..في قلوبنا للأبد..

..في قلوبنا للأبد..

تقول مسافره "عاشقة الترحال" (مع بعض التصرف)
هذا الموضوع للفقراء مثلي الذين يحبون السفر بميزانية منخفضة ويحبون أن يروا العالم .. ومارح يكون قصة مثل ما هو نقاط يتخللها شرح لنقاط قد يغفل عنها البعض..

الموضوع يحتاج الى صبر وعزيمة ورواق عشان تقرأه.. لأني بصراحة تعبت فحبيت أخلي موضوع للناس اللي مثلي ..


ما قبل السفر :
ايطاليا بلد سياحي ويعتمد على السياحة عشان كذا كل شي غالي .. لما تجي تحط الميزانية حدد اذا تبغى تتمشى وتشتري ملابس او تتمشى بس مع كم قطعة .. الملابس ممكن تشتريها من أي مكان ولكن التمشيات صعب ترجع .. المهم اذا قررت السفر الى ايطاليا .. توكل على الله وبعدين :

1- لما تجي تحجز : افضل شهر وافضل جو في ايطاليا هو سبتمبر لأن في اغسطس يقولوا ان السوق يسكر .. كان الجو حلو بشهر سبتمبر شمس ومطر وجو روعة ..
اللي يبغا يسافر ايطاليا كذا يرتب نفسه :
روما 6 ايام بالكثير فينيسيا 3 ايام فلورنس + بيزا 3 ايام

2- لا تحجز فندق من هنا الا يومين لأن بعض المكاتب لصوص اخذت فندق قالوا ثلاث نجمات طلع نجمتين ولو اني اخذت نفس الفندق من هناك لكان ارخص لي ب 350 ريال في الليلة الوحدة تخيل. لما توصل هناك شوف الفنادق واسأل عن الاسعار ممكن تروح بالمطار وتقول انا ميزانيتي مثلا 120 يورو لغرفة مزدوجة والحرمة تدور لك . انا ما سويت هالحركة الا في فينيسيا .

3- التأشيرة ممكن تسويها عن طريق المكتب وممكن تسويها انت استوفي الطلبات اللي يبغوها ورح تجيك تأشيرة 90 يوم انا طلبت عشر ايام حطولنا 90 يوم .

4- اشتري نظارة شمسية وشميسية عشان الشمس او المطر من هنا لأنها هناك غالية . يعني الشمسية هنا 15 او 10 ريال هناك تلاقيها 30 ريال . طبعا لازم يكون معاك كاميرا . ولازم تاخذ مكواه عشان تكوي الملابس الناس هناك مذوقين بالللبس صحيح اغلبهم سبورات ومزلط وحالتهم حالة بس فيهم ناس مذوقين بقوة .

5- عشان انا كنت مرعوبة من اللصوص اشتريت شنطة من الكترو تلبسها من تحت الملابس او زي الحزام او ممكن شي ينربط بالساق تحط فيه الفلوس او الجوازات وكذا . انا ما استخدمتها بس كنت خايفة على شنطتي .

6- بالمناسبة المسافة تقريبا 5 ساعات الى روما نصيحتي اقرأ الكتاب الايطالي وتعلم كم كلمة يفضل يكون شريط عشان تعرف كيف ينطقوا الكلمات لأن الايطاليين ما يعرفوا يتكلموا انجيلزي بس مرة طيبين ويساعدوك بكل ما عندهم وبالاشارات يمشي كل شي خخخخخخخخخ .

7- اهم نقطة الحجاب انا كنت خايفة لأنهم قالوا ارهاب وما ادري ايش بالعكس كان شي عادي اننا محجبين وانا نويت اتغطى المرة الجاية ان شا الله مالهم شغل في احد الشعب طيب بصراحة .
************************************************** ************************************************
في روما..
اول يوم اقترح عليك تروح ساحة اسبانيا وتجلس فيها .. واذا تقدر تمشي شوية اتبع الخريطة واسأل الناس رح تلاقي نفسك عند فونتانا دي تريفي اللي هي نافورة الاماني وفيها فلوس الدنيا .. تروح ساحة اسبانيا فيه هناك سوق وواحد بنجلاديشي مو زي اللي عندنا يتكلم انجيلزي وايطالي وعربي بعد يبيع كستناء ب 5 يورو يعني ثلاثين ريال .. احنا كنا نحسب خمسة يورو يعني خمسة ريال!! . في ساحة اسبانيا تشتري بيتزا وعصير وتجلس على الدرج وتتفرج على الناس المنظر حلو والجو والجلسة روعة بحسب اللي انت معهم وبعدين لما تخلص فلوسك اخر الايام روح اجلس هناك الساحة روعة مناظر من نافورة فونتانا دي تريفي

