متضايقة كثير منه و أحبه !! شورو علي
 

تحية طيبة

لكل من شرفني مروره على صفحتي المتواضعه



أتمنى تساعدوني في مشكلتي اللي تعبت كثير منها ...
بداية مشكلتي هي بداية زواجي كان زواج تقليدي فترت الملكة دامت 3 شهور وكنت مرتاحة معه كثير و حبيته بس من أول يوم تزوجنا فيه و أنا ما كنت مرتاحة معه مع اني كنت أحبه بس كان أسلوبه كثير يضايقني. وأحس بضيقة غريبة منه مو طايقته وضربني بعد ما كملنا شهرين زواج عشان مشكلة ماتستاهل وجلست عند أهلي فترة طويلة ورجعت له

وما تميت شهرين معه إلا و رجع ضربني مرة ثانية وقعدت عند أهلي برضو شهرين بس هالمرة طول ما أنا عندهم كنت احن له و أتعذب مو قادرة ابعد عنه لأني كنت أحبه في نفس الوقت مو قادرة أنسى أنه مد يده علي ثاني قلت يمكن هو ما كان قصده وانه يحبني كثير و تراضينا كملنا خمس شهور مبسوطين وصارت مشكله بينا بس هالمرة أنا اللي كنت غلطانة فيها فضربني وطلبت منه الطلاق و طلقني في نفس يوم المشكلة لما وداني عند أهلي وكلمني بعدها بيومين عشان أرجع و رفضت من غير حتى ما أفكر في المشكلة نفسها واني كنت غلطانه

و بعد طلاقي بشهر سمعت أنه خطب و تملك فتعبت كثير و أنهرت و تأزمت نفسيتي وصار يومي كله بس أفكر فيه وابكي و مو قادرة اتحمل فراقه و صرت عايشة على المغذي مايمر يومين إلا وأنا طايحة و قبل نهايه العدة بأسبوع أرسلي مسج كاتب فيه أنه باقي يبيني ويحبني وانه يدري اني تعبانة كثير ويدري أن عندي مشاكل مع أهلي (لأن فيه أحد من طرفي وصل له إخباري عشان يصلح بينا ) فرحت كثير وقتها لكن جتني خيبة أمل في نفس الوقت لأن زواجه كان قريب و طبعا مستحيل آخرب عليه حياته فطلب مني اني أرجع له و رفضت نهائي لأنه مستحيل أرجع وهو معه وحدة ثانية الصراحة مو عشانها عشان الانسان الوحيد اللي حبيته في حياتي ما أتصور تجي وحدة تشاركني فيه مهما كان

فقرر أنه يطلقها قبل الدخول لأن بينهم مشاكل وما ارتاح معاها بعدها اكيد طبعا فرحت كثير أن أغلى شيء في حياتي بيرجع لي ونسيت أنه أهان كرامتي يوم تملك وأنا باقي ما كملت شهر من العدة وما كملنا سنة زواج بس من كثر التعب اللي شفته في غيابه خصوصا لما حسيت أنه بيروح مني خلاص وما راح يرجع خلاني أنسى كل شئ من غير حتى ما اعاتبه حطيت الغلط علي وان من كثر ما يحبني حاول ينساني بهالطريقة لكن يوم فاتح أهله في الموضوع طبعا رفضو رفض نهائي أنه يطلقها فصار يحلف لي ويقسم أنه مستحيل يتزوجها مو عشاني بس عشان مشاكلها اللي مسويتها وانه ما حبها وانه راح يكون لي لحالي فصار عندي أمل كبير و حسيت اني أنولدت من جديد لدرجة اني وافقت اني أرجع له بدون حتى رضاوة ولا حفلة لأنه كان رافض وعطيته اجار الشقة اللي بنسكنها لأن وضعه المادي كان سئ عشان زواجه اللي راح يتكنسل واتفقنا أننا نرجع لبعض بعد ما ينهي موضوع زواجه كامل مع أهله وينفصلون لأن زواجه كان المفروض يكون بعد 3 شهور وصار نهائي ما يكلمها وكل وقته معي

