السلام عليكم ورحمة الله وبركاته
انا والحمدلله متزوجه من سنتين من انسان احبه جدا وهو يحبني حب شديد .. حياتنا مستقره من كل النواحي واجمل شئ بيننا الصراحه .. زوجي انسان يخاف الله ومستقيم واخلاقه عاليه جدا جدا وهذا الشئ اللي معلقني فيه بزياده .. واحيانا اشعر انه اكبر من سنه ودايما ينتقد الشباب على تصرفاتهم الطايشه ..
انا حبيت اعطيكم صوره عن زوجي اللي اثق فيه وعمري ماظنيت فيه الا الخير ..
قبل يومين سألته ايش رايك في الشات طبعا هو انتقده وان الناس اللي تدخله فاضيه واغلبهم شباب يدورون على بنات والعكس .. وقالي انا زملائي اغلبهم يدخلونه ويستغربون مني اني ماادخله ومره وحده دخلته ولقيته تافه ومضيعه للوقت وبعدها مادخلته .. نقاش عادي وكنت متوقعه رد زوجي لاني اعرفه كويس ..
اللي صار امس زوجي كان فاتح الماسنجر ويكلم زميله بالجوال وانا جنبه سبحان الله ما ادري ايش اللي خلاني اشوف الايميلات اللي عند والناس اللي ضايفهم عنده ..
انصدمت صدمة عمري ..
فاطمه.. عايشه .. نوال .. الحلوه .. سويتي .. جواهر .......!!!!!
طبعا ما يحتاج اوصفلكم شعوري قعدت اصيح وانفعلت وانت تكذب علي طول الوقت تقول عمري ماعرفت غيرك .. وانا ماراح اثق فيك بعد كذا .. ايش تتوقعون ردة فعل زوجي ؟؟
قعد يبكي ويضمني ويجري وراي للغرفه ويحلف بالذي رفع السماء انه قبل سنوات وقبل ما اتعرف عليك وقبل مااتزوجك .. وحلف عمري ماكلمت بنت بالتلفون كانت مجرد دردشه ماسنجر ..
طبعا انا جن جنوني من وين عرفتهم .. قالي من الشات وهم اضافوني .. قلتله تضحك علي .. اكيد انت اعطيتهم ايميلك او اخذت ايميلاتهم .. يحلف يقول هم ياخذون ايميلي بدون ما ادري ويضيفونه عندهم وقالي وهذا مو شات المنتديات العادي لا في الياهو .. طبعا انا مااعرف في ذي الامور لكن اللي اعرفه انه قبل اضافتهم وكلمهم ..
طبعا طول الليل يحاول يراضيني وانا ما اكلمه ..
والله من الصدمه .. عمره ماجا في بالي ان زوجي كان يكلم بنات ولا يسوي كذا دايما صورته في بالي النظيف الشريف المثالي ..
انا في داخلي مصدقته ومصدقه انه كان طيش شباب طبعا انا سألته ليش مخليهم للان مادامه قبل سنين على قولتك قالي والله هذا ايميل قديم ماادخله كثير ونسيت احذفهم .. ويحلفلي انه تاب ومن يوم تزوجني ما عرف غيري ..
ابغى منكم التصرف الصحيح انا اكيد راح اسامحه لان الله غفور رحيم ..
لكن ماودي ارجع بسرعه واسامحه على طول .. نفسي ينقرص شوي يعني يحس بفداحة الموضوع ..
ارجوكم اشيروا علي لوكنتم مكاني ايش تسوون ..؟؟

أخيتي رأيي ان مامضى قد مضى..ولقد عنفتي زوجك وحلف بأنه ماضي..وانتهى نعم اصدمتي فيه..واراعي

شعورك بالصدمة ولكن لاتتركي هذا يؤثر على حياتك..

خاصمي زوجك كم يوم كي يحس بخطأه وثم اتركي الحياة تعود لمجاريها..