ثاني يوم تروح محطة تيرمني طبعا التذاكر حقت الباص والمترو هي نفسها ب 4 يورو تذكرة لليوم كله بواحد يورو تذكرة ل 70 دقيقة بس .. عموما بالباصات مافي احد يشيك على التذكرة عشان كذا بصراحة ما اشترينا الا من تذكرة يورو واحد بس بالمترو لازم تدق الكرت او بالباص لأنه في غرامة اذا ما سويت كذا انا بصراحة ما كنت اعرف عن موضوع الغرامة لأنو ما في احد يفتش وبصراحة البلد غالي .. يعني قلت نوفر شوية .
المهم رح تاخذ الحين باص 110 اوبن اللي يجي دورين انصحك تاخذ أي باص من شركة ثانية باص 110 هو اللي يروح اكثر الاماكن وكل شوي يجي يعني ما رح تنتظر كثير تروح تشتري التذكرة اللي قيمتها للشخص 13 يورو وتعطيك خريطة .. المهم رح تلاقي طابور طوووووووووويل هو هذا حق 110 اوبن تروح توقف فيه بس لا تخاف رح يمشي بسرعة .. تدخل الباص تعطيك سماعة كل مارح معلم رح تتكلم حرمة بالانجيلزي في كذا لغة انت تابع الراديو لين تسمع الانجليزي . التذكرة بالمناسبة لليوم كله وبصراحة انصحك لا تضيع الفرصة يعني دور بالباص بالصباح واستخدم التذكرة كمان بالليل كل شي رح تشوفه شي ثاني.
شكل الباص واللوحة اللي لما تشوفها توقف عندها

صوره

الأماكن اللي لازم تشوفها :
الساحات : ساحة اسبانيا - ساحة فينيسيا - ساحة نافونا - نافورة فوناتنا دي تريفي .
الأماكن التاريخية : كولسيوم - الفاتيكان او سان بيترو - قلعة سان انجلو .
الحدائق : انا رحت فيلا بورقيزي وحديقة الحيوان بس . في حديقة اسمها تيفولي ما عرفت كيف اروح لها بصراحة . ولما عرفت ما كان فيه وقت .
برج بيزا المائل في مدينة بيزا تسافر له لازم وانا احس اللي يروح فلورنسا يقدر يروح بيزا لأنهم على نفس خط العرض وبينهم ساعة بس وبيزا بلدة صغيرة جدا .

بالمناسبة ساحة فينيسيا جنب محطة تيرمني ومنها تقدر تدخل على الشارع حق ديل كورسو..

************************************************** ************************************************** ****

العرب الموجودين في ايطاليا كانوا ملاك الرحمة بالنسبة لي وكنت انبسط لما يمر احد ويقول السلام عليكم .. كنت اسألهم كثير لقيت ناس ضايعين مثلي ولقيت ناس عايشين بالبلد وفاهمين وساعدونا الله يجزيهم خير .


بالنسبة للتسوق في ايطاليا السوق عبارة عن شارع وفيه محلات وكلها اسعارها غريبة يعني ماركات واسعار من ابو اربع ارقام طبعا تقدر تشتري وتطلب التاكس فري عشان لما تسافر تسترجعها بس بصراحة الماركات موجودة عندنا انا اتعرفت على ايطاليين ودلوني على اسواقهم الرخيصة وفيها اشياء روعة وتهبل بعد .. اول شي شارع اسمه ماركو انا كان قريب من فندقي بس اتوقع اللي يبي يروح للسوق ياخذ باص من تيرمني لهانك اتوقع باص رقم 611 . وفيه اماكن ثانية بس والله ما عرفت الاسماء حقتها .. لقيت البنطلون عندهم بما يعادل 10 ريال وتي شيرتات بما يعادل 20 ريال وتكون مرة حلوة وقماشتها ممتازة بس سوق ماركوني كبير وعلى الناحيتين محلات .

سوق ديل كورسو ممكن تلاقي فيه اشياء وشارع ترايتون كمان بس شارع فينتو زي النار .. على فكرة انا كنت اركب باص رقم 175 عشان اروح الفندق وبالصدفة شفت الشوراع وصرت انزل في كل شارع واذا لقيت شي اشتريت وبعدين ارجع المحطة واكمل.

