السلام عليكم ورحمة الله وبركاته

انا مسجله هنا من زمان بس انقطعت فترة سنه لبعض المشاكل اللي بذكرها لكم الان مع مشكلتي الأساسية

زوجي طلقني مره وتدخلوا ناس من اهلي واهله ورجعني لكنه مو قادر يعيش معاي ولا يقدر يناظر وجهي

السبب انه زوجي جدا حنون وطيب وحبوب وحريص على الصلاة والدين

حتى ابوي وامي يحبونه اتوقع كل الناس تحبه

ما يرضى بالغلط وما شفت منه ولا يوم ظلمني فيه او كدر خاطري ولو ازعل يسبق ويراضيني حتى لو انا الغلطانه

يدرس بجامعة الملك عبدالعزيز وباقي له ترم ويتخرج من الجامعه ومخطط للماجستير وانا كنت اساعده وحياتنا مستقره

بدات المشكله بزيارة لأهلي وبيت اهلي على شارع عام يعني سيارات رايحه وجايه

اخوي الصغير ( ريان ) يحب زوجي بجنون اذا شافه جاي يقعد عند عتبة الباب ينتظره ويسلم عليه ولا يدخل الا وهو ماسك يده

قدر الله باحد الزيارات انه يركض جهة باب السائق جهة باب سيارة زوجي زوجي فتح الباب ونزل يسلم عليه

تدحرج عقال زوجي بنص الشارع وركض اخوي يجيبه وصدمته سيارة وشاله زوجي على طول على المستشفى ومات قبل يوصل للمستشفى الله يرحمه

المهم تألمنا على وفاته خصوصا انه آخر العنقود بس الوالد لما جا للمستشفى مسك زوجي ودفه على الجدار وقاله ليه ما مسكته ليه ما وخرته عن الشارع كله منك

هالكلمات هدة حيل زوجي وتعقد نفسياً

وجلس فترة يراجع طبيب نفسي وانا وقتها عند اهلي ما يبيني

عدينا الازمه وراح له ابوي وكلمه وتعذر منه وحب راسه وقاله قدر شعوري

ويبكي ويقوله مقدر وضعك بس انتوا قدروا وضعي ما اقدر اعيش معاها

وطلقني الطلقة الاولى

وجلسنا فترة ما يقارب 3 شهور وتدخلوا اقاربنا ورجعني ورجعت للبيت اسبوعين ولما رحت زيارة لأهلي ما رضي ارجع معاه للبيت قال اجلسي عندهم

اهلي باعوا البيت القديم وشروا بيت جديد بعيد جدا عن البيت الاول

والمشكله مستمره ما يقدر يناظر وجهي ويقول لابوي الله يخليك خلوني اطلق والله ما اقدر اعيش معاها

العمل اخذ اجازة بدون راتب وجلس

الجامعة وتركها ما كمل وانفصل وماكان باقي له الا ترم او ترمين ويتخرج ويكمل حلمه بالماجستير

وكان معدله حلو مررره بس الحمد الله

كلمني امس بالليل وقالي انتي فيك شبه من اخوك الله يرحمة وانا ماني قادر اشوف وجهك كل ما اشوف وجهك اتذكره ما اقدر اعيش معاك

وما ادري وش اسوي حاولت اقنعه اني صابره سنه كامله وهذا مو أسلوب للتكفير عن موت اخوي الله يرحمه وانت مالك ذنب اصلا قضاء وقدر مو انت اللي رميته بنص الشارع هو اللي ركض وانت وقتها جالس بالسياره

قال لا وجلس ينافخ انتوا مو فاهمين وش احس فيه والله اني اصيح من اتذكر نبرة صوته وصياحه

واصيح اكثر و الحين ما ادري وش اقول بس جربنا كل الحلول

ذكرناه بالقضاء والقدر وانه مقدر ومكتوب

راجع طبيب نفسي مره ثانيه

جلس مع اكبر المشايخ ومن ضمنهم الدكتور / محمد العريفي الله يجزاه خير على رغم انشغالاته وتعبه لبى رغبة ابو زوجي وجا يكلمه

اصبح انطوائي مايحب يتكلم كثير من البيت للمسجد من المسجد للبيت وبس هذي حياته سنه كامله

ومصر على الطلاق يقول رجعه ما اقدر ارجعك وانا احبه وابي اجيب ولد منه واسميه ريان وكلمته ويرفضني