والله يسعدك

أختك

حائزة الأمل

__________________

اختي مدامع ...
أرحب بك أجمل ترحيب نيابة عن اعضاء المنتدى والاداريين
صدمتك هذه طبيعيه ، لانك لم تتوقعي ان يحصل ما حصل...
هنا سؤال مهم :
هل تصدقينه فيما قال انها قديمه وقبل زواجك به ؟؟
اذا كنت كذلك فلماذا الزعل الذي لاينفع ويضرك؟؟
اري ان لا يمتدد غضبك لتحسسيه بمكانته لديكِ ...
فمن واجب زوجك عليك ان تصدقيه ...

اسأل الله ان يثبتك ويعينك
ولي عودة ان سمح المقام
خالص احترامي

__________________

توكلى على الله وانسى الموضوع من لحظة اقسم لكى بالله وان شاء الله من سردك للقصة احسبه صادقا
ولا تذكرى هذا الموضوع مرة ثانية امامه

عزيزتي .. سامحيه

ومادام أنه اعترف لك بذنبه وأن هذا الشيء قبل الزواج ،، فاعتبري الموضوع منتهي علشان تغلقين أي منفذ ممكن أن يدخل منه الشيطان لحياتكم ويدمرها !!!

من كلامك شكله زوجك صادق وكلنا خطاءين مافي أحد كامل _غير وجه سبحانه_ ..
وأنتي محظوظة كثير لأن زوجك اعترف بهذه التصرفات وما أنكرها
لأنه لو أنكرها رح تحسين أنك مغفلة ( آسفة ع التعبير ) مالقيت غيره .. فالحمدلله أن المشكلة جداً بسيطة

تحياتي

مرحبا أختي
أنا كمان مع الإخوة اللي قالوا لك انسي الموضوع، خصوصا أن زوجك قال لك إن كل اللي شفتيه ماضي والايميل قديم، وأهم شي إنه يحبك جداا وتصرفه لما ظل يعتذر وبكى يثبت ذلك بنظري، يعني أعتقد الرجل ما يعرف يستخدم دموعه كوسيلة دفاع مثل كثير من النساء وإن دموعه لا تنزل إلا إذا كان صادقا......
الله يوفقك في حياتك ويديم المحبة بينكم ويبعد الشيطان عنكم يا رب

__________________
[IMG]http://www.*****************/thumbnail/Baby001.JPG[/IMG]

أختي عفى الله عما سلف وحاولي تنسين ما حصل وقد قطع زوجك نصف المسافه بالاعتذار وباقي نصف المسافه من جانبك فسامحيه وجدي له العذر واحرصي عليه لكي لا يرجع مرة أخرى بالمصارحه وما الذي ينقصه وحاولي تغيري من نفسك .
لأن الزوج احيانا يحس بنوع من الملل مما يدفعه إلى فعل اشياء خاطئه فحاولي تشبعي حياته العاطفيه .
أما مواقع الانترنت والماسنجر للاشياء السيئه فهو مثل الرمال المتحركه كل ما تعمق الانسان فيها كلما غاص حتى الادمان ولا حول ولا قوة الا بالله .
آمل تستفيدي من الرد أرقى تحيه

عزيزتي تبين نصيحتي :
انسي الموضوع تماما ..ولاتفتحينه مرة ثانية أبد أبد أبد..

الحمدلله واضح إن زوجك إنسان شريف وصادق ، أنا أحيانا تأتيني إضافة على الماسنجر وأقبلها أقول يمكن وحدة من زميلاتي ، ويطلعون ناس ماأعرفهم ..وأنسى أسوي لهم حظر ..!

عيشي حياتك بسعادة ، وانسي الموضوع ، وحاولي بطريقة غير مباشرة إذا دخل الانترنت تكونين جالسة جمبه مو عشان تراقبينه لاعشان تملين عليه حياته وتشاركينه في هواياته ..

__________________
أحب جبالك يالجنوب وأحبك لأنك أنتي الجنوب

ماذا تردينا ان نقول
انسي
سااامحيه
بصراااحه ان اقول لكي لك رب في السمااااااء ادعيه انه يعينك واكثري من الاستغفاااااار الاستغفاااااااااار