بالنسبة للباصات لما تنزل عند محطة وانت راجع خلي بالك رح تاخذه من الشارع المقابل . وبعدين تشوف اذا مثلا رقم باصك 175 شوف مثلا هو باديء من وين بدأ من تيرمني وين رح يروح مكتوب اسماء الشوارع والشارع اللي انت فيه يكون محدد باللون الاحمر . انا حفظت اسم الشارع وصرت أي باص اشوفه يروح شارعنا اركب فيه او اروح تيرمني ومن هناك اخذ باصي . طبعا انا ضعت كثير ومشيت كثير كنا نمشي على الاقل ساعة او ساعتين لأننا كنا نضيع بس كان ضياعنا حلو كنا نكتشف اماكن كثيرة بسبب الضياع .

فونتانا دي تريفي اللي هي نافورة الاماني هذي زحمة دايما ليل مع نها ر الناس بالكوم هناك وفيها فندق قدام النافورة اسمه فونتانا يعتبر بالنسبة للمنطقة روعة الليلة فيه اتوقع 1000 ريال او 800 ريال والرجال اعطاني ورقة فيها اسعار اسعارهم ترخص في اللو سيزن .. اللي هو اعتقد شهر يناير وجزي من شهر اوغست .. يعني اللي يسكن بها الفندق يستمتع يروح يتمشى واخر الليل يجلس يتفرج على الناس بالنافورة صراحة روعة .

..في قلوبنا للأبد..

بالنسبة للأكل مرة قلت للرجال هذا فيه خنزير قال لاء بس مقلي بزيت الخنزير وبعدها صرت اخاف اكل .. المهم انا طحت على مطعم قريب مننا اسمه بالعربي ايه الطعامة دي .. اصحابه مصريين واكلهم لذيذ يسووا مأكولات ايطاليا ومصرية بس انا كنت اكل منه لأنه قريب من فندقي هو يقع قريب من محطة بيرميد هناك منطقة بيرميد يعني الهرم معظمها مصريين . طبعا رح تشبع بيتزا وبصراحة البيتزا لزيزة بالمرة . وهناك رح تعطش انصحك تشتري موية من اقرب محل مو من الاماكن السياحية لأنهم يبيعوها غالية الاماكن العادية تبيعها 80 سنت يعني 4 ريال ما بالك بالاماكن السياحية .. وطبعا رح تشتري جيلاتو اللي هو ايس كريم خصوصا اذا كنت تمشي بالحر وتحت الشمس لحظات اتمنى لو انها ترجع .


ساحة نافونا ساحة حلوة والجلسات فيها تهبل .. اجلس بأي مقهى واطلب متوسط الطلبات للشخص 10 يورو مثلا ايس كريم او اناناس مثلا ما انا طلبت .. الاناناس عندهم في ايطاليا زي السكر طعمه يجنن .. . بالمناسبة احنا جلسنا هناك عشان الله يكرمكم كنا نبي دورة المياه وجلسنا بالمقهى عشان هذا السبب ولكن الايس كريم والاناناس والقهوة والجلسة نفسها كانت روعة .
الساحة طويلة وفيها ناس يبيعوا بضايع مقلدة وغالية اصحكم تشتروا موجودة نفس الاشياء المقلدة في سوق وشيقر وعويس وطيبة .. وبعدين الشنطة عندنا ب 15 او 30 ريال تشتريها هناك ب 50 ريال .. ونصابين بالحيل تقول كم هذا يقول 35 يورو تقوم تمشي يجيك يقول خذيها 20 يورو خذيها 15 يورو وفجأة بقدرة الله من كثر ما يلح رح تشتريها وتلاقي الشنطة لفها في كيس وصارت بيدك .. لزقة تراهم بقوة يبيعوا هناك وفي ناس رح تلاقيهم يكتبوا الاسماء بالصيني وفي واحد يسوي الاسماء بالحديد انا شجعتهم عشانهم مسلمين وشريت هدايا وكذا .