ولما اتفقنا على كل شئ وخلاص قبل موعد زواجه أللي كان محدده ب 3 أسابيع صار يقولي أبوي جاني وكلمني وانه بيزعل و بفشله مع العالم و خلاص وافقي اني أخذها أنا مابي أظلم بنت الناس هي يتيمة ومحتاجتني ما عندها أحد يصرف عليها وأخوانها كلهم متزوجين طبعا رفضت اني أرجع وصار يجرحني بالكلام وقالي بحولك فلوسك اللي عطيتيني إياها حقت أجار الشقة وقفل الخط بوجهي وصرت منهارة بعد يومين دقيت عليه رد علي وهو معصب وليه داقة انتي خربتي كل شئ لا عاد تتصلين وقفل الخط بوجهي طبعا أنا مرة ضقت ليه يكلمني بهالطريقة وأرسلت له اني داقة بس عشان يحولي الفلوس فاتصل وعصب زيادة ورفض يحولها و مرت اسبوعين وأنا طبعا حالتي النفسية والصحية تعبانة مرة وصرت منعزلة تماما

اتصلت عليه قبل 4 أيام اطمن عليه فصار يحكي أنه يحبني ومن هالكلام بس ما يقدر يخليها عشان أبوه وعشانها يتيمة واني لازم أرضى بوجودها وأرجع وفجاءة قلب علي وصار يصارخ ويعدد عيوب بعضها فيني وبعضها لا وصار يحكي أنا ما حولت فلوسك عناد مع أن جتني فلوس وشريت سيارة آخر موديل و سددت ديوني بس مابي أرجعها لك عناد والمشكلة اني ما جبت له طاري الفلوس وقتها ولا لمحت له و قلت له حسبي الله ونعم الوكيل فصار يجرحني بالكلام وعصب وقفل الخط في وجهي رسلت له بعدها رسالة عتاب طويلة وما رد علي وآخر شيء رسلت له اني ببقى أحبه مهما سوى

والحين باقي أسبوع على زواجه وكل يوم يمر علي أتالم فيه أكثر من اللي قبله ومو قادرة أنسى جرحه لأني كنت أحبه حيل حياتي كنت موقفتها عليه وبس كان هو كل اهتماماتي كان عادي ازعل الكل مني عشانه بس هو يبقى معي وراضي كان كل همي اني أحبه في كل وقت وكل لحظة حتى هو بعد كان يبادلني نفس الشعور وكان يهتم فيني أكثر مني بس مو عارفة ليه وصلنا لهالحالة ولهالقرارات وليه لما قرر يبعد بعد عني بهالطريقة كان من أول سمع كلام ابوه ورحمها وخاف على ظلمها وخلاني ابعد كان الجرح وقتها يمكن يكون أهون من الحين وليته تركني بأسلوب حلو بالعكس أهاني و حسسني أنه كان يستغل حبي و ضعفي بحاجتي له جنبي

والمشكلة الحين موقادرة أنسى ولا استوعب أنه انتهى من حياتي للأبد بس أبي أعرف أنا السبب فعلا في اللي صار في حياتي وفي طلاقي واني أنا اللي جنيت على نفسي مثل ما يقول أو لا ؟ ولا كان راحمني و شفقان علي لما كنت تعبانة أول عشان كذا ما قدر يخليني وقرر أنه يواسيني بكذبة أنه بينفصل عنها؟و قراري اللي اتخذته اني ما أرجع له على حساب حبي و مع شريكة كان صائب ؟ وكيف كان المفروض اتصرف معه؟ حالتي اللي أنا فيها هي فعلا لأني أحبه بصدق ولا مجرد صدمة ارتباطه بغيري؟؟ و الأهم من هذا كله كان فعلا يحبني ؟ وكيف بيمر علي يوم زواجه وكيف بتحمله ؟

شاكرة لكم

اختي الحبيبه انت متعلقه كثير فيه انصحك بنسيانه لانه طلقك ولا تربطك فيه اي صله وتفائلي ان من خلق طليقك وجعل في قلبك محبته خلق غيره وانك راح تحبي وتتزوجي ويصبح هذا كله من الماضي اهتمي بصحتك وفي شبابك فانتي زهره غاليه لا تدعيها تذبل عند اول صدمه العمر قدامك حبيبتي

