السلام عليكم ورحمة الله وبركاته
اللي أكتبه اليوم لكم مجرد فضفضه عن اللي أحس فيه من ضيق وهم أحسه مثل الجبل على قلبي وايد أمور من إنفصلت من شهرين كملت السنه لكل من يعرف موضوع طلاقي أو يذكره وآنه أحس نفسي بدوامه من الأفكار اللي مالها أول ولا تالي تعبت وايد من التفكير ماراح أطول عليكم بس راح أتكلم عن كل الأفكار اللي تدور في بالي والمواقف اللي تسبب لي ضيقة الخلق على سبيل المثال
قبل يومين تقريبا كنا رايحين آنه وأمي وأختي نودي مهر أخوي حق بيت البنت على أساس توه خطب الله يتمم عليه
إن شاء الله وهناك طبعا كانوا قاعدين مجموعه من أهل الأم وكانوا يتكلمون عن كل شي بشكل عام وطبعا بهالوضع تدرون لازم يسإلون أمي بناتج متزوجين ومنو ماخذين وجم طفل عندهم يعني كنوع من الكلام العادي آنه عموما قلت حق أمي إذا إسألوج على أساس إن آنه متزوجه لأن الواحد مايدري شيصير لأن يمكن الله مايكتب نصيب بينهم سبحان الله ليش أتكلم من البدايه وكل من يدري بسالفتي المهم قعدوا يسإلوني آنه وإختي منو ماخذين عاد لسوء الحظ إن عايلة الأم نفس عايلة طليقي يصيرون لها من بعيد بس ماتعرفهم عدل وأهو أصلا ولد خالتي وقعدوا يسإلون إختي عن ولدها بأي حضانه وكنت خايفه يسإلوني لأن آنه وضع ولدي مختلف حاله خاصه إذا تذكرون موضوعي آنه بالعكس الحمدلله راضيه وماأحس إن وضع ولدي مختلف الحمد لله عايشه الوضع إنه مازال صغير لأن أهو عمره سنتين ونص بس كأن بالأشهر لان نموه بطيء
بس ماحبيت يسإلوني لأن مابي أدخل في تفاصيل المهم من هذا كله اللي صار حسيت وآنه هناك كاني الوحيده اللي وضعي غير من طلاق وأطفال وحسيت اللي حوالي كلهم طبيعيين وبنات من سني توهم متزوجين أو تزوجوا بنفس وقتي ومستمرين بحياتهم مع بعض إلا آنه حسيت نفسي غير وحسيت ودي الأرض تنشق وتبلعني وبس رجعنا البيت مادري ليش حسيت بقمته وقعدت أبجي من كل قلبي وتحسفت إني رحت وقعدت افكر وأقول إشمعنى آنه قدر يستغنى عني بسرعه ولا هزه شي ولا تأثر بعدم وجودي آنه لأني أسمع بعض من أخباره لأنهم بيت خالتي ليش ماإستمر وياي وممكن نقدر نعالج ليش حطني بالوضع البايخ آنه كان ودي أستمر معاه وأظل معاه ومع ولدي أحسه كسرني ولحد ألحين ماني قادره أتعايش نفسيا مع وضعي شسوي إذا آنه ماني قادره أنساه ولا أتناساه ماكان معطيني ذاك الحب بس آنه تعلقت حيل أحس أجذب على نفسي لما أقول كرهته من قلبي لحد ألحين أحن له مع إنه بهذلني وذلني وحتى محاكم دخلني وتكلم عني وغلط على أمي بصراخ وسب مع إنها خالته
ويمكن لأن بعد ولدي سافر علاج الإسبوع اللي فات علشان جذي بعد أحس أي شي قاعد يزيدني ويأثر فيني أهو راح مع أبوه وخذا إخته معاه الحمدلله قاعده أكلمها أطمن عليه
واللي قاعد يضيق خلقي بعد إنه قمت أفكر وايد مونفس أول عن سالفة إن الدكاتره يقولون إنه اللي نفس حالة ولدي مايعيشون وايد ليش يقولون جذي الأعمار بيد الله مو بيدهم آنه أول مافكر بهالطريقه أهو يفكر جذي دايما بس من إطلقت قمت وايد أفكر بولدي وبعد عطيته حضانته زاد التفكير عندي ويمكن عشان أحس نفسي وحيده
وودي بس يرجع من السفر آخذ حضانته عندي بس إذا أهو ماقال وآنه اللي قلتلهم راح يلعب لعبته ويذلني ويستغلها فرصه عشان يفرض شروطه ويبهذلني مره ثانيه
وأخيرا من الأشياء اللي أفكر فيها إني لو صار لي نصيب بزواج مره ثانيه إني ماأتزوج خلاص وأعيش حق ولدي لأن أحس محد كفو بالدنيا الظاهر كل ما تعطين أحد وتحبينه من كل قلبج يكسر فيج وبعدين لو الله كتبلي بزواج وأطفال مره ثانيه مابي ألهى عن ولدي بزواج ومسؤوليات وأطفال أحس ولدي له حق أكثر من أي أطفال راح أييبهم برعايتي وبعدين يمكن الزواج مره ثانيه ماراح ينسيني.
وأخيرا سامحوني طولت عليكم وايد وأشكر كل من راح يقرأ كلماتي ويخفف علي بكلماته بس والله ماكتبت إلا من الضيق اللي أحس فيه ولا تنسوني وإبني من دعوه بظهر الغيب