نصيحتي لك يا أختي فكري زين .. وإذا شفتي أن الرجال هذا مب هو اللي تبغينه وتحسين انه مب هو اللي تبين تكملين حياتك معه .. نصيحتي انسحبي من الآن .. انسحبي منا الآن .. انسحبي من الآن ..

الأرواح جنود مجندة، مب شرط أنه يعيبه شي أو يعيبك شي عشان واحد فيكم ينسحب
وفترة الملكة أساسا ما حطوها الناس إلا لهالشيء .. انكم تكتشفون هل تصلحون لبعض أو لا ..

الانسحاب الآن أخف ضرر عليك وعليه، أنتي ممكن تقولين بكمل واشوف وش آخرها ..
لكن وبعدين؟
هو يبي يخسر فلوس ومصاريف في بيت وأثاث وسفر و ... و ... و ...
وأهم من كذا .. يبي يخسر مشاعره وعواطفه اللي أغدقها على اللي يشوفها ملكة أحلامه
وبعدين ؟؟ تصدمينه وتنسحبين بكل بساطة لأنه ما أعجبك ؟!
وأنتي كنتي عارفه من الأول!!
حرام اللي بتسوينه فيه ..

هذا غير خساير أهلك، وخسارتك أنتي بأنك تكونين مطلقة، صحيح مب عيب الطلاق، لكن يبقى في مجتمعنا هذا شيء مؤثر على حظ البنت بالزواج.

ممكن تقولين أنا لو كملت راح اكمل معاه حتى لو ما أعجبني وبأصبر
حتى لو قررتي تستمرين وتواصلين للأخير
وش بتكون نظرتك لزوجك؟
بتكون نظرتك أنه أقل منك ومن مستواك، والرجال لا يمكن يتحمل هالشي أبدا وما راح يصبر عليه
لأنه جزء أساسي من الإشباع في الزواج أنه كل واحد من الطرفين يحس أنه محل تقدير وإعجاب من الآخر، والزوج إذا ما لقى هالشيء من زوجته راح يدوره عند غيرها، إما يطلقها ، أو يتزوج عليها، أو لا قدر الله يروح للحرام .. أي كلمة من أي بنت فيها إعجاب بتاخذ عقله !!


نصيحتي يا أختي ..
إذا ما تشوفينه بملا عينك لا تضرينه ولا تضرين نفسك، وانسحبي بهدوء من الآن لأن الأضرار أخف ..
يمكن نصيبه مع غيرك يسعدها وتسعده
ونصيبك مع غيره يسعدك وتسعدينه


..