نعم رجل غريب وليس من محارمها ولا يجوز محادثتة
نحن نتعامل بدين وليس بالعادات وتعاطف ياليت ترجعين لرد 300 |
ما عليه .. لو المسألة دين والزوج شايف إن البنت فيها قصور من الناحية الدينية فكان الأولى ما ياخذها من بيت أهلها .. ويدوّر صاحبة الدين اللي تتماشى مع قناعته وتطبق حدود العلاقات الأسرية بمنظوره ومثل ما هو يبغي. ولو المسألة دين فكان الأولى أنه ينبهها من البداية وينصحها بشكل مباشر بدون لف ودوران. ولو المسألة غيرة فالغيرة طبع متأصل في الإنسان ولا يستطيع أن يتحكم فيها أو يطوعها ويرفع منسوبها أو يخفضه حسب الموقف أو حسب المرحلة الزمنية من العلاقة. يعني يتحكم في غيرته ويسكت ويتجاهل الأمور والمواقف (اللي مب من الدين مثل ما يشوف) في فترة عقد القران .. ويصرّح ويتكلم بشكل مباشر لدرجة الطلاق بعد الزواج! الواحد لما ينظر لمشكلة المفروض ينظر لجميع معطياتها وبعدين يحكم .. فمب فاهمة ليش تتجاهلون جزئية إن هذه هي حياة البنت .. بغض النظر عن كونها صح أو غلط وبغض النظر هي عاجبتكم أو لا .. هي كانت تتصرف بحسن نية وحسب اللي تعودت عليه .... فما يصير ننظر لتصرفها وكأنها مجرمة ترتكب خطيئة .. وما يصير نقيم موقفها مع مكالمة زوج أختها مثل ما نقيم موقف زوجة تخون زوجها. يعني الحرامي اللي يسرق عشان يأكّل عياله .. مثل الحرامي اللي يسرق بطرة وطمع؟!!! |
صاحبة الموضوع و زوجها كل واحد منهم اعترف بغلطه و اعتذروا من بعض و هم بفضل الله تجاوزا هذه النقطه و هذا من فضل الله عليهم
وهذا ما وضحته الأخت صاحبة الموضوع في الرد رقم 119 # والآن بفضل الله الأمور تسير في الطريق الصحيحة بأن العرسان سيُلمُ شملهم من جديد و كما قال الأخ الفاضل لماذا نتزوج في بداية الموضوع فيما معناه قال : أن هذا الموقف سيعزز من قوة هذه الأسرة . والحمد لله هذا الحاصل الآن و الآن على كلا العريسان أن يتعاونا في التطوير من أنفسهما الزوج في ضبط تصرفاته و ردات أفعاله مع المواقف التي قد لا تعجبه و كذالك الزوجة في تعلم حقوقها ووجباتها تجاه زوجها وأهلها فلا أرى أن هناك داعي من الدوران في نقطة من المخطأ و من الذي خطأة أكبر من الثاني وأسأل الله أن يفرج همنا و همكم و ييسر أمرنا و أمركم و بإذن الله ترجع العروس لعريسها في أقرب فرصه و يعيشون أحلا حياة زوجية و يرزقون بأحلا ذرية |
اثنينا غلطانين .. هو غلطان وانا غلطانه وما همني الحين منو اللي غلطان اكثر او اقل .. واتمنى نرجع سوى اليوم قبل باجر وان شاء الله نبدا صفحه يديده والله يبعد المشاكل عنا وعنكم جميعا ما قصرتوا كلكم بينتوا لي الصح من الغلط ..
المهم .. امس في قروب العايله اختي مادري شو فيها عليه .. كل شوي تطلع لي بسالفه وتصور محادثاتي وترويها امي .. وشوي وتكلم يدوتي .. ويدوتي تتصل لي وقالت لي شو فيج على اختج .. قلت الها يمه مافي بينا شي .. هي معصبه مادري ليش وقاعده تتكلم شوي شرق وشوي غرب .. انا بصراحه كتبت لها بالقروب فكينا الله يخليج مب ناقصتج وطلعت من القروب وحذفته .. فـ امس لما كانوا راجعين هي زوجي يو عندنا البيت .. لما شافتني لا سلام ولا كلام .. ويايبه هدايا حق خواتي وانا ما يابت لي .. انا عادي عندي .. ادري انها معصبه فالامور طيبه الحمدلله .. شوي وتقول لأمي بنت هاي الياهله اذا ما سكتت عني ترا بتشوف شي ما شافته وانا والله ما قلت شي ابد .. المهم انا مارديت عليها .. امي قالت خلاص عاد ما نبي مشاكل زود .. خلونا نعيش نفس الناس مب كل يوم من مشكله لي مشكله .. قلت الها يمه انا ماعندي مشاكل مع اي حد سوا زوجي واللي اتمنى بعد رضاج اني ارجع له .. قالت لي ومن قالج اني رافضه ترجعين له .. بس يابنتي ما ابيه يشتتج عقب .. باجر بيصيرون عندكم عيال مب كل شوي يا مطلق يا طارج بيت اهلج .. انا كنت ابيج تسكنين عندنا في الملحق حتى اذا صار شي انتم حولي .. مانبي الناس ع الطالعه والنازله دارين عن مشاكلكم .. ونا الي الحين مو عارفه السبب الحقيقي اللي خلاه يسوي جذيه مادري منه الغلط او