رد : لو انتم مكاني كيف تتصرفون
ماشاء الله تبارك الله احييك على همتك والله إنك زوجة سنافيه وبنت حلال الله يبارك فيك وفي اسرتك ويهدي زوجك ويسخره لكل مافيه خير ومنفعه وصلاح لكم ونصيحتي لك يا أختي لا تاخذي الموضوع الند بالند والعناد والعصبية وكل مرة تناقشينه بالموضوع وتتهاوشون مع بعض وتختلفون علشان رأي من فيكم يمشي ونصيحتي لك كأخت محبة وعن تجربة مثل ما انتي عندك قيادة وحسن إدارة خليك محنكة وسياسية في تعاملك مع زوجك اللي مايجي بالتفاهم يجي إن شاء الله بالمسايسة خذيه من الجنب الطيب والوقت الرايق سايسيه حاوريه بهدوء وعقلانية وحكمة خليك ذكية واعرفي من أين تؤكل الكتف مادام إن زوجك سلمك الخيط والمخيط بإداراة امواله هذا معناته إنه يثق فيك ويحبك ويحترمك ولك عنده تقدير واحترام فأنتي لاتنسفين كل شئ بينكم بتعجلك وبنقاشك لا تعانديه ولا تخلين رأيك عليه مفروض لا خلي رأيك كإقتراح اوفكرة تقولينها له بطريقة التودد مو بطريقة الآمر الناهي تمسكني إلين تتمكني انسي سالفة انا جمعت وضحيت وحرمت نفسي من كل شئ حلو وانت بتضيع كل شئ هذا الكلام إنسيه وشيليه من قاموسك إن بغيتي تحققين طلبك امدحيه اثني عليه وادعي له حتى هو يتجاوب معاك ويلين ويسمع لكلامك ويستوعبه ولو وافق على اللي تبينه شجعيه وخليه يبتدي بإنجاز المهمه وخليك انت معاه بالتشجيع له والدعوات له والثناء عليه وحتى لو المبلغ مايوصلكم على بيت ملك خلاص خذوا لكم شقة تمليك اتوقع تلاقون بالمبلغ هذا بالراحة وإذا ماتبغوا تسكنوها خلاص أجروها واستفيدوا من إيجارها استثمروها وراح تدر عليكم مبلغ طيب إن شاء الله أهم شئ انتي لا تستسلمين ترى والله إن اختك في الله عندها نفس نوعية اللي عندك ومبدئه إصرف مافي الجيب يأتيك مافي الغيب إذا ماحنا وراه ندور تصاريف ونوفر اللي نقدر عليه كان توهقنا من زمان وضيعنا بس الحمدالله تفكير اللي عندي تعدل شوي وصار يحسب لكل شئ حسابه قبل والله لويقولون له كيس الخبز هذا بخمسة ريال يشتري ويطلع ولا عمره يكاسر اويراجع في قيمة السلعه وسبحان الله طلع لي ولد نفس طبع ابوه مستحيل يراجع البائع في اي شئ يشتريه وصدق من قال الفتى سر ابيه فالله يعينك كملي مهمتك واعملي بصمت فيه طرق كثيرة تخلي مخ الرجل يلين ويتنازل عن عناده ورأيه فعاد انتي وشطارتك ودهائك استعملي كل الحيل اللي عندك اهم شئ تطلعين بشئ ينفعكم انتي واولادك وربنا يعينك ويحقق لك كل مافيه خير لك ولأسرتك يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
04-07-2013, 07:57 AM
ضوابط المشاركة
العرض الشجري