بسم الله الرحمن الرحيم
السلام عليكم ورحمة الله وبركاته

أخواني أخواتي كنت جالسه اتصفح النت ولقيت منتداكم
وأعجبني كثيرا ، من زمان نفسي ألاقي أحد يسمعني وينصحني لأني نعبت من مواقع الإستشارات النفسيه
ما يردون على أحد من كثر الزحمه عندهم

ما أبي اطول عليكم بس أرجوكم لا تبخلون علي بإرائكم ونصحكم لأني عندي أمل ألاقي أحد يسمعني
ويفهم مشكلتي

مشكلتي بإختصار بعد ما خلصت الجامعه تزوجت من رجل ما يقرب لي يعني من بعيد وبداية زواجي كنت
كنت مبسوطه وسعيدة جدا ، ومع الوقت أكتشفت أن زوجي مدمن ولكن أكتشفت متأخره بعد ما حملت
وجبت ولد، يشهد الله حاولت معاه أنه يترك الإدمان وتحملت الإهانات والضرب بس للأسف كان حاله
للأسوء مو للأحسن ، وصرت أخاف على نفسي لأنه يجمع أصحابه ويسهرون معاه وكنت اموت من الخوف
إذا جو أصحابه ، في الأخير ذهبت لأهلي ورفضت الرجوع له ،لأني والله العظيم خفت على نفسي وعلى
أبني ، طبعا أهلي لمن عرفوا أنه مدمن رفضوا يرجعوني له ، وطلبوا منه الطلاق وحصل
طبعا أبني كان معايه في حضانتي ولا طالب فيه أبوه ولا سأل عنه ،

طبعا بعد الطلاق عشت حاله نفسيه صعبه جدا أنتوا عارفين مجتمعنا ونظرتهم للمطلقه
ما يرحمون أحد لا بكلامهم ولا بنظراتهم أعنزلت الناس وصار خروجي قليل جدا
من المنزل،ولكن أنا عندي أخوان أكبر مني وجميعهم متزوجين، في أول أيام طلاقي
كانوا يعطفون علي أنا وأبني ودائما يأخذونا معاهم في كل مكان ولكن بدأوا زوجاتهم في التذمر
مني ومن أبني طبعا أمي وأبوي موجودين لكنهم كبار في السن وأبوي ما يقود السيارة
وأمي ما تحب الخروج عشان كذا أخواني دائما يمروني أروح معاهم لكن زوجاتهم كانوا يكرهوني
وفي الأخير صرنا أنا وابني لا نخرج ولا نروح مع أحد إتقاء للمشاكل وأنا بطبعي أنسانه ما أحب المشاكل
وأكرهها طبعا عشنا في عزلة أنا وأبني لانطلع ولا نخرج أبدا
في هذي الفترة تقدم لي الكثير ورفضتهم عشان أبني ،ولكن بدأوا إخواني يضغطون عليه عشان أتزوج
وكذلك أمي وأبي رفضت بقوة لكن للأسف قدروا أخواني يأثرون على امي وأبي عشان أتزوج
ألحوا أمي وأبي علي بالزواج وخاصة أن المتقدم لي هذه المره على قولتهم ( لقطة ما يتفوت )
وهو يقرب لي وأيضا هو شاب لم يسبق له الزواج وعمره من عمري وعارف ظروفي وراضي بي
وأُجبرت في الاخير
على القبول رضاء لأمي وأبي، وتكفلوا أهلي بأبني وقالوا لي أتركيه عندنا وإحنا نربيه ولا تخافي عليه نحطه في عيوننا

وحتى العريس نفسه قال أنه ما راح يتضايق منه وراح يعتربه أبنه ( أنا هنا أرتحت بعض الشئ ) واستخرت
الله عز وجل ووافقت على الزواج منه
أنا الحين متزوجه لي سنه وكل شي تغير أهلي تخلوا عن أبني وسلموه لأهل أبوه وقالوا اهله أولى أنهم
يربونه إحنا مو ملزومين فيه ( هذا طبعا كله من اخواني وزوجاتهم ) وحسيت وقتها بحرقة في قلبي مو راضيه تروح أبد،

وأنا مشكلتي مع زوجي الآن أنني أكرهه
وما أحبه والله حاولت أحبه وأتعود عليه بس ما قدرت لان معاملته لي جافة جدا (عايش في زمان جدي وجدتي) عقليته جدا رجعيه وقلبه قاسي لا يظهر لي الحب والمودة أبدا مع أني ما أقصر معاه في شي
والله العظيم تعبت من هذي الدنيا
أولا :حاسه بندم وغصة في قلبي لأني تركت أبني وصدقت كلام أخواني وبُعد أبني مأثر علي جدا
دائما حزينه ودموعي على خدي
ثانيا: أكره زوجي جدا جدا جدا لأن توقعته الإنسان اللي بيمسح دمعتي وبيخفف عني حزني إعتبرته حبل
النجاة اللي بيرفعني ويبعدني عن حياة الهم والالم ولكن للأسف قطع الحبل اللي كنت ماسكته
والله أنا الحين أكتب ودموعي ما تتوقف مقهورة على أبني اللي تخليت عنه
ومو عارفه ايش أسوي ،ودي أرجع أبني لحظني بس كيف