الاوتيل انا طلبت من المكتب اني ابغى فندق جنب محطة تيرمني بس انا ما كنت اعرف حطني جنب محطة اسمها بيرميد بعيدة بالمرة عن وسط البلد بس انا كنت مستمعة اركب ببلاش واتفرج على البلد الفندق اسمه بيرميد من السعودية تاخذ الليلة ب 650 ريال من روما من نفس الفندق يعطوك ياه 70 يورو يعني 450 ريال الفرق 250 ريال كل ليلة الفندق كان نجمتين فيه فطور الفطور عبارة عن كروسان وقهوة وزبدة وعصير اناناس او برتقال ومربي وبس .. ما في مصعد بس الحمد لله كنا بالدور الاول التلفزيون خربان والثلاجة بالقوة تشتغل وعشان تولع المكيف لازم تتصل بالاستقبال وتقول شغلوا المكيف .. بس احنا ما كنا نجلس بالفندق الا ساعة النوم .. على فكرة ممكن تاخذ رحلات من الفندق وتسأل الناس بالاستقبال .. وبصراحة ما عندي استعداد ادفع اكثر من 1000 ريال بالليلة في فندق .. الفنادق غالية عشان كذا رح تضطر تاخذ من فنادق ثلاث نجوم ونجمتين .. انا بالبداية كنت خايفة الفندق مافيه سيكورتي ولا شي بس البنت اللي بالاستقبال بس ربي حمانا الحمد لله .. وجنبنا كان فيه مقهى انترنت وكان فيه سوق ومطاعم والمنطقة عموما حلوة بس بعيدة شوي طبعا ما في احد يشيل الشنط بالفندق لأنه نجمتين والله انكسر ظهري شي مو طبيعي بس الشي الملاحظ في ايطاليا ما يطلبوك بخشيش تعطيهم اللي تعطيهم ياه وبعدين كل واحد يخدم نفسه خصوصا بالشنط والسفر وكذا اذا تبغى تعطي بخشيش تحط 10 سنت او 20 او 50 سنت او يورو يقدروك بقوة


بالنسبة للجوال احنا خلينا جوالاتنا دولية ما تسوى نشتري شريحة على 16 يوم .. وبعدين ما استخدمناها اللهم الاهل كلمناهم مرتين وعليها . طبعا لما توصل الجوال رح يقولك مرحبا بك في ايطاليا ويعطيك رقم الخطوط السعودية والسفارة غلط .. عشان كذا خذ رقم الهاتف 06844851 انا كنت رح ارسل فاكس للسفارة بدل ما اروح اسجل الجواز بنفسي بس خفت ورحت بنفسي مع ان الفندق فيه فاكس ولكن انصحكم لا تروحوا السفارة مشوار على الفاضي واستقبالهم صحيح حلو وتجلس مع القنصل وكذا والسفارة مافيها شغل عشان كذا سووولي قضية لما صورت السفارة من برة ومسحولي الشريط .. المهم ارسل فاكس واشتري راحة بالك . المهم نكمل سالفة الجوالات فيه ثلاث شركات تيم وفودافون وشركة ثالثة انا اخترت تيم يقولوا انها احسن شركة رح تجيك ر سالة اختار المشغل اختار تيم وخلاص .


بالنسبة للكولسيو اول ما تنزل من باص 110 هو اول محطة رح يكون تنزل فيها تروح تتمشى فيه ووقت ما تبغى تروح للمحطة توقف هناك يجي باص كل 10 دقايق تقريبا المهم الدخولية للكولسيو 10 يورو بصراحة الطابور طويل المهم شفت اسعار الجروبات قالت النفر 18 يورو ما رضيت وقنا بالطابور جا رجال وقال جروب بالانجليزي والظاهر انهم تابعين لنفس القائمين على الكولسيو كان 13 يورو قلنا 13 يورو اهون من 18 يورو ورحنا ودخلنا على طول انا جلست مع الجروب والحرمة كانت تشرح بس كنت اخر وحدة ومني شايفة شي عشان كذا تركتهم وصرت كل ما اشوف جروب مرشدهم يشرح بالانجيلزي اوقف شوي معهم وبعدين طنشانهم وجلسنا نتصور . جنب الكولسيو فيه الفور امباريالي بس انا ما دخلته رحت اتصورت من برة وطنشته كل شوي ندفع دخوليات عشان مقابر .. طبعا اهلي كانوا يزمجروا كل شوي جايبتنا بيوت مكسرة ومقابر .. وهذا من احد اسباب عدم استمتاعي بالاشياء التاريخية . قبل ما انسى الكولسيو اكثر من دور الدرج حقه مؤلم قديم وشكله يخوف اذا معكم احد كبير لا تتهوروا وتطلعوه انا قلبي عورني على اهلي بس عشان ما كنا نبغى نفترق ..


