متضايقة كثير منه و أحبه !! شورو علي
تحية طيبة
لكل من شرفني مروره على صفحتي المتواضعه
أتمنى تساعدوني في مشكلتي اللي تعبت كثير منها ...
بداية مشكلتي هي بداية زواجي كان زواج تقليدي فترت الملكة دامت 3 شهور وكنت مرتاحة معه كثير و حبيته بس من أول يوم تزوجنا فيه و أنا ما كنت مرتاحة معه مع اني كنت أحبه بس كان أسلوبه كثير يضايقني. وأحس بضيقة غريبة منه مو طايقته وضربني بعد ما كملنا شهرين زواج عشان مشكلة ماتستاهل وجلست عند أهلي فترة طويلة ورجعت له
وما تميت شهرين معه إلا و رجع ضربني مرة ثانية وقعدت عند أهلي برضو شهرين بس هالمرة طول ما أنا عندهم كنت احن له و أتعذب مو قادرة ابعد عنه لأني كنت أحبه في نفس الوقت مو قادرة أنسى أنه مد يده علي ثاني قلت يمكن هو ما كان قصده وانه يحبني كثير و تراضينا كملنا خمس شهور مبسوطين وصارت مشكله بينا بس هالمرة أنا اللي كنت غلطانة فيها فضربني وطلبت منه الطلاق و طلقني في نفس يوم المشكلة لما وداني عند أهلي وكلمني بعدها بيومين عشان أرجع و رفضت من غير حتى ما أفكر في المشكلة نفسها واني كنت غلطانه
و بعد طلاقي بشهر سمعت أنه خطب و تملك فتعبت كثير و أنهرت و تأزمت نفسيتي وصار يومي كله بس أفكر فيه وابكي و مو قادرة اتحمل فراقه و صرت عايشة على المغذي مايمر يومين إلا وأنا طايحة و قبل نهايه العدة بأسبوع أرسلي مسج كاتب فيه أنه باقي يبيني ويحبني وانه يدري اني تعبانة كثير ويدري أن عندي مشاكل مع أهلي (لأن فيه أحد من طرفي وصل له إخباري عشان يصلح بينا ) فرحت كثير وقتها لكن جتني خيبة أمل في نفس الوقت لأن زواجه كان قريب و طبعا مستحيل آخرب عليه حياته فطلب مني اني أرجع له و رفضت نهائي لأنه مستحيل أرجع وهو معه وحدة ثانية الصراحة مو عشانها عشان الانسان الوحيد اللي حبيته في حياتي ما أتصور تجي وحدة تشاركني فيه مهما كان
فقرر أنه يطلقها قبل الدخول لأن بينهم مشاكل وما ارتاح معاها بعدها اكيد طبعا فرحت كثير أن أغلى شيء في حياتي بيرجع لي ونسيت أنه أهان كرامتي يوم تملك وأنا باقي ما كملت شهر من العدة وما كملنا سنة زواج بس من كثر التعب اللي شفته في غيابه خصوصا لما حسيت أنه بيروح مني خلاص وما راح يرجع خلاني أنسى كل شئ من غير حتى ما اعاتبه حطيت الغلط علي وان من كثر ما يحبني حاول ينساني بهالطريقة لكن يوم فاتح أهله في الموضوع طبعا رفضو رفض نهائي أنه يطلقها فصار يحلف لي ويقسم أنه مستحيل يتزوجها مو عشاني بس عشان مشاكلها اللي مسويتها وانه ما حبها وانه راح يكون لي لحالي فصار عندي أمل كبير و حسيت اني أنولدت من جديد لدرجة اني وافقت اني أرجع له بدون حتى رضاوة ولا حفلة لأنه كان رافض وعطيته اجار الشقة اللي بنسكنها لأن وضعه المادي كان سئ عشان زواجه اللي راح يتكنسل واتفقنا أننا نرجع لبعض بعد ما ينهي موضوع زواجه كامل مع أهله وينفصلون لأن زواجه كان المفروض يكون بعد 3 شهور وصار نهائي ما يكلمها وكل وقته معي
