السلام عليكم ورحمة الله وبركاته

الاسبوع الماضي بعد صلاة المغرب قابلت جاري مستأجر جنبنا وسوالف معاه وهو عارف اني منفصل ومطلق

سألني مالك نية ترجع طليقتك وتلم شمل عائلتك وكان ردي بالرفض تماماً لفكرة عودتنا لبعض وان عدتها انتهت وانتهى معها كل شئ خلاص .

فقال لي اذا لك خاطر بالزواج اهلي ساكنين بالحي الفلاني جيرانهم عندهم بنت ابوها وامها منفصلين من هي صغيرة عايشة عند جدتها وكانت لها مثل الأم وخالها كان لها مثل الأب

والوالدة دايم تتكلم عنها وانها تزورهم مع جدتها وتمدح فيها وش رايك يابو فلان قلت ماعندي مانع اسألوها اول هي ترضى برجال عنده طفلين وعايشين عنده والله يجزاكم خير

وفعلا كلمني وقال الوالدة كلمت جدتها والبنت تقول ماعندي مانع بس يكون محافظ على صلاته بالمسجد ( وكل الفروض ) ويكون حسن العشرة والأخلاق

انا ارتحت لما ذكرت الصلاة وكذا حسيت انها صالحة

قالي اجيب رقم خالها تكلمه وتقابله وتقوله انك من طرفنا ولا لا

اذا مالك رغبه لاتفشلنا ترا بحياتنا ما خطبنا لاحد وهذا من غلاتك ومن هالكلام اللي يحرج الواحد

قلت له عطني مهله يومين اكلم الأهل واشوف وش بخاطر الوالده والوالد وارد لك خبر

الآن انا متردد احس اني مستعجل ماراح على طلاقي الا 5 أشهر تقريباً واحس ان كل البنات نفس طليقتي الكل يمدح

وعقبها يطلع مافيه شئ من هالمديح ثقتي بالنساء احس مهزوزة مع اني اقول يارجال تعوذ من الشيطان اصابع يدك مو سوا بس احس بخوف لسببين

لاسمح الله صارت مشاكل وماكتب الله نكمل وحصل طلاق انا بيكون هذا طلاقي الثاني وعندي طفلين ويمكن يزيدون مع الزواج الثاني وسمعتي بتصير زي الزفت ان هذا يتزوج ويطلق ولو تبي تتزوج ماحد بيزوجك بيقولون انت لعاب تتزوج وتطلق

وشئ ثاني انا ما اعرف عنها شئ ابداً ولا اعرف عن صفاتها شئ بس اللي سمعته من جاري والله اعلم

وش الحل اكمل ولا اتريث واقوله اني راجعت نفسي والافضل انتظر سنة

تم تعديل العنوان ليتناسب مع المضمون

مستجدات
الرد 53
http://www.66n.com/forums/showpost.p...5&postcount=53

بصراحه تسرعت لما قلت له إسألها توافق ع مطلق معاه طفلين كان طلبت العنوان وطلبت الوالده تتعرف عليهم أو أخواتك المهم الان انت إرجع أسأل عنهم كيف وضع البنت مع جدتها لانه ممكن عشان تعوضها عن حنان الام والاب فتكون مدلعتها شوي هذا كله بيحصل مع التعرف عليهم ....

وممكن تتوكل ع الله وتتقدم وتجلس معاها قبل الملكه وتفهمها إنك تبغى زوجك صالحه تخاف الله في ارلادك

واذا ارتحت لها طول مدة الملكه ...

بعدين الي قالك لا تفشلنا وتنسحب خرجهم من الموضوع انتو تقدمو دغري بدون واسطات لازم يفهم الي دلك عليهم انه هذا ثاني زواج لك ومو معقوله عشان لا تفشلهم توافق ع مضض....


بالنسبه لاستعجالك في الزواج انت ادرى بنفسك اذا لسى عندك تراكمات ونفسيتك تعبانه أجل موضوع الزواج والبنت ماهي طايره اذا مرت السنه وتحسنت وهي لسى ماتزوجت تقدم لها.....

وادع الله في كل سجود أن يرزقك الصالحه ....

ممكن أسألك طليقتك إلى الان مابادرت هي واهلها بالمحاوله للرجوع لك ...

الله يفرج همك ...

خطبة عالعمياني

حررررفيا!

الله يسامحك..

اذا في مجال للتراجع فهو الحين حالا بالا..

زواج هذا مو لعب تجامل فيه!!!

والمعلومات عن الاشخاص ماتعتمد على حسيت انها وحسيت انها..

بكرا اذا طلعت مقلب.. حط احساسك بالدرج 💔

وتتطلق البنت ويمكن مع زيادة عدد الضحايا اللي عندك

وتجي بكرا تسب الزواج التقليدي والمجتمع والحريم والرجال وتتناسى انك قايل فلان احرجني و "حسيت انها صالحة" :/

بفشل الزواج؟؟؟ محد يلوم نفسه سبحان الله!