بالنسبة لحديقة الحيوانات فيه تخفيض للناس فوق 65 سنة انا اخذته لأهلي وبصراحة البنت هناك طيبة ومتعاونة جدا الدخولية 8 يورو للشخص واذا تبغى تروح الريبتال هاوس تدفع 2 ونص يورو الحديقة كبيرة بالمرة ويعطوك خريطة احنا اول شي ركبنا القطار النفر بواحد يورو تشوف الحديقة كلها بعدين رحنا الريبتال هاوس يركبوك في شي زي الطيارة ويحطوا فيلم لمدة ستة دقايق يجي عجوز وحرمة دمهم خفيف يقالهم .. المهم يخلوك تشوف الحيوانات اللي انقذوها لحديقة روما وبعد كذا تدخل مكان تشوف جميع انواع واشكال الزواحف اشكالها غريبة سلاحف وتماسيح وثعابين وكذا بالمناسبة دورة المياه موجودة بالريبتال هاوس نفسه ونظيفة بعد ملاحظين اني اتكلم عن دورة المياه كثير ايوة ما علينا المهم نكمل .



لو كنت تبي توفر الدخولية لحديقة الحيوانات فيه مواقف السيارات برة فيها مدخل للحديقة جنب البوابة اللي تدخل منها انا لو ادري كان دخلت منه والله ضاعت الفلوس في الدخوليات ..


فيه بطاقات وصور تذكارية عن البلد فيه ناص يبيعوا الصورة الوحدة 50 سنت نصابين رح تلاقي اماكن تبيع 20 كرت بواحد يورو الكروت هذي تنفع لما ترجع وتهدي للناس تكتب عليها الاهداء .

شارع فينيتو فيه سينما وفيه مطاعم حلوة وفيه الفنادق الفخمة وسوق اغلبه ماركات .

حديقة بورقيزي جنب حديقة الحيوانات عشان كذا انصحك تروح يوم كامل المنطقة هذي تروح تيرمني ومن هناك تاخذ باص 910 تنزل عند الحديقة بالمناسبة السفارة السعودية جنب حديقة بورقزي بس دخت عشان اوصلها .. المهم حديقة بورقيزي فيها متحف اللي هو الفيلا انا دخلت لحالي 8 يورو الدخولية والله تخلف راسمين المسيح واعضاؤه التناسلية والناس متأثرة وانواع الدلاخة ومسكتني وحدة بريطانية وقال انها اعجبت فيني لأني مهتمة باشياء النصارى واستحيت اني دخلت المكان والله .. المهم في شمال الحديقة رح تمشي وتعدي من شارع الحديقة كبيرة تسأل عن البالون وهما يقولها بالوني تروح المنطاد روح بايام الاسبوع لا تروح بالويك اند يصير غالي المهم الاطفال ستة يورو والكبار 18 يورو ايام الويك اند وايام الاسبوع 15 يورو واللي فوق 65 سنة 11 يورو بس بصراحة اللي فوق 65 سنة الواحد يخاف عليهم يطلعوا بالمنطاد .. المهم تطلع 15 دقيقة تشوف روما من فوق منظر بانورامي خيالي ..



اتمنيت يكون معي اطفال لقيت كذا اعلان بخريطة روما عن مركز اسمه اكسبلورر يعلموهم اشياء واكتشافات وكيف يتطلعوا للمستقبل .. وفيه مكان ثاني بالخريطة اللي هو كيف تشوف روما بالسينما موجود المكان في شارع ديل كورسو اذا ما خاب ظني بس اهلي ما وافقوا نروح نظرا لأني اكبر الاطفال الموجودين .

بالنسبة لقلعة سانت انجلو هي قريبة من الفاتيكان بس المشي مسافة مو بطالة كثير .. المهم قلعة سانت انجلو اطلع فيها واستمتع واجلس في المقهى اللي فوق رخيص مهو غالي يعني تحط ميزانية للشخص من 8 الى 10 يورو وممكن اذا جلستوا خمسة اثنين يطلبوا او ثلاثة مو لازم كلكم الجلسة تهبل وبصراحة الجو يرد الروح انا ما قدرت اجلس لأني طلعت لحالي طبعا ..
اكتشفت وانا خارجة تن فيه مصعد يعني لو معكم كبار بالسن تقدروا تستخدموه بس بصراحة الطلوع على الممرات لين توصل القمة شي ممتع ما يتفوت . طبعا بالممرات كانوا اهلي يصرخوا ثمانية يورو عشان نطلع في هذا الممرات مو حرام عليكي الحين لو طاح المبنى علينا وانا اقول اسكتوا بلاش فضايح يمكن يكون هنا احد يفهم عربي .. بعدين وصلنا منطقة منها يا اما تطلع فوق يا اما تطلع برة اهلي حطوا كراسي وجلسو كنا شايلين معانا كراسي