كرهت كل شي في ذي الدنيا ولا أبي منها شي، ما أبي غير ولدي يرجع لحظني ، خايفه عليه يضيعونه
أهل أبوه زي ما ضيعوا أبوه

تكفون ساعدوني ايش أشوي؟؟؟؟؟

وأعتذر على الإطالة
وشكرا

ماادري والله ايش اقولك مااملك الا الدعاء لك الله يفرج همك ويرد ابنك لحضنك بس تذكري معاملة اخوانك وانت مطلقة ونظرت الناس لك احساسك بالذنب ببعد ابنك عنك هو الي مسوي فيك كدة حاولي تتحملي حياتك كدة احسن ومالي الا الدعاء لك ربي يصبلرك حبيبتي وان شاء الله الاعضاء يفيدونك

__________________

طيب الحين ماحملتى من زوجك الحالى؟
ممكن لو حملتى منه راح يتغير معك
حاولى تسترجعى ابنك وتخليه يعيش معك

واسال الله لك الفرج العاجل

اكثرى من الاستغفار

__________________

اختي
يمكن تكون نصحيتي غريبة

خذي ابنك عندك..في بيت زوجك.. واذا رضى زوجك كان بها.... واذا مارضى خليه يسوي اللي يبي... خصوصاً انك تكرهينه

الزوج يتعوض والا الابن مايتعوض

يسر الله امورك

طيب ماتقولين ان زوجك ما عنده مشكلة بابنك طيب جيبيه عندك . يا اختي مدام اخوانك اقنعوك بان تتزوجي بسبب تاثير زوجاتهم عليهم فصعب انك ترجعي لهم مره ثاني نصيحه

حبيبتي الله يجبر كسري وكسرك في ولدك...

ولك الحل ياطويلة العمر بس يبغالك تصملين علية وترا الولد من حقك يا قمر الله يرده لك سالم غانم يارب..

صحيح ان الام ان تزوجت صارت الحضانه للاب لكن بحالة زوجك واهماله فماله حق بضم الولد وبامكانك ترجعين ولدك لحضنك عن طريق المحكمة ان مارضيوا يعطونك اياه ...ونصيحه مني ترا اللي مايساعد نفسه ماحد يساعده..ولاتقولي ماني قادره على المحاكم..والله انا منك اصير مو قويه إلا اصير وحش عليهم إلين ارجع ولدي لحظني...

شوفي انا الان عندي بنت وزوجي من اشباه الرجال <<< مو رجال بالاساس لكنه علمني كيف اصير قوية عين ولله الحمد لكن بالحق...دايم يهددني انه يحرمني من بنتي وانا لما تزاعلنا ورحت بيت اهلي مافكرت احرمه من بنته...

واخوانك هذول واخواني وكل من يتقدر عليكي حسابهم على رب مايضيع من خلق..

وربي حسيت كل كلمة قلتيها ..الله يجبرك الله يجبرك الله يجبرك

اللهم ياجامع الناس ليوم لاريب فيه رد عليها ضالتها...
اللهم ياجامع الناس ليوم لاريب فيه رد عليها ضالتها
اللهم ياجامع الناس ليوم لاريب فيه رد على اختي "وحيدة حزينة" ضالتها..

اللهم سكن قلبها برجعته لحضنها..
اللهم افرغ عليها صبرا وثبت اقدامها وانصرها على القوم الكافرين...

>>>>>> اوصيكي من مكاني هذا وانتي بمكانك وين ماكنتي انك تطمئني بان الله لايرضى بالظلم وانه ناصرك عليهم كلهم ....وعسى الله يحنن قلب زوجك لك ويجعلك اجمل النساء بعينة ويستر عنه عيوبك..

ماتدرين قد ايش انا وحيده وحزينه زيك لكن قوة الله فوق كل قوة وقدرته سبحانه فوق كل قدره...

ولايهمك احد.....تشجعي وطالبي بولدك ولاعليك من احد دام الله معاكي ولا تخافي من احد ترا المكتوب بيد الله وحده ولاحد بيقدم لك خير الابإذن الله وصدقيني انتي اقوى منهم بالله ...الله ينصرني وينصرك...

قلبي معاكي.......................طمنيني وش يصير معاكي بعدين...


