عدت لكم مجددا

يا خواتي زوجي جااااااااااااف معاي ادز له مسجات ما يرد ويصد

انا خلاص صبري نفد وخلص

الحين انا في بيت اهلي قلت له ابي ارتاح منك


امس كنت راجعة من الدوام تعبانة كان ودي بكلمة تطيب خاطري او تحسسني اني مرغوبة

دزيت له مسج طبعا كالعادة حقر ومارد وكنت رادة تعبانة وكانت بنتنا مستعسرة وايد

دزيت له مسج ان انت مافيك خير وانت جاف وناشف

وكان امس حافل بالمشاكل

طبعا غلط علي وعلى امي وبعدها اعتذر على غلطه على امي

والحين يقولي انا حذرتج من زمان ان هذا اللي عندي ولا اقدر اعطي اكثر وانا صبري خلص


ابي احس بالحب ابي احس اني مرغوبة

كل الكلام الزين لها وانا مالي الا الصد والجفا

لا تقولون لي عشان بناته يقدر اقل مافيها يقولي جم كلمة تطيب خاطري مثل ما يقولها


تعبت مع هالريال


الصبح حاول ان يلطف الجو بس غلطه على امي ما خلاني اسامحه


ما ابيه وبنفس الوقت مابي اعيد تجربة الطلاق خصوصا مع وجود بنتي

مابي انسان ما يبيني ومن حقي اعيش مع زوج يبيني وراغب فيني

__________________
لا اله الا انت سبحانك اني كنت من الظالمين

ممكن تكتبي لي المسج اللي دزيتيها له ؟؟ الثنتين لو سمحتي
وشنو كان رده على كل واحده فيهم بالضبط

__________________

اشرايكم اقوله اني ننفصل اجتماعيا
اكون على ذمته بس ماله اي حق علي
وما ايي بيتي

انا حابة بيتي وحابة مملكتي بس اهو جلف وناشف معاي


قالي متى تاخذين اغراضج من البيت قلت له هاليومين

وسالته متى اتييب الورقة قالي بعدما تاخذين اغراضج عشان اتاكد انج جادة

لا تقولين لي ما يحبها الا يحبها وميت عليها وانا مو ماخذني الا ارضاء لامه بس

__________________
لا اله الا انت سبحانك اني كنت من الظالمين

طلعيها من حساباتك كلها ... مالها علاقة بجفاف زوجك

علاقتك بزوجك طبيعتها بسبب حياتكم انتي واياه وبسبب تعاملكم انتي واياه ... هي مالها تأثير إلا بسبب غيرتك منها واستمرار مقارنة علاقته فيها بعلاقتك فيه

انتظر نص مسجتك له يالغالية ... بناءا عليها أقدر اـتأكد من اللي ببالي عن سبب جفافه

__________________

الى من نقشته مشيئة الله في قلبي وحفرت اسمه في عقلي







احبك واموت بهواك





هذا المسج اللي اول مارجعت من الدوام ومارد علي وقبلها دزيت له مسج ما اقدر اكتبه

وعقب دزيت له


تدري انك احقر وانذل انسان شفته
انا توني راجعة من الدوام وتعبانة وماسكة بنتك ومحتاجة كلمه فيها خير بس ما القى منك الا الجلافة
الله يصبرني على ما بلاني

رد علي بشكرا


وبعدها توالت المشاكل



خالتي بيتا شلون مالها تاثير وانا من ولدت وهي تحن عليه ان يطلقني حتى بفرحتي الاولى ما تهنيت


اهو بسرعة يتاثر وهي تحن وتزن عليه ان انا ابيك لي بروحي يعني يطلقني

حسبي الله عليها

__________________
لا اله الا انت سبحانك اني كنت من الظالمين

ظنيت أن مسجتك ممكن تكون جافة ... لكن طلعت غلطانه

يمكن ساعتها كان مشغول يا موهبة ... يمكن كان حوله ناس ما يقدر يرد .

حسيت هوشتكم هوشة عشاق .. مو عن جد وهو حاس بهذا ومقدر غيرتك ورغبتك عشان هيك يقول لك برسلها لما تاخذي أغراضك واتأكد أنك جاده .

