السلام عليكم و رحمة الله و بركاته ...

اليوم بدي أدلكم على أكلة حلو لذيذة وطيبة وشهية وسهلة الصنع وبتجنن وطيبة كتير كتير كتير كتير ....
الأكلة هيي : الشارلوت (( أطيب أكلة حلو بالعالم ...)) .
ومشان هيك سجلوا معي المقادير :

المقادير :
علبتان من البسكويت السادة .
قالب من الزبدة .
4 ملاعق كبيرة كاكاو (( يقصد هنا ملعقة طعام )) .
ملعقة ونصف كورن فلاور (( اللي هوي مسحوق النشاء أكيد بتعرفوه )) .
4 كاسات من الحليب كامل الدسم .
بيضتان . وملعقة فانيليا .
فنجانين قهوة ونصف من السكر .
مقادير إضافية : لمحبي الموز فقط , أربع موزات مقطعة لدوائر .

طريقة التحضير والصنع :
نضع الحليب والكورن فلاور بعد التحريك على النار (( انتبهي منيح ضعي ملعقة الكورن فلاور عندما يكون الحليب بارداً لأنو إذا حطيتيها والحليب سخن بتكبتل على بعضها وما بتدوب بالحليب وبتبقى قطع قطع )).
المهم يا سيداتي ويا سادتي , بعد هيك منضيف السكر على مراحل مع التحريك المستمر , وبس يبدأ الحليب يصير سخن منضيف البيض مع ملعقة الفانيليا (( مشان الزنخة تبع البيض تروح منيح )) ومنحرك , بعد شوي منحط قالب الزبدة ومنحرك مشان يبنخلط منيح مع الحليب .
لما يبدأ الحليب بالغليان بتلاحظي أنو بيبدأ الخليط يسمك ويصير متل الكريمة المطبوخة الطيبة .
خليه على النار لحتى تشوفيه صار جامد كفاية .

و هون بدا وقت الشغل :
نقسم خليط الكريمة اللي طبخناها إلى نصفين , ونضيف الكاكاو إلى النصف التاني ونحرك جيداً .
أحضري جاط بيريكس عادي و ضعي أول طبقة من الكريمة البيضاء ومن ثم صفي البسكويت فوقها, طبقة بسكويت واحدة فقط مشان ما تطلع ناشفة , بعد ما تصفي البسكويت فوقها ضعي طبقة ثانية من الكريمة البيضاء .,ومن ثم صفي بسكويت مرة أخرى وضعي طبقة كريمة الكاكاو (( أي من النصف التاني اللي خلطناه قبل شوي )) . يعني طبقة بيضاء وطبقة سوداء .
وخليكي هيك عم تحطي طبقات لحد ما تخلص الكريمة .
ملاحظة هامة جداً :
لمحبي الموز : ممكن تضيفي بين كل طبقة بسكويت وكريمة بتحطيها قطع موز مدورة بتطلع كتير كتير كتير طيبة ورائعة وأنا بنصحكن أنو تجربوها وكمان شغلة تانية حابة أنصحكم فيها كتري على قدر ما بتقدري كريمة بين الطبقات بتطلع أطيب و أغنى من حيث الطعمة ..

بعد هيك , حطي هالأكلة الطيبة بالبراد العادي لمدة 5 ساعات لحتى تبرد كتير منيح وبعدين قطعيها وكليها وقدميها لضيوفك وعائلتك ونشالله بالهناء والشفاء وأنا متأكدة أنو مارح يقولون لكي إلا يسلمو أيديكي على هالأكلة الطيبة .....

نشالله يارب تكون الأكلة اللي قدمتلكن ياها اليوم عجبتكن وبالله عليكم تجربوها وتقولوا لي رأيكم فيها أوكيه اتفقنا .....


والسلام عليكم ورحمة الله وبركاته .......

انا مش فاهمه الاسم ...بس شكرا على الشارلوت...
انا راح اعطيها لامي تجربها وبعطيكي النتائج..لاني ما بحب الحلويات

انا احب اسئل ايش جنسيتهااا هاذي الاكله ؟؟؟؟؟؟؟؟؟؟؟