افضل انك تروح في جولة 110 اوبن يوم السبت او الاحد كثير ناس يتزوجوا وتشوف موديلات الفساتين.. لما رحت في باص 110 وشفنا روما كلها احنا لما وصلنا الفاتيكان او سان بيتر و كنا ميتين لأننا ضعنا قبلها عشان نلاقي الباص وما عرفنا نرجع المهم رحنا يوم ثاني وقلت ما اطلع الا لازم اروح الفاتيكان قلت 110 طويل وزحمة رحت باص اسمه كرستينا روما التذكرة 13 يورو بس طلع فيه مصيبة ان الباص بالفعل يروح لسان بيترو بس هو ما يروح الا للكنائس والاثار النصرانية اثر الباص كريسيتيان روما ولكم ان تتخيلو شكل مسلمين راكبين بكل ثقة بالنفس بهذا الباص .. في الفاتيكان الايس كريم كان 3 يورو يعني 15 ريال ومهو طعم المحلات الثانية اطعم بكثير لا تشتروا الايس كريم من السيارات اشتروه من المحلات عندهم نكهات روعة . في هناك كرته تركبها 150 يورو يعني 750 ريال يحلموا اني اركبها ..


كنت اسأل الناس كثير وتعلمت كلمات ايطالية من الناس سينسترو ودي نسترو يعني يسار ويمين المهم مرة ركبت باص من محطة تيرمني سألت السواق تروح ساحة اسبانيا قال نمر قريب منها ركبت بالباص وقالي خليكي قريب ولما قربنا كان يسوق ويشرح لي كيف امشي لين اوصل ساحة اسبانيا والله قدرت الرجال احنا كنا متوقعين الناس يعاملونا سيء كثير منهم وقفوا للوالدة بالباص عشان تجلس وكان فيه مرة حرمة ايطالية طيبة سألتني انتي من وين وبعدين سألتني عن المحطة وكانت محطتنا اخر شي قالت انا رح انزل معاكي انا اوقف شوي وانتي شوي وكنا انا وياها نتناوب على المقعد بالباص طبعا الباص كان يصير زحمة الساعة اربعة او خمسة العصر لأنه وقت خروجهم من الدوام الوقفة بصراحة مهي مشكلة بس المشكلة الرجال يختلطوا بالحريم تشم روائح والناس محترمين بس تضطر تلزق بالناس .. وكانوا يقدرونا اننا مسلمين فيه رجال ايطالي خلاني اوقف بالزاوية جنب حريم عشان لا اصير جنب الرجال .. انا اقول الكلام هذا عشان الناس اللي جلسوا يخووفنا قبل لا نسافر .


عشان لا يصير فيكم مثلي كنت اشتري موية وتطلع موية مع غاز زي طعم مياه بيريل ما ادري ليش يحبوها شكلها زي الموية العادية كنت ما افرق وما اعرف اقرأ ايطالي عشان كذا كنت اسأل واقول بدون غاز تقول ايه اقوم اشتريها او تبدلها الحرمة .

اليورو يعادل 5 ريال اصرف من السعودية احسن لك من السعودية تصرف اليورو 4ونص تقريبا او 4 و 60 هللة . قبل ما انسى الكهربا هناك 220 فولت .

الدولار عندنا بالسعودية ثابت عشان كذا لو كان الدولار برة مرتفع اكسبها فرصة واصرف من هنا بالدولار وبيعه هناك يطلع لك فرق بس انتبه لا يكون الدولار نازل برة .. كل 81 يورو يعادل 100 دولار .

لا تاخذ ملابس كثيرة خذ مثلا بنطلون جينز والباقي تي شرتات لأنك انت اللي رح تشيل الشنط دايم غير الاشياء اللي ممكن تشتريها . يفضل تكون الشنط من النوع اللي ينسحب الشنط لأنك رح تمشي كثير بالشنطة خصوصا في فينييسا

هذا كل ما عندي بالنسبة لروما.


صوره

صوره

..في قلوبنا للأبد..

