بجد يا عصافير الموقف صعب ومؤلم .. أنا قرأت موضوعك من أول ما نزلتيه .. وكنت متردده أرد أو لا
بغيت أحذرك من أهله وانبهك
بس خفت أكون متشائمة ..
المهم الحين الي صار صار .. وموقفك صحيح صعب بس حطي في بالك أن أحنا نعيش حياة
مزيفه غالباً .. ما ينظر للأنسان بقيمته الروحيه .. قد ما ينظر لأشياء خارجية ماله يد فيها
ضروري تعرفين أن الرجل وأهله في الغالب يبون بنت أصغر من ولدهم .. هذا واقع
حتى لو تسألين جميع الشباب هنا في المنتدى كان كلهم قالوا نبي اصغر مننا
وحتى الامهات الي معانا بيجاوبون نفس الجواب ..
حطي واقع البلد الي تعيشين فيه دايماً بعين الاعتبار .. عشان ما تنصدمين كثير
و ضروري تعرفين أن البنت تكون الخيارت قدامها صعبه بس تكبر شوي .. هذا واقع نعيشه
لما قلتي انه كان متمسك فيكِ .. المفروض ما أعطيتي أي أهمية لكلامة .. لأنه ما يعرفك عشان يقول هالكلمة
هو شافك وبس .. أعتبريه كلام في الهواء .. ماهو الكلام ببلاش,, ما عاد الرجل كلمة
عشان كذا لا تنصدمين كثير ولا تعذبين نفسك .. هذي طبيعة المجتمع وهذا واقع الناس
الشي الكريه في الي خطبك اهو واهله انهم ما حددوا العمر الي يبونه ولما شافك قال ابيها
وبعدين طلع انهم يبون اصغر والألعن يبون اختك ..
المفروض الانسان يحدد الاشياء الي مو مستعد يتنازل عنها عشان ما يجرح بنات الناس
لو كان قال هالشي من الاول ما كان صارت نظرة شرعيه وكان اختياره لأختك عادي وكان فرحتي لها
لكن الي عملوه اسمه قلة حياء
أنا الحين مو قلقة عليكِ قد ما أنا قلقة على أختك الي رمت نفسها في النار
اي نصيب هذا ..!!
أهله ناس كذابين يقولون سألوا في المحكمة وقالوا لهم أن البنت إذا أكبر ما نعقد
يعني شوفي الكذب والتحايل .. و تحته صفات العن
الخاطب أبد مو رجال .. لو كان رجال يحترم كلمته حتى لو كانت أختك ملكة جمال كان ما تقدم لها
بعد ما شافك وأعلن تمسه فيكِ .. بس للأسف ما عنده مرؤة
أختك ولا هامها شي وأهلك بعد مو هامهم وكأن مشاعرك وخاطرك مثل اي حاجة في البيت
كل هذي مؤشرات سيئة لحياة أختك مستقبلاً لو تم الزواج
عشان كذا أنا قلقة عليها اكثر منك
أنتي الله وضح لك الأمور بس هي للحين تعيش في غيبوبة
الي ابيه منك أنك ما تشيلين في قلبك على أختك لأن مصيرها أصعب من مصيرك
انتي المفروض ما تكرهينها .. المفروض ينكسر خاطرك عليها
ولا تبكين على نفسك .. ابكي عليها
خليها تمشي في الطريق الي اختارته
مع انه طريق كله اشواك .. وراح تعاني كثير .. وبكرة تقولين أني قلت لك
ما أتمنى لها الشر بس كل المؤشرات سيئة
هالناس الي جايين لكم ابد مو سهلين .. ما عندهم اي مرعاة للأصول اهم شي ياخذون الي يبونه
وصفة الانانية تخلي ابن أدم يختزل داخله كل الصفات السيئة الي لا تطاق
وانتي لا تترجين شي من الناس مدام رب العالمين موجود
الله أغنانا عن الحاجة للناس و أمرنا ما نطلب ا ي شي مهما صغر إلا منه
هوني على نفسك .. يكفيكِ أن كل الي يصير تحت نظر وسمع رب العالمين
والله يحب العدل والخير لك ... صح ؟
أجل ليش نقلق والله مطلع على كل الدقائق وبيده ملكوت السموات والارض
و ايش قيمة رجل غير كفؤ قدام ملكوت السموات والارض ... ولا شيء
__________________
..كالاطفال نحلم إننا ننام على سحاابة بيضاء يعطرناا المطر ..