السلام عليكم ورحمة الله وبركاته

اخواني اخواني ليس لي بعد الله سواكم
ارجووكم انصحوني
زوجي الحمدلله طيب معي ويحبني لكم مشكلتي معه هي المصروف الشخصي لي 11 سنه متزوجه
مايعطيني الا في المناسبات عيد او عند ذهابنا الى اهلنا في المدينه الاخرى
ونحن لانذهب الا 3 مرات في السنه تقريبا ولدي ولدين
زوجي راتبه تقريبا 7000 ريال
ونحن نسكن بالاجار ولديه مصاريف اخرى
لكن اخوتي والله العظيم انا نفسيتي تعبت واحس اني بديت اكرهه
تعرفون حاجة المرأة للمال كل حياتها تعتمد على الماده في علاقتها مع الناس وعلاقتها مع زوجها
تحتاج ملابس وعطور وكماليات اخرى
اكتب لكم والحسرة داخلي لا اعرف ماذا افعل والله العظيم حتى الراتبين الدبل اللي امر فيها الملك
جاته 9800 كلها سدد فيها الديون ما اعطاني ولا ريال الا300 ملابس لابنائه
ووعدني هذا الشهر يعطيني 1000 تعويضا لي على مافات لكن تفاجأ بوقت بتسديد رسوم الجامعه
واعتذر ...
المشكله ان هذا الشهر راح تزورنا امه وتقيم عندنا لمدة شهر تقريبا وهي امرأه انيقة وتلاحظ كل شيء
وتنتقد الانسان على مظهره
انا احبها جدااا واسعد بها لكن ظروفي الماديه تضايقني جدا واخاف تاثر علي نفسيتي في استقبالها
طلبت من زوجي ان يعطيني فقط 300 ريال امشي حالي فيها لكن اعتذر ويقول والله ما استطيع ..
والله انا اعرف ان ظروفه صعبه لكن حتى انا ظروفي صعبه ليه مايلتمس لي العذر مثل ما التمس له العذر ..
انا غلطت ماعودته يدفع لي مصروف شخصي من البدااايه وربي ندمانه
بس ابغى نصايحكم كيف اوصله اللي في نفسي من غير ما اجرحه او ازعله وكيف احسسه باهميه المال بالنسبه للزوجه حتى في اسعاد زوجها ..
هذا بالاضافه الا انا التسوق ولو بالمال القليل جدا جدا يسعدني ويسرني كثيرا وتتغير نفسيتي الى الافضل
اذا ذهبت الى السوق خاصه واننا مغتربون ونسكن منطقه لايوجد بها اماكن ترفيهيه الا الاسواق ..
ودعواتكم لي بالوظيفة والرزق الحلال الذي يغنيني عن اي كان ..

اعانكـ الله وأعان الله زوجكـ على أنهاء ألتزماته الماديه
اختي
الرجل منا مايرتاح ولا تغفاله عين دام فيه دين عليه حتى اوقات الأكل
عندما يجلس على سفرة الطعام وتذكر الديون المتراكمه عليه تنسد النفس
ليس لي خبره الكفايه لآقول لكي ماذا تفعلين ولكن أعتقد أن الصبر على الوضع الحالي
إلى أن يتعدل بإذن الله . لآنه مستحيل راح تبقى الديون لمدة طويلة ولكن عندما تصبرين
على وضع زوجكـ المادي الصعب تأكدي لن ينساهـ فقد وقفتي معه بالحلوه والمره
وهذي الحياة موب دايم حلوهـ ,, الله يوفقكم ويسعدكم ويهديكم لبعض ,

أنا شايف إنك تطلبي منه مباشرة تخصيص مبلغ شهري لك يكون من حقك تتصرفي فيه كما تشائين وليس في ذلك حرج.. حاولي بطريقه أو بأخرى تفهميه بأن هنالك خصوصيات تحتاجين إليها وهذا المبلغ هو خير معين لك بل انك لن تنحرجي بشراء شيء في نفسك بدل سؤاله كل مرة .. يا أختي أنا شايف من الذوق تخصيص مبلغ شهري ولو يسير للزوجة من راتب زوجها .. ما عليك إلا اختيار الوقت المناسب لنيل غايتك ..
وفقك الله ..

الله يجزاااك الجنه اخي الكريم
صادق اخوي في كل اللي قلته
بس والله انا تحملت وصبرت كثيرا
وحتى انا لي حقوووق

انا هذا اللي اطلبه مبلغ شهري وقلت له بس ابغى 300 ريال وقال خلاص
لكن كل شهرر يطلع لي بدووون وربي كرهت حيااتي

ياعمري اصبري لما يخلص زوجك دينه 300 بالشهر زين لما يخلص دينه انشاء الله بيعطيكي 3000 بالشهر بس اصبري انا والله مثلك صابره كل هالسنين والحمدلله الله فرجها اخيرا
ودائما ادعي ربك انه يرزقه رزق حلال بكل صلاه

أسأل الله أن يرزق زوجك الرزق الحلال ,,
ادعي له بالتوفيق ,, وتحدثي معه بالأسلوب عن حاجتك للمال ,, و300 ريال لن تؤثر كثيراً بإذن الله تعالى ,, عليكِ فقط بالدعاء له ,, وهو إن شاء الله ما دام يحبك سوف يحاول أن يسعدك قدر ما يستطيع مالم تكن ظروفه صعبة جداً ,, والله المستعان ,,

طيب انتي روحي معه للسوق وادخلي المحل وخدي الي يعجبك وروحي عند الكاشير وقتها بيحاسب..مايقدر يقول شي امام المحاسب

لاتطلبين فلوس في يدك...سوي مثل ماقلتلك ادخلي المحل على اساس تتفرجين وخدي الي يعجبك وخليه يحاسب..ترى بعض الازواج حتى لوعنده يقول ماعندي لانه مو متعود انك تشترين ومو متعوديصرف في غير المناسبات

وبخصوص زيارة امه. فهميه انك ماعندك شي تستقبلين امه فيه..روحي لاي محل اشتري ملابس للبيت وبجايم للنوم انيقه وحلوه.وروحي السوبر ماركت وخدي اغراض عشان تتفننين في الطبخ خصوصا الحلى..ماتكلفك حتى 500 ريال ومو معقوله ماعنده 500 ريال ابد..
اضغطي عليه عشان يحس باهمية هذا الشي مو تطلبين مره وحده وتسكتين

__________________
أكبر مشكله.........

لاصرت عارف بالحقيقه وساكت..ماتبي<< تحرج >>بعض الوجيه بسود افعالها

لاتطلبين مبلغ شهري..لان مو كل شهر انتي بتحتاجين اغراض

قوليله خلاص ماابي مصروف شهري..بس كل مااحتجت غرض تنزلني السوق.

__________________
أكبر مشكله.........

لاصرت عارف بالحقيقه وساكت..ماتبي<< تحرج >>بعض الوجيه بسود افعالها

مشكورة اختي علي الموضوع ..
فقد نبهتني لامر لم اكن اعرفه او انتبه اليه و هو اهمية المصروف الشخصي للزوجة ..
و لكن وددت اختي ان اعلم منك كيف توزعون المال علي متطلبات الحياة ؟؟
فراتب زوجك 7000 كيف تنفقونها ؟؟ فقد لاحظت شكوتك من ضيق ذات اليد .. و ما اعلمه ان هذا الراتب جيد و يكفي للحياة بشكل كريم و زيادة ..