من قلبي لقلب كل رجل متزوج


ليه ما تعيش جو مع زوجتك؟

كل زوجه سواء عمرها في العشرين وإلا الأربعين . مر على زواجكم شهر والا ثلاثين سنه لها نفس الاحتياجات

دامك عارف يا آدمي انها عاطفية خلقه

فكرت اليوم تجيب لها ورده ؟فاجاتها برسايل حلوه ؟

قلت لها لما تنوم عند أهلها انك اشتقت لها ؟

لما تكون لحالك فكرت بالأشياء الحلوه اللي تسويها لك ؟

ليه تحقر زوجتك لما تتزوجها وما تخليها حبيبتك؟

معقوله لما صار عندك وحده تصونك وتحفظ بيتك حقرتها ؟

تدري انه مره شئ قوي ويقهر أنها تعيش معاك محرومة من الكلام الحلو واللمسه الحلوه والمعاملة الحلوه وتبقى صاينتك وحافظه بيتك وتجيب منك عيال وتشوف الموت في الولاده.

لا انت اللي عيشتها جو ولا انت اللي خليتها تشوف حياتها

فكرت تحاسب على كلامك وتصرفاتك معها؟. محترمها من وراها ومن قدامها؟

قد مدحت لها الأشياء الحلوه اللي تسويها مثل ما تذكر لها الأشياء الشينه؟ تمدحها عند اهلك ؟

لبست شي سنع في البيت وتعطرت علشانها؟

بستها او ضميتها قدام أولادكم ؟<< لا تصير ثور عاد وتجيني بغبرتك اقصد بشكل معقول علشان يتعلمون أولادكم أن هذا الصح والمفروض يصير

سو هالاشياء اول بعدين تفلسف علينا بالمسخره مع ربعك وبالزواج الثاني والحب والغرام .

السالفة مو حياة ممله روتين ومقاضي بيت وسرير.
كذا تحسس زوجتك أنها آلة تفريغ وتفريخ

في النهايه
هذي أشياء والله حلوه وما تكلف
احب يكون عندي زوج يعشقني يسعدني ينبسط انه يقضي وقته معي يشتاق لي ويفكر فيني لما ابعد عنه
يفاجئني بأشياء لو كانت بسيطه يفتخر اني زوجته عند اهله واصدقاءه
يذكر محاسني اكثر من عيوبي يشوف خاطري واشوف خاطره ويقول أنا أسف إذا غلط علي



ملاحظه
*هالموضوع من سبة المشاكل اللي اقراها في قسم المتزوجين
ومعرفتي من حياة وتجارب المتزوجين حولي

*أنا قلت اللي عندي وإدري أن مو كل الناس كذا
*ادري الزواج مسؤليه بس بالله مو حلو تصير هالاشياء بحياة. المتزوجين؟
* لا توجهون الرد لي شخصيا اكتبوا الأشياء اللي تحبون تصير في النصف الاخر كذا كل واحد يفهم الثاني
لان معي أو ضدي أنا مقتنعه بكل كلمه كتبتها

__________________
استغفر الله وأتوب إليه