1- تروح تيرمني تشتري التذكرة التذكرة رايح جاي من روما لفينيسيا على قطار اليورو ستار وهو احسن القطارات 78 يورو للشخص اول شي تروح مكتب الانفروميشن وتاخذ رقم يجي دورك تقول للرجال وين تبغى تسافر واي تاريخ وهو يعطيك القطارات اللي بهذاك اليوم وانت تختار وبعدها رح يقولك عند أي كاونتر تروح توقف لأني رحت وقفت بكاونتر غلط بعد طول انتظار .

2- التذكرة تصمها زي اسمك كل شي فيها له دلالة انا صار فيني مقلب عطاني التذكرة من روما الى فينيسيا ميستري مو لفينسيا لوتشيا فينيسيا ميستري تبعد 15 ميل عن فينيسيا لوتشيا اللي فيها التمشيات المهم انا ما نزلت في فينيسيا ميستري لأن القطار اصلا مشي ومافي احد جا راقب علينا بس بالرجعة اشترينا تذكرة بواحد يورو تركب أي قطار من فينيسيا لوتشيا رح يوقفك في فيينسيا ميستري وتنتظر قطارك هناك بس عشان لا تدوخ خذ التذكرة روما – فينيسيا لوتشيا . وعموما لو صار فيكم مثلي الجهاز كل شوي يقول اسماء المحطات . بالتذكرة رح يكون مكتوب رقم المركبة والمقاعد ورقم القطار اتعلم ميف تقرأ التذكرة ومارح تضيع ابدا انا ما خليت احد بالمحطة ما سألته اهلي شكاكين يقولوا يمكن غلط ليش نوقف هنا ما ادري ايش . بس الحمد لله كل شي كان ماشي تمام .
Corrozz 11 يعني المركبة 11 من القطار
Posti 24 ,27 يعني المقعدين رقم 24 و 27

3- وصلنا فينيسيا لوتشيا رحت وسمعت كلام اخونا في الله ايطالي وكانت مغامرة لأننا ما نعرف اسعار الفنادق وكنت احاول ادخل المنتدى بس ما كنت اقدر اكتب المهم رحت مكتب الفنادق وطلبت اوتيل وقلت لها ابغا شي بحدود 100 يورو قالت خذي فندق ماركوني ثلاث نجوم 120 يورو الليلة وقالت لي هذا ارخص شي عندي اخذت الفندق ورحت وفي فينيسيا يبيعوا الخريطة 2 يورو مهي ببلاش المهم علمتني أي باص اركب الله يهديهم ما يعرفوا انجيلزي يعني يقولوا الارقام غلط الحرمة قالت خذي باص 98 وهي قصدها 28 لأنه اصلا مافي باص مائي رقمه 98 المهم الفندق طلع عند جسر ريالتو كنا نتمشى ونرجع نجلس بالفندق ونتجول بالمنطقة كل الدنيا والسياحة هناك موظف الاستقبال اللي اسمه كارلو انسان متعاون جاب لنا عروض عشا بمطاعم وعروض سياحية تشوف فيها فينيسيا كلها زي الباص حق 110 بس باص مائي وشركة ثانية .. واعطانا الفندق جولة مجانية لمصنع الزجاج وشرحوا لنا كيف يصنع الزجاج بالنفخ وقعد الرجال قدامنا يسوي كذا شي اتذكرت ايام كنت بالمدرسة وكنت معلمة الكيميا مستنفرة على صنع الزجاح ثلاث اسابيع وهي تعلمنا الرجال في خمس دقايق علمنا وبعدين طلعنا لسوق الزجاج وكنت زعلانة لأنو ما كان معي فلوس اشتري هناك الاكسسورات الزجاجية غريبة السلاسل والخواتم وكل شي كان غريب غالي بس غريب ومافي مثله .

4- نصيحة لوجه الله خذ فندق ما يكون وسط حواري في فينيسيا عشان لا تدخل بحواري وتضطر تركب تاكسي خاص حط الفلوس في فندق على الشارع العام احسن لك .

