اولا اعتذر ان كان موضوعي في المكان الغير مناسب
ااخواني االاعزاء في هذا منتدى الجميل
انا باذن الله نويت اني اخطب بعد صراعات داخليه بين اقبال واحجام على مساله الزواج
وتكلمت مرره عن مواصفات المخطوبه اللي ابغاها فقالو لي الاهل وبكل تشدد
بان لا اتشترط في المواصفات !!!!!!
فانا بصراحه اخشى هذه اللحظه عندما يقولو لي حصلنا لك وحده
وعند النظره الشرعيه اخاف مايعجبني جمالها ولا ماارتاح لها اانا اوكد لهم دايما ان يكونو ناس طيبين
وايضا اوكد لهم ان تكون على قدر كبير من الجمال ومدري عن ذوق الحريم لمن يحددو انها جميله او لا

و ادعو دايما في صلاتي وبكل حرقه ان يرزقني الزوجه الصالحه الجميله

وسوالي لكم اعزائي اليس من حقي ان اشترط بعض هذه المواصفات اللي يتمناها أي شاب في شريكة حياته
وهل يحق لي الرفض عند شعوري بعدم الراحه ( لاسمح الله ) والمضي مجددا بالبحث عن اخرى ولا القبول على مضض بان الاحوال ممكن تتغير بعد التعارف ؟؟؟
بمعني اخر هل الشعور بالراحه او عدمها هي المحرك في القبول او الرفض للمخطوبه او لا ؟؟؟

لانه بصراحه ابغا وحده تملي عيني وحياتي ولا انظر الى غيرها
مو زي بعض اصحابي المتزوجين واستغرب منهم بعض الحركات والنظرات الى فتيات اخريات
موضوع من فتره شاغلني وحاابب اعرف ارائكم ومشورتكم
بس بالراحه علينا

يا اخي الكريم : من حقك ان تشترط الجمال في زوجتك ، وتشترط غيره ، واختيار الزوجة امر ليس بالسهل ، لكن غالبا الذي نراه ان الذي يتشرط ويصعب امر اختيار الزوجة لا يوفقك بزوجة جميلة ، وإن وفق بأن تكون جميلة كم يريد سبحان الله يجد انها ينقصها امور مهمة لا بد ان تتوفر في الزوجة الصالحة كنوع من الابتلاء والكمال لله سبحانه كما تعلم.
وإجابة على سؤالك ، لا توافق على الزواج من اي فتاة الا لما ترتاح انت وتستخير في رفضك لها، لا توافق ابدا بالزواج من اي فتاة موافقة على مضض ، لاتجامل على حساب اي احد .
نصيحتي لك ، مشاهدة مقاطع في اليوتيوب للدكتور طارق الحبيب في برنامج النفس والحياة و(اختيار شريك الحياة )وغيرها من المواضيع المهمة في الحياة الزوجية .
الله يوفقك ويسخر لك الزوجة الصاحة الجميلة، وقريبا إن شاء الله تبشرنا بذلك

اخي(حنون بطبعي ) بنسبه لاختيارك بنت الحلال هذا امر كل الناس تعمله وكل الشباب و البنات يتمنو نفس الشي بس ياخي كل المواصفات إلي في عقولنا بذات شباب ها اليوم ما باقي ما يقول ابيها فل كامل جنوط قير تماتيك لاتزعل مني هذا إلي حاصل انت ركز على الاهم مثل اول شي
قبل كل شي الدين و الاخلاق واواوا اما بنسبه للحاجات العاديه لازم تكون انفها طويله او او او اسمع مني خذ إلي تشوفه الاهم وصدقني راح تسعد معاها لانه رب العالمين يربط قلب الزوجه والزوج يجعل بينهم حب و موده وكل شي.
انت تقدم بس خلينا نفرح فيك بس لا تنسى تعزمنا امن الحين احذرك انا اول المعازيم من غير ما تدعيني هههههه
((الله يوفقك ويعطيك الزوجه إلي في بالك ويخليها تموت فيك وتموت فيها))
قووووولوووو آآآآآآآآآآمممممممييييييييننننننن يارب

