بصراحة استفزني الموضوع من عدة نواحي:
اولها: انك بتقارني بأمه وتقولي مدام أعطاها لازم يعطيني وهذا خطأ، هي في النهاية امه ولو كانت اغنى الناس فهو ملزوم بيها شرعاً وبراً.
ثانيها: احس انك شايفة انو لكي حق في فلوس السيارة أو بالاصح مدام دفعت انا من راتبي لازم يسدد لي بطريقة غير مباشرة وهذا كمان غلط.
ثالثها: احس الأمور عندكم مقلوبة ومافي فهم واضح للحقوق والواجبات الشرعية على الزوج والزوجة..
نبدأ بالزوج
1- الزوج ملزوم بتوفير المسكن والملبس والمأكل بالمعقول لا إفراط ولا تفريط (وإن كان الشرع لا يلزمه إلا بالحد الأدنى).
2- مصاريف الحمل، وابنكم القادم كلها على الزوج ولا دخل لك بها لا من قريب ولا من بعيد و 7000ريال مبلغ ممتاز ولا يعتبر انه قصر فيه ابداً.
3- المصاريف الكمالية المتعلقة بالولادة واستقبال الضيوف غير ملزوم بها الزوج خصوصاً لو كان فيها نوع من المبالغة والمباهاة، اللي مطلوب منه عرفاً أن يوفر ما يقدم للضيوف إذا حضرو للمباركة، اما الزينة والكماليات الأخرى فغير واجبة عليه.
4- السفر ليس من الواجبات ويكون من طيب خاطر وهو طابت نفسه على 4000ريال، تبغيها سافرو ما تبغيها الغي السفر وهذا شي انتي حرة فيه.
5- اي مصاريف تترتب على وظيفتك غير ملزوم بيها الزوج بما فيها راتب الشغالة اللي تساعدك بسبب ضيق الوقت اللي نتج عن وظيفتك لذلك المفروض تدفعي حق الشغالة كامل، وهو كرم منه ما قصر و تكفل بالنص.
6- فساتين المناسبات والكوافير والمكياج شرعاً ليست واجبة على الزوج ولكن عرفاً يدفعها الزوج من باب إكرام زوجته حسب قناعته وقدرته، ولو رفض فمن حقه ومو من حقك تطالبي فيها.

نجي للزوجة:
1- غلط انك تساهمي في مصاريف السوبرماركت، لأنها من الأساسيات وهي واجبة على الزوج، الا اذا كنتي ترغبي في أشياء مالها داعي أو أشياء تترتب على وظيفتك.
2- مو واجب عليكي دفع اي مصاريف للبيبي إلا اذا كنتي حابة تشتري اشياء مكلفة وهو مو مقتنع فيها.
3- كون انك موظفة فبديهي تساعدي زوجك بالقدر المعقول وتوفري لنفسك رفاهية هو غير ملزوم بيها وإلا ايش الفايدة من شغلك اذا كان مطلوب منه يوفر الاساسايات والكماليات والفساتين والمكياج والسفر والشغالة؟؟ وايش الفايدة لو وظيفتك ما وفرت لك رفاهية تستفيدي منها شخصياً، فجلوسك وتكفل زوجك بكل شي أبرك لك.


الحل:
لازم تعرفو واجبات كل طرف شرعاً وليس عرفاً لأن العرف يختلف من مجتمع لآخر ويخضع للقناعات ولكن اذا عرفنا ما هو المطلوب شرعاً لا نتنازل عنه ويتم الاتفاق بوضوح على الباقي

اقتراحي:
- تتوقفي تماماً عن الصرف على الأساسيات (مصاريف السوبرماركت، والبيبي، والحمل
والولادة).
- تتفاهمي مع زوجك على مبلغ معين ينحط لمصاريف البيت دون تحديد بند معين ويكون ثلثين عليه وثلث عليكي من باب التعويض عن تقصيرك في مهامك وعدم تواجدك.
- لازم تخصصي مصروف ثابت لوالدتك وتعطيه خبر وخدي بالك انو البركة تجيكي من هذا الباب.
- لازم تتدخري على الأقل ربع راتبك والافضل تحطي خطة لهذي المدخرات والأفضل هو شراء عقار.
- بالنسبة للمتع والرفاهية المشتركة اللي هيا مو واجبة على الزوج تتفقو عليها ويفضل أن تكون بنسب ثابتة ومتفق عليها وأنا دايماً أفضل الثلثين على الزوج والثلث على الزوجة، الا اذا كان راتبها اعلى من راتبه في الحالة دي نقول نص ونص.
- بالنسبة للأكل من المطاعم، إذا كانت وجبة رئيسية زي الغدا اللي المفروض تطبخيه انتي وبسبب وظيفتك ما طبختي يكون عليكي، لكن إذا رحتو مطعم من أجل الترفيه هو يدفع في الغالب وانتي تدفعي أحياناً يعني مثلا هو يدفع مرتين او ثلاث والرابعة تقولي انا عازمتك.

الامور المالية بين الزوجين اذا ما تم الاتفاق عليها وتوضيحها بدقة بتكون مدخل للمشاكل وينتج عنها شحن للنفوس وبتخرب العلاقة بين الزوجين.

اتمنالك التوفيق
واعتذر عن الاطالة