لاحظ حتى يا اخوي انك خايف من "بعد الزواج" تطلع بنت مش كويسة والعيب فيها وفيها

وماراح تعيب على "طريقتك اللي رضيت فيها انت بكامل ارادتك" بالخطبة الحقرا بقرا :|

-يافلان، نزوجك؟

-مشينا!

ويجي بكرا زعلان الناس غروني!

تريييييييييييث تريث!!!!!! حرام هالمبزرة والله!

وركز على انها بتكون مرة ابو، غالبا ماراح ترضى تربي

اكيد الوالدة بتشوفها وتجلس معاها وجارنا يقصد لاتفشلنا مايقصد انك ترفض البنت وتقول ماناسبتني

قصده لاتقول بكلمهم وبشوف ثم تسحب بس

لا والله ماحاولوا ولا شئ بالعكس قللوا من شوفة العيال صاروا اسبوع ياخذونهم واسبوع لا
حتى لو بادروا بشئ الآن خلاص ماينفع

طيب ممكن توصف لي طريقة اخطب فيها ماتكون على العمياني وانا ابي من خارج العائلة تفضل ؟

اقسم بالله انك كرهتني بالبنت قبل اشوفها وقبل نسأل عنهم

فجزاك الله خير

وماني جاي بكرا زعلان ولو جيت بكرا زعلان واسب لاترد علي ياخي

والرجال مايقصد تحرجني انك مارضيت تخطب البنت

قصده لاتحرجني وتفشلني انك تسحب على الموضوع كأنه لعبه خلاص كلمناهم عنك توكل على الله وروح ياتقبل يا ترفض

حقرا بقرا اجل مايحتاج بعد اهل البنت يسؤلون عن الرجال اللي يتقدمون لخطبة بنتهم لو صار محافظ على الصلاة ويحسون انه ابن حلال يحطون احساسهم بالدرج

نعم يحطون احساسهم بالدرج
ويكملو سؤال عنه. ما يكفي انه ملازم المسجد
اسأل اخي عن طباعها
خجولة. جريئة. عصبية. انطوائية. اجتماعية. كيف نبرة صوتها
بشوشة عابسة. خدومة. كسولة. مرنة. متمسكة برأيها
اسأل و اسأل عن من يعرفها. وليس صديقاتها و جدتها. اكيد بيمدحون
اسأل امرأة محايدة. من جاراتهم مثلا اللي يدخلون عليهم
واسأل عن شكلها و شعرها و تعليمها و معاملتها لجدتها

من حقك و زيادة
فقد تزين لك أوصافها الخلقية و الخلقية و يكتب الله اللي فيه خير

__________________

ياسيد..

الجميع يسال عن هذه الامور..

بل المستنكر ان لا يسالوا!

قوله لا تفشلنا.. هم حطوك تحت الامر الواقع حتى بدون لا تحس

هل البنت من محارم هذا الرجل؟

مايصير تخطب بنت حتى امك ماشافتها

انت اللي حسيتها صالحة بدون ماتسال وتكثف السؤال :/

السؤال عن البنت يكون قبل الخطبة وليس بعدها

انا اسفة على كلامي ولا اقصد به شيئا

لكن في على سبيل المثال في عوائل ماتخاف الله وبلشانين ببنتهم

وبغض النظر عن كونها سيئة او جيدة يروحون يحرجون عليها "اسفة مرة ثانية عاللفظ"

حتى يتخلصون من المسؤولية!

أؤكد على ذلك هنا لانها يتيمة ولا اقصدها شخصيا!

ثم انك اذا سالت اهلها ماراح يعيبونها ابدا

حتى جارك "قريبها" ماراح يعيبها

اذا لم يكن محرما لها كيف يعرف تفاصيل شخصيتها واخلاقها؟؟؟؟

هذا اللي اقصده يسالون عني واسأل عنهم واللي مدحها هم جيرانهم مو صديقاتها وهي لاتمت لمن ذكرهم لي بصله

وفي النهاية الوالده بتروح وتشوف وتسأل مع اختي الى ان يتاكدون انها بنت حلال واكيد بتذكر لها كثير من التفاصيل عن حياتنا اللي فهم الموضوع انه بشغل سيارتي واروح اطق الباب لابسن بشتي اخطب يغير هالنظرة الله يرضى عليكم والخطبة بعد بتاخذ وقتها ماني مملك مباشرة

وانا اتصفح المواضيع لفت نظري موضوع الاخ تلميذ الحياة رفعوا المهر بآخر لحظة وانكشف كل شئ قدامه

مع انهم سائلين عنهم وماتقدم للخطبة متسرع

انا لما رحت اطلع صك الطلاق عدد اللي يطلعون صكوك الطلاق مساوي تقريباً او ااقل بقليل من عدد المطلقين مو معقول كلهم طلاقات علشان الزواج كان شختك بختك وحقرا بقرا ؟؟