عزيزتي اقولك هي بصراحه ابعدي عن المواقع الاسلاميه للزواج .. عن تجرربه
انا كنت مثلك وفي بداية العشرين جربت دي المواقع لان الغرض نفسو ابغى اكون مقتنعه بالشخص 100% وكنت متمسكه برأيي بأني ماحتزوج زواج تقليدي ولا حرتبط بشخص ما اعرفه ولا اعرف تفكيره ولا طموحه لان كانت لي تجربة زواج تقليدي فاشله انتهت بالطبلاق خلتني اخذ فكره سيئه عن الزواج التقليدي ..

فبحثت في هدي المواقع وكان البعض مثل ماقلتي ينسحب فجأه واوقات انا انسحب فجأه
المهم انا حسيت الموضوع اساسا كلو مو مريح في داخلي .. لان من خلف الشاشه ماحقدر اتعرف على الشخص المناسب .. نفسيا ابددا ماكنت مرتاحه

بعدها تقدم لي شخص طبعا تقليدي عن طريق وحده من صديقاتي .. ولكن شرطت على اهلي انه قبل كتب الكتاب يكون بيننا تواصل لمدة شهر او شهرين على الاقل عشان نعرف بعض ..
والحمد لله وافقو وبعد الشوفه تم التواصل بيننا وكنت حاطه في بالي وصارمه مع نفسي جدا وقلت له لو حسيت اننا مانناسب بعض او فيك صفه انا شخصيا ما اقدر اتحملها واحسها سبب مشاكلنا بعدين راح افسخ الخطوبه وهو كان مؤيد لكلامي وكنت قاسه مع نفسي جدا جدا ومهما كان منصبه وحالته المادي كنت مشدده على نفسي في موضوع الاخلاق والتفكير والانسجام .. وخلال الشهرين عرفت اطباعه تفكيره طموحه بعض الحاجات عن اهله وحاجات كثير تطلع مع الكلام .. خرجنا مره واحده لمطعم لكن مع وجود الاهل كلهم ..

طبعا الفرق بين الاثنين انه وانا اكلم خطيبي كنت مرتاحه نفسيا لانه بعلم الاهل
لكن عن طريق المواقع ماكنت مرتاحه لانه كان شي بيني وبين الشخص الي اتواصل معاه ..

والحمد لله بعدها اقتنعت بالشخص واقتنع فيا وتم الزواج ...

اتوقع في مجتمعنا هدي الطريقه مناسبه .. وتقدري تختاري بين الف خاطب كمان ومازلتي انت في بداية العشرين .. والفرص عندك كتيره بإن الله

__________________
لاتسعى لتصحيح ظن احد بك ££ خالقك ينظر لقلبك وهذا يكفيك