منج او راكبكم انتوا الاثنين .. ثاني شي انتوا كخوات مالكم غناة عن بعض .. والمفروض تكونون ستر لبعض .. مب على ادناة الدون تنشرون مشاكلكم على الناس .. خالاتكم واهم خالاتكم وخواتي لي دروا بويوهم بيقولون حرام ومسكينه ومن وراكم يضحكون عليكم .. انا ابيج تقعدين مع ريلج بروحكم وتفهمينه كيف حياتنا وطبايعنا .. وهم كيف طبايعهم .. واتفاهموا باللي لكم واللي عليكم .. ولو تبون نصيحه او شي تراني موجوده .. ابوج واخوانج وخواتج موجودات .. اسالي مرت اخوج بعد .. انتي بنتنا وما نرضى عليج .. مسالة طلاق في شهر العسل هذي انا لايمكن اعديها على خير .. وكنت ناويه اادبه اكثر عشان يعرف ان بنات الناس مو لعبه عنده .. بس لي كاسر خاطري هو انتي .. بنتي من لحمي ودمي .. كفايه زعل وحرمان .. لا تقعدين معانا ولا تاكلين نفس الناس .. تقول لي لا تضغطين علي حتى يرجعج بدون شروط .. فرصتج تختبرين حبه لج وتعلقه فيج .. طبعا عطتني محاضره طويله عريضه وانا ماغير دموعي اربع اربع .. المهم انا قلت على امي اضن الوقت اللي صبرناه يكفي يبين لنا تعلقنا مع بعض .. وانا تعلمت وايد خلال ها الفتره واستشرت .. ودعيت ربي واستخرت .. واشوف ان رجعتي له هي الخير لنا يمه .. وان شاء الله بشروطي .. واتمنى تفصلين موضوع اختي عن موضوع زوجي .. اختي فتره وترضى وهذا طبعنا من يوم انا صغار وانتي ادري .. طبعا امي تدري عن اختي دايما كانت تشوف نفسها علينا .. الحين انا ابي اكلم زوجي بس مو عارفه كيف املي عليه شروطي .. هل ارد له ولما نقعد بروحنا اقوله جذي وجذي .. او في البدايه اكلمه ثم ارجع معاه .. هل اطلب منه يقعد في بيتنا او نستمر في بيتهم .. امي خيرتني وقالت اللي تبينه هو اللي راح يصير .. فانتوا شنو رايكم . ؟ حدود علاقتي مع نسايبني هل اقطعها نهائيا .. او ضمن حدود .. هو قال لي امسحهم نهائيا من حياتي .. شهر العسل .. يعوضني او عفى الله عن ما سلف .. هل الطلاق راح جرحه يستمر للابد ويلازمني واتذكره ام ممكن ها الشي نسيانه .. شسوي ابي نصايحكم .؟؟ انا فرحانه بس خايفه .. ماعرف شسوي .. المشكله طول هالفتره انا قراراتي كلها امي كانت تعارضها .. وفجاه قالت لي سوي اللي تبينه بدون مقدمات .. فانا احس اني ضعت .. ردوني للطريق الصحيح .. |
الله يخليها لج ويخليج لها ..
ألحين تأكدتي وتطمنتي إنها تبي مصلحتج .. وإحنا كلنا تأكدنا .. - أنا أشوف سكنكم بيت اهلج صج مب حلوة وأغلب الرياييل مايرضونها .. سؤال .. ليش أختج مب ساكنة في بيت أهلج ؟ أقصد ليش أمج تبيج إنتي بالذات تسكنين عندها ؟ - بالنسبة لعلاقتج بنسايبكم أشوف إنج تحطين حدود بس ماتقطعينهم نهائيا .. يعني لو جلستوا مع بعض عادي .. بس لا تلعبين معاهم ورقة .. لا تسترسلين معاهم في السوالف والضحك .. - زوج أختج لا يتصل عليج أو يكلمج بالتلفون لأي سبب كان .. أختج موجودة إذا فيه شي ضروري .. أو كلش كلش مسج .. - السفر لا تخلينه شرط .. بس إن شاء الله هو بيعوضج في الأشهر الجاية خليها تيي من نفسه .. لأنه لو كان شرط بيستثقله ولو قبل فيه ماراح يستانس ولا إنتي بتستانسين .. - جرح الطلاق بيلتئم إن شاء الله .. ولو إنه بيترك ندوب وآثار لكنها ماراح تأثر فيج وايد بإذن الله .. - من رايي اييكم مرة ثانية وتقعد أمج معاه وتقول له كل الكلام اللي قالته لج .. المرة اللي راحت كانت جلسة مشحونة بمشاعر سلبية .. بس هالمرة بتكون ألطف لا تخافين .. كلميه وقول له أمي كان كل قصدها إنها تحسسنا احنا الاثنين إن الطلاق مب شي هين عشان مانكرر غلطاتنا مرة ثانية ونتسرع في الأمور .. اطلبي منه اييكم ولو اييب معاه هدية بسيطة لأمج تعبيرا عن شكره لها أو كإعتذار على الضيق اللي صار لها منكم (انتو الاثنين) ضروري لما تتكلمين تقولين إحنا أو انا وإنت .. عشان مايحس إنج تلقين اللوم عليه بروحه .. |
مواقع النشر |
ضوابط المشاركة |
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك
BB code متاحة
الابتسامات متاحة
كود [IMG] متاحة
كود HTML معطلة
|