عشان لا أحد يقول ( اهتميتي بالدنيا و نسيتي الدين ) ..

أنا ماني جالسة أكتب قصة حياتي ؟ عشان أكتب عن كل الجوانب الحياتية ..
من دينية لإجتماعية لثقافية ووو إلخ ..
أنا بأركز على الحكاية اللي بدأت تدمر حياتنا ..
و بأحاول أختصر بس بأنقل كل النقاط اللي كانت تدور ببالي و بمخي ..
و التساؤلات اللي جلست بداخلي و أنا أبحث عن اجابتها ..

ماني تاركة عملي و بيتي عشان فضاوة و اكتب ..
بأحاول ألقى علاج لنفسي ، لشي عجزت أنساه لسنوات و بدأ يدمر حياتي ..

.
.

لكن عمري و لا يوم و لا ثانية ، غفلت عن الجانب الديني ..

بس باللحظة اللي حسيت فيها إنه أنا بنفسي بديت أضعف ( دينياً ) بسبب عدم وجود الجو الروحاني ببلاد الغربة
و ما لقيت الصحبة الصالحة اللي تعينني ..

بديت اهتم و أركز على تقوية الوازع بداخلي ، حتى أقدر أبني نفسي ( ثم غيري ) ..

.
.

اليوم تكلمت مع زوجي عن النقطة هذه ..

قلت له عندي طلب صغير .. سألني إيش هو ؟
قلت له ، طلب صغير بس يبغاله تفكير مع نفسك ..
سألني إيش هو ؟

قلت له ، إنت تعرف و تشوف قد إيش أخاف على ولدي و ارحمه و أحن عليه .. مو كذا ؟
قال لي ، إيوة ..
قلت له ، تعرف كمان إنه ربي .. ارحم علينا من رحمتي على ولدي و أنا ولاشي قدام رحمة و حب ربنا لنا ،، مو صح ؟؟؟
قال لي ، أكيد ..
و فكرته بإختصار سريع قصة المرأة في الحرب اللي لقيت ولدها و ضمته و الرسول صلى الله عليه و سلم إيش قال ..
و افتكر و قال أكييييد طبعا ..

قلت له ، طيب شفتني كيف زعلت و تعبت مرة و غضبت .. وقت عرفت الحكاية هذيك ؟
و ربي يغار عالعبد أكثر من غيرتنا .. و أكيييييييد ربنا زعل و غضب عشان حرماته و خاصة ( رمضان ) ..

قال لي ، عشان كذا مو رحت معاك و اعتمرنا ..
قاطعته و قلت له .. أنا ما أبغى أفتح سيرة الموضوع ، بس أبغاك مع نفسك ..
تعاهد ربنا إنك ( رمضان الجاي ) تعوّض عن كل اللي ضيعته برمضان هذا ..
و زي ما بتحاول كيف تراضيني و تفرحني ..

فرّح ربنا ..

مو لازم كمان ، إنك تستنى لحد رمضان الجاي .. ما نعرف مين راح يعيش و مين راح يموت ؟؟؟

بس خلي الشي هذا بينك و بين ربنا ..
و فكرته بقصة الثلاثة اللي كانوا بالكهف ..

و قال لي ، إيوة كل واحد قال أفضل عمل عمله بينه و بين ربنا و انكشف باب الغار ..

قلت له ، عشان كذا ..
أنا ما فكرت بنفسي و بس .. فكرت عشان إنت .. و عشان ربي يرضى عليك ..
خليه بينك و بين ربنا .. فكّر كيف تفرحه و ترضيه لإنه زعل منك أكيد ..

.
.

هذا اللي حصل ، و قلته للفائدة مو للمدح ..