راسها .. و صدقوها اخواني
لأنهم كانوا يتعاطفوا معاها .. يحسبوا امي ما تعاملها كويس لانها ضعيفة و مسكينة
ما كانوا يشوفوا هي كيف كانت تعامل امي من وراهم ..

حتى اني كنت اقول الله يعين حماتها عليها لو تزوجت ..
تعمل نفس حركة الأفلام .. و المسلسلات !؟

.
.

المهم ..

الواحد لا يصدق اي افتراءات لحد ما يشوف بنفسه وًيتاكد

انا وقتها قلت .. مصيرهم يعرفوا بعدين ..
و انا تعلمت اني اسكت و ما اتكلم .. و اني اقلل زياراتي ..
و اني أكون شبه رسمية او حالي حال نفسي ..

سكوتي .. وقف المجال لأي شخص انه يتعدى علي ..
و ريحني كثير ..

اعتبروها فضفضة ..

او للعظة و العبرة ..
لاني شايفة الي عانته زوجة اخوي منها .. دحين بيرجع لها

مو شماتة ..
لكن بالصدفة كنت معاهم و اسمع حكاوي نفس الي كانت تعمله هي لزوجة خالي
لكن الامر حاليا معكوس .. متضايقة هي ليش زوجها يدلع بنت اخته !
و تحاول تتخلص منها باي طريقة ..

فعلا الدنيا دواره
يارب اشوف يوم في من ظلمني وخرب حياتي
بس ابغاها تعيش الوضع اللي كنت عايشته وتحس بالألم والنكد والحرمان اللي شفته
من جد استغرب فيه ناس تنسى انه فيه حساب وعقاب وجنه ونار همها الوحيد كيف تقهر وتتهم وتخطط بس كيف تخرب حياة انسانه مسلمه
حسبي الله ونعم الوكيل على كل ظالم

الله ينصر كل مظلوم

روح الطير حبيبتي الله يرحم امك ويعينك

احس فيك والألم اللي بداخلك كل آنسان يتمنى عيلته قلوبها ع بعض

وتحب بعض ،،ومافي اخت بالعالم تتمنى اختها تتمرد على احد


اختك الله يهديها شخصيه استفزازية تبي كل شي لصالحها ولايهمها غيرها

بالعكس تكون سعيدة لو ضايقت الناس وخربت حياتهم ،،نست ان الحياة كما تُدبن تُدان


انا يوم اني بنت آخاف اتصرف قدام اخوي موقف تفهمه زوجته بشكل خاطىء مع اني انعامل مع اخوي

بآحترام فقط ،،مابيننا ميانه ..حتى اذا احتجت اطلع او شي بالنادر اطلب منه

والحمد لله رب العالمين اتمنى اني م ضايقتها والله يسامحني لو صدرت مني تصرفات او كلمات عفوية اثارت غيرتها


ولا احب احد يضايقني ف شي من هالقبيل !

__________________




ربِ هب لي من لدنك ذرية طيبة أنك سميع الدعاء

الله يرحم امك ياروح ويغفر لها ويرحم موتانا وموتى المسلمين
فعلا الدنيا سلف ودين كما تدين تدان

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه