آسفة إني دققت على ذيك النقطة ، وما خضت في مشكلتك ،
بس لأنها شدتني خاصة لقصة ما ...
أختي جابت توأم بنت وولد فقالت لي بالمستشفى " توأم متشابه" و أن الممرضة قالت ايه ،
فقلت لها مستحيل حسب معرفتي لأن الحمدلله أحب الهندسة الوراثية و خذيت بالبايولجي a+ بتحضيري التخصصات الصحية قبل ما أحول لكلية الآداب و لله الحمد الحكيم العليم على ما اختاره، وأكيد الممرضة ما تتكلم عربي ومضغوطة مع المواليد فتسلك يعني ،
حاولت أشرح لها بس شفتها نفسية شوي خخ سكت وما كملت
طبيعي نفساء وقيصرية يعني ما بعد آثار البنج الأنابيب الاكتئاب و الألم
لدرجة تصحيني من النوم بالليل تبغى أي شيء أو بس عشان أجلس معه"مصحصحة" مب عشان القرب
لإني نايمة جنب السرير .

المهم بعدما كبروا وضحت لها جدا وللجميع الاختلاف بملامحهم .

و هذي السالفة "بالبلدي " ع قولتهم حاولت أبسطها قد ما أقدر :
(ملاحظة :" الجين " هو اللي يحمل صفات مثل لون الشعر العيون الملامح ..إلخ)

في التوأم المتشابه ..؟
تكون بويضة وحدة
بعدما تتكون اللاقحة " الزايجوت " و الكل يعرف كيف تتكون مايحتاج شرح ،
وهي تكون خلية واحدة تحمل جينات من الأم و الأب ( و الجينات هذي تحمل صفات مختلفة من ضمنها "جنس المولود إما ذكر أو أنثى " ) ..
المهم
بعدما ما تكونت خلاص تبدأ تنقسم و تنقسم أو بالأصح تستنسخ معها الصفات الجينية طبق الأصل (يعني حتى جنس المولود ، و كذلك حصول تكافؤ بعدد الكروموسومات بحيث تقدر الخلايا المنقسمة تستقل بذاتها كجنين مكتمل لاحقا ) ،
المهم الزبدة أنه بعد ما حددت الصفات اللي ضمنها جنس المولود تبدأ تنقسم .. وهذا اللبس اللي حاصل عند الجميع.

في التوأم المختلف ؟

تكون 2 بويضتان أو أكثر .

كل بويضة مستقلة بلحالها تكون الزايجوت تبعها بالطريقة المعروفة ، وبكذا تصير التوائم المختلفة .


___________________

سبب سوء الفهم من المحتمل يكون ؟
إن البعض يعتقد أن البويضة بدون شيء من نفسها تنقسم بعدين تتلقح ،
وهذي الفكرة جريمة شنيعة بحق هذي العملية البيولوجية^^"
بل ممكن تكون خطيرة - لو ماصارت مستحيلة من أصله- تحصل منها متلازمات وراثية .



أتمنى هالمعلومات تفيد كل أم .
" سبحانك اللهم وبحمدك أشهد أن لا إله إلا أنت أستغفرك و أتوب إليك "



" سبحانك اللهم و بحمدك أشهد أن لا إله إلا أنت أستغفرك و أتوب إليك "