نفس قصتي ونفس احساسي

خلينا نساعد بعض ونشجع بعض لما الله يفرجها علينا ..
باحكيلك من تجربتي اشياء سويتها وجابت نتيجة ..

بالنسبة للجرح اللي يجينا بسبب الخيانة اتوقع ما نقدر ننساه .. لكن احمدي ربك واعتبريه ابتلاء من الله لانه يبتلي من عباده اللي يحبه
واحمدي ربك انه ما ابتلاك في صحتك او في طفلك .. في ناس يتعذبون من الامراض و الحروب والمجاعة ويموتون بابشع الطرق.. الحمد لله انتي مشكلتك سهله وممكن تنتهي متى ما اردتي بقرار الانفصال


لكن انتي الآن تحبين زوجك وتريدين اصلاحه حاولي وحاربي حتى يتحقق لك الي تبين انتي في تحدي مع الشيطان اللي بيخرب بيتك .. وبتربحين لانك معك الله وانتي مؤمنه بالله



انا زيك تحطمت وفقدت الثقة بنفسي في البداية لدرجة صرت اقارن نفسي بكل وحدة تطلع بالتلفزيون .. بس بعدين وقفت وشفت انه مو ناقصني شي ولا قصرت بشي .. وهو لما اخذني وحبني كان شايفني واعجبته


يعني الغلط والنقص فيه هو .. لانه ضعيف قدام الشيطان وقدام شهواته

تاكدي انك انت القوية وانتي صاحبة الحق وهو الضعيف واللي لازم يقلق ويخاف

اذا سكتي وما واجهتيه مو لانك ضعيفة لان المصارحة في هذي الامور مالها فايدة بالعكس تخرب عليك نقاط قوتك لانه ممكن يقول انتي السبب لانك مقصرة معي


ان كنتي صارحتيه وانكر لا تجادلينه خلاص ..قوليله انك واثقة فيه وبحبه لك .. وانصحك ما تنبشين وراه عشان ما تتعبين


. بس لا تخلينه يحس بالامان .. يعني حسسيه انك واعية ومفتحة اساليه وين راح ووش يسوي من باب الاهتمام مو الشك .. واذا استغباك باحد ردوده لا تجارينه لا مثلا اذا قال لك جاي من الحلاق وانتي حاسه انه يكذب .. قولي وش موديك الحلاق توك محلق من يومين
وبين يوم ويوم خليه يحس انك ساكتة على شي وعندك كلام كبير بقلبك بس لا تنطقين .. هذا الترقب يخفف استهتاره فيك ويخاف شوي ..




وانتبهي انتبهي تتسولين حبه واهتمامه .. مرة غلطت بكيت قدامه قلت له انت ما تحبني .. في كل مرة يشوفني ابكي يتاثر ويحضني هذي المرة احس انه ما تحرك شي بقلبه بالعكس يمكن اشمأز مني

اذا بتكسبين حبه لانك تستحقينه مو لانه اشفق عليك


خالة بيتا نصحتني اني اثقل عليه .. وانشغل بنفسي وجاب هذا الاسلوب نتيجة جيدة
افضل من اني الزق فيه كل وقت واصير جاهزة باي وقت ..
لا تقصرين بحقه عشان ما يتشجع يدورهم اكثر .. بس لا تصيرين سهلة


خليه يعرف انك مشغولة باشياء مهمة بدون ما تحكين له .. انا مثلا اكلم اخواتي بالجوال عن هم الماجستير وكيف ناوية ارتب اموري .. انتي شوفي شي بحياتك مهم يشغلك عنه .. اقري كتب مثلا .. اقري بضمير واهتمام مو تصفح مجلة او جوال ..
اول شي بترتاحين من التفكير فيه وثاني شي فضوله وغيرته بتجيبه لك .. وتخليه يدورك لان الرجال اناني ما يحب تصيرين مشغولة بشي غيره


اذا فتح جواله يتفرج على شي قربي منه قولي باتفرج معك .. عشان تصعبين عليه يخبي بلاويه ويضطر يحذفها سواء ارقام او افلام او صور

ان شفتي شي بالتلفزيون او سمعتو قصة عن الخيانة استغلي الفرصة وعلقي .. قولي الدنيا دواره والله ماراح يخليه


ادعي ادعي ادعي ..اقري قرآن وصلي الوتر ووكلي امرك لله عشان تنامين بدون هم


وان شا الله لاننا قويات ولان الله معنا بيرجعون لنا بالنهاية