ام دانة

انتي ماتخليتي عن ولدك الظروف اجبرتج على الزواج مرة ثانية
مااقول غير اللة يردلج ولدك ويصبرج على حالج واللة قلبي معاج

وعليكم السلام ورحمة الله وبركاته

اوخيتاه الهمك الله اصبر في بعد ابنك

نصيحتي لك ان تهتمي في نفسك وزوجك وكرهك لزوجك احساسك انه هو سبب تفريقك بينك وبين ابنك

وابنك ان طال الزمن او قصر يرجع لك وثاني شئ احمدي ربك انه عند اهله وصدقيني انه يبون يهتمون فيه

ويربونه احسن تربيه بس انتي ادعي له بصلاح اما مسألت انه يربونه مثل تربيتهم لبوه مافيه احد ما يبي لابنه الخير

ولكن الهدايه في يد العزيز واسال الله له الهدايه ويصلح شأنه

اما سبب جفاء زوجك اسبب انتي لانك دايم مهمومه وحزينه قدامه ومهملته عاطفين اهتمي فيه وحسسيه بالحب وهذا

من حقه وانه مافي الدنياء غيره يشغلك وشيلي الهم من قلبك وعيشي حياتك (ضل رجال ولا ضل حيطه

بسه يبيله هتمام منك واحمدي ربك انه انتي الوحيده في حياته واخرجك من اذل والعزله ونظرة المجتمع نصيحتي انتبهي

لنفسك ولزوجك ومسالت انه عايش زمن جده هذا شئ لا يعيبه انه متمسك في العدات وتقاليد ونتي مع مرور الوقت

تبين تسطرين عل مشاعره وتغيريه ونتي وشطارتك بس بالحب وتفاهم والحوار الهادي وتشغيل الرمونسيه ما فيه

رجال الا يحب التغير وشوفي تبين تسمعين من الاكلام الحلو لين تملين الله يتمم عليكم السعاده والمحبه

بس لاتجعلين تفكيرك في ابنك يدمر حياتك باذن الله يبي يكبر ويتزوج ويشوف حياته ان كان عندك او عند غيرك اقر الله عينك

في شوفته وملي فوادك في قربه

بس انتي عجلي جيبي اشغلي نفسك فيه الدنياء تمضي بما كتب الله لنا

والله فيه حريم ضحن لجل ابناهن وما تزوجن بالخير تزوجو وراحو وراء زوجاتهم وهي لا حولها ولا حوليها
__________________

__________________

أختي أم لؤي 34 مشكوره على الدعاء الله يسمع منك
ويحقق لك أمنياتك.
___________

المحبة للأستغفار مشكوره عالمرور
أنا للحين ما حملت من زوجي لاني خايفه أحمل ويصير فيني زي ماصار
المره الأولى وايش ذنبهم الأطفال كفايه غربلة أبني الوحيد
أنا قلت أول بشوف معاملته لي تتغير ولا لأ وبعدين أفكر في الحمل
_____________

واثق الخطوة مشكور أخي على النصيحه
وهذا اللي جالسه فكر فيه بس وين أعيش أنا وابني
لو رجعت لأهلي ما راح يتركوني إخواني في حالي
ولو جلست عند زوجي ما راح أقدر أرجع أبني
لأن الحضانه سقطت بزواجي
___________

ريـــو المشكله إن زوجي موراضي يوقف معايه
ويساعدني يقول خلي الولد عند أهله أحسن له هم يربونه
وبعدين أحس كلامه تغير بعد الزواج صار يغار من ولدي وما يحبه
يعامله بقسوة وجفا
مشكوره عالمرور الله يحقق لك أمانيك
___________

أم دانه مشكوره يالغاليه على الدعاء
الله يحقق لك اللي تتمننينه في الدنيا وفي الأخرة
بس كيف أقدر أرجع ابني لحضانتي
بمجرد زواجي تسقط عني الحضانه
وللأسف ما أحد بيوقف معايه في المحاكم
لا زوجي ولا أهلي
إذا تعرفين حل قولي لي
طيب أقدر أتواصل مع المحكمه بالتلفون
واذا قلت إن طليقي ليس أهل لحضانة أبني
بيقولون لي أثبتي هذا الشئ كيف أثبت
تكفين ساعديني إذا تعرفين
والله يفرج همك ويسعدك يارب
__________

أم فهد مشكوره عزيزتي على الدعاء
الله ييسر لك أمورك
___________

مجروحه وأكابر
مشكوره على نصيحتك والله يعطيك العافيه
بس أختي والله أحاول ما أبين لزوجي
همي وحزني لأنه ماله ذنب أحاول
أهتم فيه لا أقصر معاه في شي
بس هو إنسان قلبه جدا قاسي
وما يعرف المودة والرحمه اللي بين الزوجين
كأنه أخذني عشان يسترني بس
أنا ما أبي منه غير كلمة طيبة
وقلب حنون وعطوف
وأنا أحاول بقدر الإمكان والله يعنني ويصبرني

الكل مشكورين عالمرور
ومشكورين على مواساتكم لي
والله كلامكم ريحني

السلام عليكم اختي
حزنتني قصتك الله يرحمك برحمته ربك كريم يالغالية