5- اكتشفت ان جسر ريالتو ممكن بالمشي توصل منه لساحة سان ماركو ..
6- فينيسيا مافيها شي غير انها جزيرة من الجمال الفاتن والمناظر الخلابة .
7- جولة بالجندول تكلف 70 او 100 يورو بس انا قلت له خذني وقت اقل ودفعت 50 يورو اهم شي عندي كان اني اركب الجندول لأنك في فينيسيا رح تطفش من البحر كل شوي رح تركب باص مائي ..
8- تذاكر فينيسيا غالية في المواصلات تذكرة الساعة خمسة يورو تذكرة 24 ساعة 10 يورو للشخص بس ما دققوا علينا عشان كذا اشتريتها اول يوم بس وبعد كذا ولا اشتريت شي .
9- فينيسيا بلد الاناقة يعني احنا قلنا موية وما ادري ايش طلع بالعكس البس كويس واتشايك عشان لما تدخل المحلات يحترموك الناس هناك انيقين بقوة .
10- امنية حياتي اني اروح فلورنس او فرينيز على قولتهم بس خسارة ما قدرت اروح .
11- فينيسيا حلوة ويومين قليل عليها فيها اماكن كثير ما رحتها انا جلست فيها بس يومين ساحة سان ماركو وجسر ريالتو وفي شي عند السالوت ما شفته .
12- في ساحة سان ماركو رح تطلع الكنيسة اللي هي ستة ادوار الدخولية 6 يورو وبعدين رح تدخل الدوج بالاس .. وفي اشياء ثانية كل يوم كان يغيروا الصورة مرة بيغ بن ومرة برج ايفل واشوف الناس طابور بس كنا تعبانيين وما رحنا .. وفي سوق في ساحة سان ماركو وجلسات حلوة وانا جلست بناءا على نصيحة اخونا فؤاد صاحب موضوع رحلتي الى ايطاليا بالصور جلست في مقهى مافيه عزف عشان لا تطلع الفاتورة عالية 90 يورو جلسنا هناك والجلسة ترد الروح كان النفر 8 – 10 يورو يعتبر عادي بالنسبة لساحة سان ماركو .. طبعا من 8 – 10 يورو هذا يعني انك تطلب مثلا بيبسي او عصير برتقال او شيبس .. وتسمح لك الحرمة تجلس لو ثلاث ساعات اهم شي تطلب حاجة .. والناس كلها تسوي كذا .. في ساحة سان ماركو فيه الحمام تشتري بواحد يورو الكيس وتأكلهم يطلعوا فوق راسك وياكلو من يدك انا كيفت عليهم وعشان كذا ضيعت كل فلوسي على الحمام وكانت امي تصرخ وتجيب لي بسكوت وتقول وفري الفلوس حرام علييكي احنا اولى فيها .. والله لحظات خيالية خصوصا لما ينزل المطر وانت بالساحة .

13- وانت راجع لبلدك من مطار فامتشينو خلي معاك فلوس السوق حلو وبدون ضرايب وفيه عندهم كل شي 12 يورو على بالهم زي محل كل شي بريالين .. .

14- في اشياء كثير ببالي ولكن ما ادري احس حاست الدنيا فوق راسي .. اكتشفت ان كتابة التقرير صعب موسهل .. وبصراحة ياخذ وقت .. ادعولي اذا استفدتو من الموضوع ..

15- هذي اخر كلمة قرأتها واحنا رايحين نركب الطيارة في عودتنا باي باي روما .. عرفت لحظتها ان ايام ايطاليا انتهت ورح نرجع خلاص كنت مشتاقة للسعودية غرفتي اشتقت لها ... بس الحين نفسي ارجع لايطاليا بصراحة . الصور رح تلاقوها بين الموضوع الحين رح انزل الموضوع اول .. والى رحلة اخرى مع عاشقة الترحال .




تكاليف السفر :
التذكرة : 3000 ريال او 2700 ريال
التأمين 180 ريال للناس تحت 65 والضعف اذا كان معكم من هو فوق 65
الفيز ا : 162 ريال عن طريقك عن طريق المكتب 300 ريال .

الفنادق ثلاث نجوم الليلة 100 يورو الى 120 يورو في روما وفينيسيا ..
متوسط الصرف اليومي 50 يورو للشخص .

طبعا لأنك رح تجي ايام تصرف اكثر ورح تجي ايام تصرف اقل . اذا ماسك نفسك 30 يورو او 20 يورو - اذا مبحبح الدنيا والدعوة فشخرة توصل 100 - 200 يورو للشخص .. واذا انت بالمتوسط 50 يورو باليوم ..
اما اذا ناوي تشتري ملابس حط ميزانية مثلا 500 يورو للملابس او 1000 يورو خلال السفرة كلها وهذي تحطها على جنب .
احنا سويناها 50 يورو والفلوس اللي زادت رحت سوق ماركو اخر يوم واشتريت الهدايا وفي كم شي لقطته اثناء الرحلة ..

..في قلوبنا للأبد..