رد : هل تغار الزوجة من (( طفلـة )) ؟!!
إلا نغار اعمارنا بأواخر الثلاثينات ونغار انا عن نفسي اغار من بناتي لما ابوهم يشيل فيهم ويحط ويمدحهم ويدلع فيهم ويقول لهم كلام حلو لما يجي من العمل يستقبلونه البنات عند الباب اللي تحضنه واللي تقفز على ظهره وراسه وهاتك يابوس فيه والصغيرة ماتوصل على راسه تبوسه تبرك عند رجوله تبوس فيها وتطلع على يدينه ويسون حفلة له عند باب البيت اول مايدخل حتى جيراننا يعرفون ان ابونا جاء من العمل لما يوصل انا استقبله معاهم اجلس واقفه اتفرج فيهم مثل لوح الخشب وهم مسوين عليه هجوم حتى السلام احيان ينسى يقوله الا لما يستفيق ويطالع في الخشبة اللي واقفه جنبه تبغاه يقول لها السلام عليكم واحيان اطنشه واقول له عليكم السلام والرحمه وهو معاهم هوشه وادخل للمطبخ ويرجع يتذكر انه ماقال السلام عليكم ويدخل للمطبخ علشان يسلم
احيان اعصب وانفعل منه لاكن يقول ذولي بناتك نسوني حتى السلام لا اقوله و انتي محبتك غير وهما غير وانا احبهم من محبتي لك وهم جزء منك كيف ماتبغين احبهم واهتم فيهم ذولي بنات ويحتاجون اهتمام وعاطفه مني انا ابوهم اذا ماحسستهم بقيمتهم ومحبتهم عندي وما منحتهم الحب والحنان اللي يحتاجونه وين يدورونه هم صغيرات لاكن عندهم احساس ومشاعر مثلنا يحتاجون للكلام الحلو والمدح بالذات انهم اطفال نفسيتهم تتأثر بسهوله
وانا ما اغار منهم بكرهه فديتهم والله لا كن مدري يجيني احساس انه مهتم فيهم اكثر مني بالذات لما اكلمه اسولف معاه يتركني وينشغل فيهم هما واحيان اغار من محبتهم له احس انهم يحبونه اكثر مني وبجنون لدرجة ان الصغيرة لو طول في العمل او راح مشوار وتأخر تقلقني وراه ويالله اتصل لها فيه وتكلمه وترتاح حتى الأكل لو مو فيه مايحبون ياكلون الا لما يكون موجود وعلى السفرة وحدة يساره والثانية يمينه وفي السوق وفي البر نسيت يد زوجي كيف ملمسها ماسكينه كل وحدة من جهة وكثير اوقات يتهاوشون عليه عاد زوجتك تحبك واعذرها لو غارت عليك ترى احنى نغار من بناتنا اللي هم قطعة منا لاكن مو غيرة انا نكرههم ذولي قطعة من كبودنا كيف احد يكره عضو من اعضائه لاكن احيان تحس بغيره يا منهم يا عليهم بس غيره محمودة ان شاء الله وزوجتك بكره الله يرزقكم اطفال ان شاء الله وراح تخف عليك شوية فماةتحط في بالك شئ من هالناحية واغدق عليها عاطفتك وحسسها انها هي الأهم في حياتك وان محبتها ومكانتها عندك غالية واحتويها هي ما تقول كذا الا من زود حبها لك وربنا يوفقكم ويسعدكم ويزيدكم الفة ومحبة اللهم امين يارب .
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 09-01-2013 الساعة 07:18 AM
09-01-2013, 07:13 AM
ضوابط المشاركة
العرض الشجري