عزيزتي اختي هيا..

الحمد الله ان فيه تطورات ايجابيه .. لكن خليك حذره لأن بنت ابليس بتفقده بتحاول تدور عليه.. البلاك بيري مادام هو عطاك جهازه .. احذري منه ..لا ترجعين الثقه بزياده وبعدها تنطعنين طعنه اكبر ... لا ترجعين له جهازه ابداً وحتى لو يقول طفشان بأكلم اصحابي .. ترى الشيطان مع الطفش و التفكير بيقول له لا تحاكي الحرمه بس شوف ايش كتبت لك او ارسلت لك .. لا ترحميته اذا طفش وترجعينه له .. انتبهي تتراجعين في هذا الأمر ..
وكملي تذكير بالله ..لأن الكلمه اللي اثرت فيه ان شفاءه بيد ربي وعمليته ممكن تنجح وممكن لا ..هذا الوتر اللي حرك بصيرته .. وهذا اللي شاغل باله الحين هل رجله بتشفى او لا ؟ سبب له قلق شوي وحاله الطفش اللي فيه حاله قلق بالأصح .. وقولي له تصدق بالصدقه ربي يدفع البلاء وتطفي غضب الرب .. خليه يطلع يروح للمساكين في بيوتهم اذا تعرفون مساكين منها تغيير جو ومنها ان شعور العطاء وتفريج الكربات للأخرين متعه من من متع الروح ..و حقيقه نفسيه جميع انواع الرفاهيه للإنسان تحصل بالأخذ ماعدا الرفاهيه الروحيه لا تحصل إلا بالعطاء .. خليه ينفس عن طفشه بالعطاء الروحي .. وقولي له حديث الرسول ( داوا مرضاكم بالصدقه ) خلي ربي يكتب له نجاح عميلته وشفائه ..

وخليك معاه بجلسات المصارحه كملوا فضفضه ... قولي له اقسم بالله انك انت تشوف رجلك جانب نقص وانا والله ما اشوف اللي انت تشوفه ..واذا قال لك اي كلام فيه حساسيه ليه لبستي الشراب مثلا رجلي التعبانه وكذا .. لا تسكتين كأنك مأيده كلامه .. قولي له خل عنك هالخرابيط انا مااشوف اللي انت تشوفه .. خليه يحس ان شعوره هذا ماله اهميه بالنسبه لك ولا انتي تقصدينه ..
وقولي له والله لو لا قدر الله فيك شيء اعظم من رجلك ما فكرت فيه .. انا حبيت ذاتك و اخلاقك واصلك و و....الخ واستلميه مدح وارفعي من قدره فووق فوووق وقولي والله لو ان السنين ترجع وراء وجاني واحد مثلك او حتى لو ماله رجل من الأساس مو بس رجله فيه مشكله بسيطه مثلك واقسم بالله لأتزوجه واقبل فيه قولي له الناس تشتري معادن مو مظاهر خصوصا في امور الزواج لأنها مو يوم ويومين وإلا شهر وشهرين هذي عشره عمر ... قولي له لمن سويت العمليه ودخلت البنج خفت انك تموت بعد عمر طويل و اترمل بعدك انا مااقدر اعيش بدونك .. وانا ما اشوف اللي انت تشوفه انتي اللي حساس بزياده وقاعده تشوف الموضوع بالمجهر ..(اذا ماتقدرين او بينقطع الكلام بينكم لأي مقاطعه تبادلوا رسايل او ايميلات بينكم .. طلعي اللي في خاطرك وخليه يطلع اللي في خاطره .. خليه يفضفض وفضفضي .. صفوا حساباتكم )
ولا تخلين سبك لك و تطاوله عليك امر عادي .. علشان مايصير امر عادي عنده متى ما عصب كرر حركته ... ومو وقته تحاسبينه .. لكن خلي عفوك سمو نفس منك ورقي فيك ومن شيم الكرام غفرتي وسامحتي رغم قوتها عليك ..علشان سواد عيونه .. مشيتيها ..
-----
بااااين انك تحبينه يا هيا مرره و تغفرين وتسامحين والله لو احنى كان سوينا شيء قلبت الدنيا على راس زوجي ..مره سبني زوجي وهو معصب ...وزعلت عليه ولمن شفته بعد ساعتين .. رحت وسحبت اذنه ولفيتها لف من غير مااحس وقلت مره ثانيه لو يطلع منك هالكلام قصيت لساانك و خليتك تبلعه !!!! ... هو من الصدمه تقطع من الضحك ههههههههه قال اعوذ بالله قال انتي اندرتيكر (المصارع عرفتيه ) مو زوجتي اللي اعرفها !! ..قلت له اندرتيكر وإلا هوق هوقن .. تكررها بأوريك شغلك ..
ماحست بنفسي من العصبيه ..

---

واعتقد ان زوجك .. تجمعت عليه تراكمات .. صار يفسر انشغالك عنه باشغالك ورفضك للعلاقه الخاصه معه سابقا و بعدين زله لسانك بكلمه غير مقصوده منك ... فسرها انك زاهده فيه او مستغنيه عنه .. وصار يفسرها عدم احترام (عدم اهميته عندك ) بينما انتي العكس تحترمينه بس هو كذا فسر الموضوع ..



وبالنسبه لحركتك في مفاجاته بحركه هنود حلوه ..بس اخاف تجتهدين بزياده في الأكشن ويفاجئك برده فعل بارده وبحجم اقل من حجم حماسك ... فتصاابين بإحباط .. لكن خليها نص ونص شيء بسيط بنكهه هنديه ... (بالله عليك لا تلبسن ساري وإلا بنجابي .. استغلي الظرف والبسي لبس يناسب العلاقه الخاصه .. افضل .. واكتفي بنقطه حمراء بالروج حقت هنود في جبينك .. وعطيه هديه اكتبي معاها كرت .. مثلا ...( رفيق انا يحب انت كتيير مرره .. بس هذا شيطان سوي خراب بين انت وانا .. شيطان سوي انت واجد حساس وسوي خراب حق مخ انتا ومخ انا .. )

او اي شيء تبين تكتبيه ... انا اشوف يكفي الكرت والنقطه الحمرا في جبينك .. و بس ..

والله يوفقك وييسر لك امرك .. بس اخدميه ولا تحسسينه مره كأنه ماصار شيء مع بنت ابليس .. اخاف يضمن سماحك ويرجع يجرب يجس نبض اللي فقدها .. الشيطان ما مات ..