هل باقي حلول نقدر نقنعه فيها اننا نرجع لبعض

او خلاص بما ان اخوي الله يرحمه يشبهني حكم علي بالطلاق ؟؟؟

ساعدوني الله يجزاكم خير ويرفع درجاتكم الى اعلى المنازل

اي نصيحه اي اقتراح اي شئ او اقل شئ دعوة بظهر الغيب

شكرا اختكم ريانه

لاحول ولاقوة الابالله العلي العظيم الحقيقة خنقتني العبرة

لكن موقف زوجك سلبي جدآ

وماذنبك أنتي

هذا قضاء وقدر

ولكن لابد أن تبتعدي عنه فترة يااختي الكريمة

دعيه يفكر مع نفسه كثيرآ حتى ينسى المصيبة

يعين انتم كل شي سويتوه ماباقي شي

لكن انتي عليك بكثرة الإستغفار والدعاء بجوف الليل

والصدقه حتى تنفرج كربتك ياغالية

دعواتي لك ولن انساك من الدعاء

ولكن هل انتي بفترة العدة ام لا؟

__________________
حسبي الله ونعم الوكيل

حبيبتي زوجك يحتاج لعلاج نفسي...لازم يتابع مع الدكتور..وعلاجه حيكون سلوكي...

__________________
{اللهم أكرم اخواتي الغاليات عاشقات الامومة بالذرية المباركة والطيبة قريباً يارب}

لاحول ولا قوة إلا بالله

أنتو طرقتوا كل الأبواب و السبل الممكنة

فطرقوا باب الكريم وألحوا فما عجزتم عنه لن يعجز عنه رب العباد

ولكم منا دعوة صادقة من القلب أن يصلح الله أحوالكم

__________________

[استغفرالله وأتوب اليه.]

الله يرحم ريان رحمه واسعه ومن منا لم يفقد عزيز وغالي ولكن زوجك ليس له اي ذنب ولا بد ان لا يعاقبك بذنب ليس لك ذنب فيه وبدل ما يهون عليك الامور جعل مصيبتك مصيبتين الم فراق اخوك والم فراقه

الله يرحم اخوكي ويسكنه فسيح جناته
ربي يعينك زوجك شكله جدا حساس والدليل مرضه وانطوائيته
ادعي الكريم اللي يفرج الهموم بتفريج همك

__________________
اللهم اغفرلي ولوالدي وارحمني واسكني فسيح جناتك ياحي ياقيوم

يمكن زوجك يمر بحالة نفسيه

خاصة وان اخوك انصدم قدام عينه ومات وهو يحاول انقاذه


الله يكون بعونكم

ويرحم اخوك

لاحول ولاقوة إلا بالله

الله يرحم اخوك ريان ويعوضه بالحنه 0الموقف جدا فضيع عليكم وعلى زوجك بالذات لاكن موحل انه يطلقك وش ذنبك انتي0لاكن شكله حساس مره انتي اعذريه دمر مستقبله وحياته بسبب حساسيته 0لاكن حاولي في جلسه مع الشيخ سعيد بن مسفر له تاثير اقوى من غيره الله يصلح اموركم

ياقلبي عليك ...... انتي مالك ذنب ... وباين ان زوجك متأثر حيل بالموقف ...

والله مدري وش اقولك ..... لكن اهل زوجك وش موقفهم ماتلكلموا معه ..!!

انتي يوم قال بطلقك عارف ان مالك ذنب .... ولا وش موقفه .....

وش موقفك عنده يوم قال بطلقك ...

احس انه بعد توه محتاج دكتور نفسي .. لان الصدمه شكلها كبييييييييره عليه ..

__________________

لاحول ولاقوة إلا بالله


الله يجبر ضعفك وضعفه ويرفع مامسكم من ضر

أختي أرى أن يكون علاج نفسي وان يكون بعيدا عنك فتره من الزمن حتى يتحسن ويبدأ بالتدريج للرجوع إليك

أو قد يحدد الأخصائي طريقه تناسبه للتأقلم التدريجي مع الوضع

فكلنا بشر ودرجة تقبلنا تختلف للأحداث فكل ماعليك هو الصبر ولاتلحوا عليه كثيرا بالرجوع وايضا لاتوافقوه بفكرة الطلاق بل الحل مؤقتا هو البعد مع الأطمئنان عليه


أشعر بأن ذلك صعب لكن افضل من الفراق

__________________