أخوي أبو حكيم ..

العجيب بأمر أهله ، إنهم كذا يتكلموا عنه من خلفه ( من يوم ما تزوجته ) ..
و لدرجة مرة وحدة من أخواته قالت لي ( علاجه الوحيد إنك تتطلقي منه ، عشان يصحى ) ..

كانوا يظهروا عيوبه لي ، و كنت أبعد عنهم عشان نفسيتي لا تتأثر ..
و ما كنت أظهر لهم أي شي عن اللي بيننا أبدا ..

.
.

العجيب ..
إنهم قدامه و أقصد بكلامي هذا أخواته ..
( زي العسل معاه ) و يحبوه ماشاء الله .. و افرح لمحبتهم له ..

ما أعرف ، إيش أهدافهم إلى الآن ؟؟؟
بس ما عاد يهمني كلامهم ، و ما صرت أتأثر مثل زمان ببداية الزواج ..

بالعكس ، دحين صرت أدلعه قدامه و أزيد ثقته بنفسه أمامهم و أمدح فيه و أطلعه للسماء أمام أهله ..
و هو صار مررررررررررررررررة ينبسط و يفرح ..

و حتى مقررة ، لو انتقدوه و حتى لو كلامهم صحيح ،، لإنه الصراحة كل كلامهم صحيح عنه ..
راح أبين إنه عكس كلامهم ،، و أمدح فيه مثل ما أعمل مع ولدي ، يوم أحد ينتقده ..
أتقصد أنادي ولدي و أقبله و أحضنه و أقول لولدي ( حبيبي .. مافي مثله ووو إلخ )

و أتوقع إنه الشئ هذا راح يأثر في زوجي كثير و يجيب نتايج رائعة بإذن الله ..
و الحلو ، إنه أهل زوجي ما عندهم مثلا ( عيب الوحدة تدلع زوجها قدامنا )

فحلو إني استغل النقطة هذه ،.

.
.

أنا بصراحة .. ( يمكن صح وصفته بأوصاف قبيحة هنا بآخر رد لي .. و للأسف ما أقدر أعدل و أحذف ،،
كلمة قذارة ، استغفر الله ما قصدتها ،، بس مقهورة منه و كاتمة .. لإني مهما كان إمرأة مجروحة )

لكن الحق ..
( ما أشوف إنه سيئ للدرجة اللي هم يوصفوه بها ، و لا بالدرجة اللي يتكلموا فيها عنه ) ..
و الناس اللي انقرصوا منه .. كان قصدي زمان و قبل لا يتعدل دحين ..
و بعد زواجي منه ، مو قبل الزواج .. كنت أشوف يرسلوا دعاوي عليه و علي و على أولاده في جواله ..
و كان الشي هذا بعد ما تزوج و بدأ يختلط بالناس .. و كان ياخد فلوسهم و ما يرجعها و يضحك عليهم ..
بس تغير الحمد لله دحين بالنقطة هذه ..

و أنا أدري إنه أهلي غلطانيين بعدم السؤال ، و شفت أخوي ما تعب حاله بالسؤال ..
اعتمدوا على سؤال أمي للأقارب و الجيران ..

بس كانت أمي كل ما سألت أحد
( قالولهم ما سمعنا عنه أي شي ، لا شي كويس و لا بطال )

و أمي قالت لي مرة من المرات ..
( تعرفي إنه زوجك ماله ذنب إننا نحاسبه على إنه إمام مسجد ، و طلع شخص عادي ؟
لإننا نحن اللي رسمنا له صورة بخيالنا و جلسنا نحاسبه عليها )

طبعا أمي بالفترة الأخيرة من حياتها ، كانت بالفعل تحبه و تعزّه ..
زوجي بصراحة و بشكل عام ( انسان جداً مؤدب و محترم ) ..
و ملامحه بريئة و فيه سمة الصلاح بملامحه ..