حبيبتي موهبة ... لو زنها بدو يأثر عليه كان أثر من زمان ... بالعكس أحس انه زنها وبالمقابل تحملك خلاه يتمسك فيكي مو مثل زمان كان كل شوي يعرض الطلاق .
وكونك مع الله ومتوكله عليه وتدعينه فتأكدي حبيبتي أنها ماراح تقدر تضرك بشي . وبينقلب السحر على الساحر .

هونيها موهبه ... ما صار شي يستاهل كل هذا الزعل ... ولا تجيبي سيرة الطلاق ولا الانفصال المعنوي أو الجسدي أو أي انفصال طالما ما في مشكلة تستاهل ... وطالما زوجك بتحسن مستمر وتعلقه فيك يزيد يوم عن يوم
نصيحة لأي زوجة لا تطلب الطلاق بأي نوع من أنواعه إلا إذا فعلا وصدقا كنتِ ناويه عليه .. لأنه التهديد بالانفصال يفقده هيبته وتأثيره

اليوم الجمعة يوم مبارك وفضيل وحلو تكوني مع زوجك بروقان ومودة . اطلعي خذي لفة واشتري حاجة حلوه وغيري جو وانسيه حاليا
لو أرسل يتحركش خليكي لطيفة معاه واطردي ابليس من بينكم

بالتوفيق والله يهدي سركم

__________________

مشكورة خالتي بيتا والله اني صايرة مايعة وحبوبة معاه

بس المشكلة احس اني انفخ في جربة مقظوظة


اي نعم ما انكر هو يتحسن ولله الحمد

حتى قبل يومين كان متهاوش مع مرته واتوقع انا السبب لان اعرف ويهه لما تكون الهوشة بسببي

عموما انا يوم الجمعة من الصبح الى الليل عند اهلي

وانا قلت له ابي ارتاح صبري نفد خلاص

مابي ارجع خالتي بيتا مالي خلقه كلش

مابي انسان ما يبيني ولا ابي بس انا اللي اضحي


يقولي انتي سويتي مشكلة من ولا شي قلت له لاني مليت وخلص صبري

ابيه هو اللي يردني مابي احس كل مرة اني اروح وارجع بروحي

ابي احس اني حبيبته مو بايعني

__________________
لا اله الا انت سبحانك اني كنت من الظالمين

أتخيل شعورها لما يردها مع كل دلعها والضغط اللي تضغطه عليه ببناتها وتشوفه متمسك فيج مو راد عليها .. تلف تلف وتدور ومو طالع بيدها شي ... ربي يرد مكرها في نحرها ويكفيج شرها .

__________________

امين يا خالتي بيتا

بس فعلا محتاجة ارتاح حاليا


تدرين اني كل يوم ارد من الدوام واتغدى بروحي واانام الظهر بروحي وهو ما ايي الا بالليل او بعد ما ينامون بناته

كأني مو متزوجة

اقوله انت عاجبك ان بيتنا متشتت؟؟ عصب وقالي بيتنا مو مشتت ولا تقولين هالكلام

انا كل اللي ابيه ريج حلو وبحسسني برغبته فيني مو مجبور علي


ابي كلام

ادري ان الواقع يقول ان يبيني ولو ما يبيني جان طلقني بس احتاج اسمع

احتاج كلام يوصل لي قلبي

وعلى فكرة كل ما ادز له مسجات خاصة وعميقة ما يرد كلش او يرد بتطنز انا اندقر واتحبط


والله تعبت

__________________
لا اله الا انت سبحانك اني كنت من الظالمين

ما يخالف ارتاحي ... ادري أن وضعكم متعب لج وتحتاجي الراحه

يجي عندج بعد ما البنات يناموا علامة طيبة وحلوه ترى ... فكري بالموضوع على أنه يجي لواحته اللي يرتاح فيها .. بيتج هو سكنه وراحته ولا تفكري فيها أنه يجي تالي الليل بمعنى انه عندج هو الخار الأخير له .. كان بإمكانه ينام عند البنات بعد تعب النهار ..شنو يجبره يشيل نفسه ويجيج ؟

بس انتي لا تملي ولا تيأسي ... واللي خلا الواقع يتغير وخلا زوجك يتمسك فيكي بيخليه عن قريب بإذن الله يقول كلام حلو ويروي قلبج

الله يصبرج ويهونها عليج

__________________