كل ما اقرأ عن الرجال اللي يخونون غالباً شخصيات رومنسيه تخليك تحسين انك انت الوحيدة اللي في قلبه
والله يا اختي نفس حالتي كان حنون وطيب ومايقول لي لا ويمدح اي شيء اسويه مهما كان بسيط ويفخر فيني خلاني احبه واتولع فيه كان عيبه انه مايصلي ولا يصرف وبالاصح انا كنت اخجل اطلب بس ماييقصر بالهدايا معي ومن اغلى الانواع بعدين صار كريم في كل شيء
اول ما اكتشفته انهرت وانجنيت بالأصح ، يكتب لهم نفس الكلام اللي يقوله لي كنت ابحث اقول يمكن فيه كلام خاص فيني وللأسف ماحصلت شي
بعدين عرفت انه يتلاعب في مشاعر النساء ويحب يعرف كل الانواع والاشكال والاجناس ، مع انهم اختاروني بناء ع مواصفات كان يتمناها!
و يفرح اذا بنت قالت له انت وسيم وانت عضلات ! وبالاصح هو يستعرض بنفسه قبل مانطلع مشوار يقعد يجهز نفسه ساعه يضبط الشعر ويغير اللبس اكثر من مرا ويشاورني حلو او لا في البدايه انا كنت ع نياتي واقول له رايي بصدق بعدين صرت اقول له حلو لو كان مو عاجبني ، نمشي بالسوق عيون البنات تلتفت له وهو في قمة السعادة كان يتعمد يقول لي نكت عشان يشوفونه وهو يضحك ويعجبون فيه اكثر واكثر هذا وبعد ماجبت الولد كان يستعرض في ولدي حتى يرسل صوره للبنات ،
يعرف عدد مهول من النساء ويعرف اخبارهم استغرب ما يغلط هذي يتطمن عليها كيف الكحه والثانيه يتطمن عن مشاكلها مع زوجها والثالثة يتطمن ع رجولها انا كنت اقرأ كلامه بصدمه وبكاء في البدايه بالاخير وصلت لمرحله تبلد وصرت اضحك ع كلامه لانه مشاعري ماتت تجاهه ، الشيء الغريب انهم كانوا يسألونه عني وكان يمدحني! و للأسف بعضهم يعرفوني شخصياً !
كان يستغل وقت خروجي من البيت عشان يجيب بنات ابليس فيه ، تخيلي يدخلهم بيتي ! ويجلسهم ع نفس جلستنا وكان كريم يضيفهم ويقوم بالواجب ، وبنات ابليس والله يا اختي مو حولي ابد بالشكل هذا اللي يقهرني اكثر لو كان يبحث عن شي مفقود كان المصيبه بتكون اخف علي
حاولت اصلحه وبذلت مجهود وكان كلي أمل لما يئست طلبت الطلاق انهار وبكى زي الأطفال بس ماصدقته ولا رحمته لانه كان يسوي نفس الشيء لغيري
اتمنى ربي يهديه ويصلحه لنفسه انا عفته خلاص
اشوف ان كل بنت تتزوج لازم يعلمونها اهلها انها ماتندفع بمشاعرها عشان ماتنجرح اذا شافت ماعافت هذا كان خطآي اني حبيته بصدق واني كنت ما افهم ولا اتخيل انه في نساء بشعه كذا ومتزوجه بعد