الي باعك بالرخيص بيعيه ببلاش مايستاهل حبك
وهو يوم رجعك اخر مرة وقال انه كنسل الزواج كان يكذب ويبغاتي ترجعي ويقنعك مع الايام بزواجه
[COLOR="DarkSlateBlue"]زوجك لو كان يحبك كان صبر وكان حيحزن على طلاقك مو يطلقك وعلى طول يروح يخطب كانه ما صدق [COLOR="Teal"]
هذا مايستاهل تبكي عليه مافيه صفات واخلاق رجولة .
حاولي تنسيه وتبدأي حياتك من جديد ..لاتلومي نفسك وتسالي انا غلطت ولا لا الماضي راح خليه وراكي وافتحي صفحة جديدة بكل امل وتفاؤل ..
اقري البقرة واستغفري وادعي ربنا يرزقك بالي يستاهلك ويقدر حبك
احمدي ربك انك ما حملتي منه ..اهتمي بنفسك وعيشي الحاضر ولساتك صغيرة والحياه قدامك والاكتئاب فترة تمر بها كل مطلقة بس يقل و يختفي مع الوقت ... بالتوفيق وربنا يسعدك

ياحبيبتي هدى من روعك وتعوذى من أبليس وقولي اللهم أجرني فى مصيبتي وأخلفلي خيرا منها ..

أنا أعرف أنك بحاله صدمه وخذلان ومهما تكلمنا ماراح تستوعبين أو حتى تتقبلين الكلام
لأنى مريت مثلك بصدمه خذت من وقتى وصحتي الكثير ولكن تجاوزتها ولله الحمد والفضل ..

بس طلبي ورجائي أنك تكفين من جلد نفسك وتعذيبها بالبحث عن أجابات لهالأسأله هل هو يحبني والا راحمني وهل وهل وهل لأنك بتعذبين نفسك وبس وهذا نصيب وقدر جرى عليك بأمر من الله فلاتلومين نفسك وتعذبينها !

الحين الى عليك أنك تتوجهين لله فقط وتشتكين له وتتضرعين له وتسألينه يفرج همك ويمسح على قلبك ويصبرك ويعوضك خلى حياتك لله ومع الله والله بتسعدين ووبتفوزين برضاه أن شاءالله وهذا الأهم

أنصحــك توافقين على رجعتك له ..
مـاتدرين يمكن زواجه منها مايكمل شهور لأنه من كلامه يقول تعبت من مشاكلها ..
فلا تنهيـن حيـاتك مع زوجـك أكثر من كذا ..
واضح أنه يحبـك لاتوسوسيـن كثير ..
..
وقبـل كل هذا ..
أستخيـــــري في أمرك وقرار رجعتك ..

ألمتي قصتك يمكن لأني قريبه من ظروفك لكن أنا الحمدالله ماعشت معه ولا شي
بس بصراحه لما سمعت ملكته بكيت بشكل هستيري لكن الحمدالله الله يعوضني خير منه ويعوضك

مدري وش أقول لك
لكن إشغلي نفسك بأي شي

حبيبتى او شيئ مدام ضربك مره بيضربك الف مره واحمدى ربك انك ماجبتى منه عيال لان العيال هم اليجبروكى انك تضحى عشانهم مدامل ماعندك شيئ يستاهل انك تضحى عشانو هو يبى يستغل حبك له وربى ييسرلك اللى فيه الخير وحاولى انك تنسيه ولاتفكرين فيه حاولى اشغلى نفسك فى دراسه او هوايه تحبيها ولو بتستحملى ضربه واهانتو ارجعى له

أشكركم على نصايحكم و وقفتكم معي

لأن الله العالم قد ايش كنت محتاجة لها أدري أنها أزمة

وبتعدي ويمكن انساه مع الوقت

بس المشكلة في متى ؟! و لو اني مستحيل انساه !!

لأنه حبي الوحيد

لا ابشرك بتنسينه وبتنسين اليوم اللي شفتيه فيه اذا علقتي قلبك بالله اولا و اذا بدوا الخطاب يطرقون الباب راح تتغير فيك اشياء كثيررررررة وتقولين يالله وين كنت ووين صرت،،. راح تذكرين كلامي
اسأل الله ان يعوضك بالرجل الصالح اللي يعرف قيمتك ويقدر الأمانة اللي بين يديه وينسيك ايام الشقاء ويكون قرة عين لك ،،، اللهم آمين،، *