السلام عليكم..أنا انخطبت الأسبوع الماضي..وكنت خايفة من النظرة إني ماأرتاح لخطيبي..وكانت النظرة يوم الأربعائ..بس تصدقون أول ماشفته حسيت براحة كبيرة مع إني مو أول مرة أنخطب ومو أول مرة تمر علي نظرةشرعية..بس هذا أحسه غير..مع إن شكله عادي..بس حسيت براحة وأمان لدرجة إني مابغيته يقوم..وأول ماقام بيطلع حسيت بضيقه..بس فديته قبل يطلع أعطاني هديةوقال هذي هديةالنظرة..أسلوبه في الكلام حلو..أول مادخلت عليه قال بسم الله ماشاءالله..وبعدها جلسنا وقعد يتكلم وقال أنا أبي انسانةتشاركني حياتي وأنا حاضرة بأي شي تبينه..طبعا أنا مدرسة وأول ماكلموني عنه قالو لي إنه يبي مدرسة..طبعا هالشي خوفني قلت هذا شكله متشرط..بس لما قالي في النظرة أنا أدور مدرسة عشان تكون فاهمة ومتعلمة أرتحت..طبعا سألني إذا عندي شروط وحنا جالسين قلت له طيب أنا دوامي بجدة لأن هو بالرياض قال ولايهمك فروع شركتنا بداخل السعودية وخارجها وأقدر أنقل جدة أو خارجها..وهالكلام ريحني أكثر..سؤالي:هل تعتقدون إن خطيبي ارتاح لي ودخلت قلبه مثل ماأنا ارتحت له ودخل قلبي؟؟وهل تعتقدون إنه يفكر فيني طول الوقت زي ماأنا مشغول فكري فيه طول وقتي؟؟جاوبني ياشباب ويابنات من خلال تجاربكم..بإنتظاركم

مدري
ان شاء الله ربي يكتب لك اللي فيه الخير

بناء على كلامه وأسألته يبدو أنه مرتاح لك، الله يوفقكم ويكتب اللي فيه خير لكم، ولا تنسين صلاة الأستخارة.

__________________
ياصبحِ لاتِقبل !!
عط الليل من وقتك..

ربي يوفقك بس تصدقون بسرعة كلام الرجال
قولي أنا مدرسة ولله الحمد بس قررت أتفرغ لك ولأطفالي مستقبلا وبقدم استقالة
وتعالي شوفي انقلاب الموازين ووالله مو نفاق لكن أكثر البنات يصدقون الكلام بسرعة

الله يووفقك و يرزقك


بس صرآحه انا بكون صريح معك مسألة ابي مدرسه لانها متفهمه ومثقفه مادخلت مزاجي

الثقافه و الفهم في الغالبيه بالعكس المدرسه بتكون مو متفرغه او ان صح التعبير الموظفه


اما انه دخل قلبك و دخلتي قلبه فهذا يرجع لك و لا تحكمي و لا تردي الا بعد اسبوعين شوفي لا تفكرين هذي طريقه قلتها لاختي الله يحفظها و يآك

قلت لا تفكرين فيه هاالايام بالمستقبل استخيري وتذكري ملامح وجهه ان بقت في بالك ماراحت الاسبوعين هذي فمعناته فعلا ً دخل قلبك لان النظره الاولى و الحوار يكون له مفعول 5 ايام بعدين يفترر ولا نقوول انها نظريه معمول بهآ

ولا هي مهمه لكن الاهم انك تفهمينه رغبتك بوظيفتك و كيف بتكوني منشغله و ترجعي تعبانه اكثر طلاق بعايلتنا مدرسات للاسف اللي مطلع قرض ع ظهرها و اللي مصاريف البيت و الشغاله عليها ما ادري هالنوع من الرجال مايفهم ان وراه يوم حسآب

فما اوصيك اللي اوله شرط اخره نور و الله ينور عليك طريقك و يرزقك من اوسع ابوآبه

بس عجبتني هديه النظره هههه اول مره اسمعهآ

موفقه

__________________
عندمـآ أنتهيـت من بنآء سـفينـتي ،،، جــف البحــر

الله يهديك أخوي أشققتَ عن قلبه ؟ أسمح لي ردك هذا أسميه خراب بيوت حتى لو كنت محسن النية، ماذا لو صدقت البنت كلامك وآتاها الشيطان وقال أنك كلام إنسان رحيم صحيح، ويدخلها الظنون ثم المشاكل، لا ننكر أن هناك أناس أستغلاليين، ولكن أيضاً هناك أناس ليس هدفهم وتفكيرهم راتب المدرسة.

إن كان من نصحية حبذا لو تواصلتي مع خطيبك قبل أن تتم كتابة العقد لاكتشاف شخصيته وعقليته، ومن خلالها تتعرفين عن أبعاد تفكيره، لكن حاولي أن يكون أكتشافك لشخصيته ليس لهدف أنه يريدك كونك مدرسة أو لا إنما لاكتشاف شخصيته ومدى ارتياحك له، فالشخص يبان معدنه مع الوقت.

__________________
ياصبحِ لاتِقبل !!
عط الليل من وقتك..

بصراحة يا جماعة
حتى انا كلمة اريد مدرسة ما دخلت راسي
وقال عندي استعداد انقل شغلي لجده عشان وظيفتك


الله يوفق الجميع ويعطي كل واحد على قد نيته

يا بنت الحلال دامك ارتحتي و طلع زوين
وشوله تنزلين موضوع و توسوسين عمرك
شوفي عاد خربطوك عيال الحلال
خلك ع الاستخارة و اتركيك من وصخ الدنيا
مافي شي يسوى جنب واحد ولد حلال يخاويك العمر كله بالطيب
موفقة يا قمر

__________________

‏
الوعي هو الملاذ ..

أستغفر الله العظيم ؛
( الفردوس غايتي )

جزا الله خير كل من رد علي..بس في نقطة نسيت اقولها..الوالد شرط على الخاطب إن راتب البنت لها وهذا شرط راح يتسجل بالعقد..وأيضآ الخاطب قال هالكلام لي قال راتبك لك ماأبي منه ولاريال..وهالشيء طمني..أعرف إن في رجال طماعين وهمهم الفلوس بس أتوقع لو كان هذا طماع مارضى بشرط الوالد وماعاد وكرر لي نفس الشرط..ولا وش رأيكم؟

اسمعي كلام الاخت و استخيري و تفاهمي معه من بدري هذا الاهم ع الامور الاساسيه و كيف راح يكون وضعكم

انا فكرت في كلامك وان صدق الرجل فأنا اظن فيه خير وبإذن الله انك موفقه



ونحن الاصل في مشورتنا احسان الظن لكن نأخذ بأسوء الاحتمالات حتى لا تقعي فيهآ مستقبلا ً

الله يوفقك

__________________
عندمـآ أنتهيـت من بنآء سـفينـتي ،،، جــف البحــر