ولما اتفقنا على كل شئ وخلاص قبل موعد زواجه أللي كان محدده ب 3 أسابيع صار يقولي أبوي جاني وكلمني وانه بيزعل و بفشله مع العالم و خلاص وافقي اني أخذها أنا مابي أظلم بنت الناس هي يتيمة ومحتاجتني ما عندها أحد يصرف عليها وأخوانها كلهم متزوجين طبعا رفضت اني أرجع وصار يجرحني بالكلام وقالي بحولك فلوسك اللي عطيتيني إياها حقت أجار الشقة وقفل الخط بوجهي وصرت منهارة بعد يومين دقيت عليه رد علي وهو معصب وليه داقة انتي خربتي كل شئ لا عاد تتصلين وقفل الخط بوجهي طبعا أنا مرة ضقت ليه يكلمني بهالطريقة وأرسلت له اني داقة بس عشان يحولي الفلوس فاتصل وعصب زيادة ورفض يحولها و مرت اسبوعين وأنا طبعا حالتي النفسية والصحية تعبانة مرة وصرت منعزلة تماما
اتصلت عليه قبل 4 أيام اطمن عليه فصار يحكي أنه يحبني ومن هالكلام بس ما يقدر يخليها عشان أبوه وعشانها يتيمة واني لازم أرضى بوجودها وأرجع وفجاءة قلب علي وصار يصارخ ويعدد عيوب بعضها فيني وبعضها لا وصار يحكي أنا ما حولت فلوسك عناد مع أن جتني فلوس وشريت سيارة آخر موديل و سددت ديوني بس مابي أرجعها لك عناد والمشكلة اني ما جبت له طاري الفلوس وقتها ولا لمحت له و قلت له حسبي الله ونعم الوكيل فصار يجرحني بالكلام وعصب وقفل الخط في وجهي رسلت له بعدها رسالة عتاب طويلة وما رد علي وآخر شيء رسلت له اني ببقى أحبه مهما سوى
والحين باقي أسبوع على زواجه وكل يوم يمر علي أتالم فيه أكثر من اللي قبله ومو قادرة أنسى جرحه لأني كنت أحبه حيل حياتي كنت موقفتها عليه وبس كان هو كل اهتماماتي كان عادي ازعل الكل مني عشانه بس هو يبقى معي وراضي كان كل همي اني أحبه في كل وقت وكل لحظة حتى هو بعد كان يبادلني نفس الشعور وكان يهتم فيني أكثر مني بس مو عارفة ليه وصلنا لهالحالة ولهالقرارات وليه لما قرر يبعد بعد عني بهالطريقة كان من أول سمع كلام ابوه ورحمها وخاف على ظلمها وخلاني ابعد كان الجرح وقتها يمكن يكون أهون من الحين وليته تركني بأسلوب حلو بالعكس أهاني و حسسني أنه كان يستغل حبي و ضعفي بحاجتي له جنبي
والمشكلة الحين موقادرة أنسى ولا استوعب أنه انتهى من حياتي للأبد بس أبي أعرف أنا السبب فعلا في اللي صار في حياتي وفي طلاقي واني أنا اللي جنيت على نفسي مثل ما يقول أو لا ؟ ولا كان راحمني و شفقان علي لما كنت تعبانة أول عشان كذا ما قدر يخليني وقرر أنه يواسيني بكذبة أنه بينفصل عنها؟و قراري اللي اتخذته اني ما أرجع له على حساب حبي و مع شريكة كان صائب ؟ وكيف كان المفروض اتصرف معه؟ حالتي اللي أنا فيها هي فعلا لأني أحبه بصدق ولا مجرد صدمة ارتباطه بغيري؟؟ و الأهم من هذا كله كان فعلا يحبني ؟ وكيف بيمر علي يوم زواجه وكيف بتحمله ؟
شاكرة لكم