__________________

بالعكس
أنا ضد صد شروط الشاب
هذي حياة وشراكة عمر
ليش الناس تتعب بتنقي السيارة والبيت والحي والزوجة مايحق له يتشرط
وبالنسبة للمواصفات فالمشكلة أنه فعلا أحيانا مواصفات الرجال غير عن مواصفات الحريم
لكن الأسلم لك لما يذكرون لك وحدة أسأل بتحديد عن اللي تبي قبل لاتخطب

والنظرة الشرعية عادي كثير ناس ينسحبون
بالخطبة قبل لا أحد يدري ولابعد الزواج

انت تذكرني في اخوي لما كان يخطب ويقول انا ابي وحده شبه بريتني سبيرز هههههههههههههههههههههههههه
المهم بعد مااهلي شافوا بنت وراح شافها وقسم بالله خق ! يقول احلى بنت في الوجود
يعني لما تشوف بنت ترتاااح وتحس هذي اللي ابيها لانه بعد شهرين من الزواج تسير تشوفها زي اختك شيء عادي من ضمن الاشياء المعتاده
اما اصحابك اللي يناظرون فكل الرجال والحريم كذا انا اذا شفت ولد حلو في الشارع اطالع فهم نفس الحاله !
ودايم تذكر ان الانسانه اللي بتتزوجها مو شكل قد ماهو تفاهم واخلاق اعرف بنات حلواات لكن الاخلاق =0

من حقك ترضى ومن حقك ترفض كل واحد ولو شروط لاكن لاتتشرط كتيير>>>> خليك وسط وحط ببالك اهم شي جمال الروح لانو الشي الوحيد اللي حيجلس

ياما بنات حلوات واخلاقهم صفففر

وياما جمال على قدهم واخلاقهم ما شاء الله رووعه

والله يرزقك وحده على قد نياتك وترتاحلها وتسعدك يارب

اشكرك على المداخله وباذن الله راح ابحث عن هذا الفيديو للدكتور طارق الحبيب

شي اكيد انها ماراح تكون فل كامل على كلامك لانه مافي احد كامل
انا معكم انه الاخلاق او الدين اهم من كل شي
لكن انا اللي محيرني انه من البساطه انه يسالون عني بكل سهوله
لكن كيف انا اعرف انه هذا البيت اهل دين وخلق
الله يسمع منكم اللهم امين

أخي الفاضل
إن وجدت ارتياحاً عقلياً لها، وارتياحاً نفسياً، وقبولاً للشكل مع صلاة الاستخارة
فهذا هو مفتاح القبول لهذا الأمر.
والعكس صحيح
:::
يحق لك أن تشترط ما تريد، وفي المقابل تذكر أنه لا يوجد كمال بشري لأن الكمال انفرد به الرحمن عزوجل، ثم عليك أن تغلب صفة على صفة أخرى فلن تأتيك امرأة من الحور العين ونفس الكلام ينطبق على الرجال.
وهناك صفات أساسية وهناك ثانوية وهذه تعتمد على وجهة نظرك. وتذكر أن مقاييس الجمال والأذواق تختلف من إنسان لآخر فما تراه انت جميلاً يراه الآخر قبيحاً وهكذا.
اعمل مقارنة بين الصفات فإن وجدت عيباً لا يؤثر على الحياة أو عليك ويمكن التغاضي عنه فلا بأس.
وأنت أعلم بشؤونك.
:::
همسة: لا تقدم حتى تجد ارتياحاً للأمور التي ذكرتها لك أعلاه

كلامك جميل
واسمحو لي اقولكم انه مرات لمن اقول على وحده شفتها في التلفزيون انها حلوة
يردو علي خواتي ويقولون من زينها وعععععععععع
من جد معايير الجمال عند الحريم تختلف عن الرجال
اشكرك مره اخرى على المداخله