السلام عليكم ..
انا تابعت الموضوع من البداية بس انشغلت بسبب الاختبارات فما قدرت ارد على المستجد في الموضوع ..
المهم
في البداية حابة أرد على الأخــ/ت سرب الخيال
أختي اليتيم بشر مو ذنبو أنو صار يتيم هذا الشي من الله مو بيدو .. ليش يصير مالو قيمة في مجتمعه في شي مو بيدو
احيانا اتعجب من تفكير المجتمع. الايتام أكثر فئة تحتاج مراعاه تريد ظهر لها تسند حمولها واثقالها عليه تبغا حب وحنان اكثر مننا لانو احنا لقيناه عند اهلنا اما هما لا فليش نحرمهم من هذا الشعور بسبب مجتمع وعادات وتقاليد ..
واكثر شي تعجبت لما قولتـ/ي عشان الخوال وقبيله وحموله .. دامها انسانة عافه نفسها ومحترمه فليش ادور على قبيلتها وحمولتها هوا بيتزوج البنت ولا خوالها ..
والصراحه اول مرا اعرف بدي العادات والتقاليد واستغربت منها كثير وانقهرت عليهم بشي مالهم ذنب فيه فما بالك بالي يعيش الموقف ..
اخوي متلازمة رفضوني يمكنها خيرة من الله ولاتياس
اعرف ناس مايتزوج الولد الى اذا كان عمرو 30 سنة اقل من كدا مايتزوج يعني لسا العمر قدام وانت لسا 28 سنة
اولا : انا اقول خذلك راحة لمدة 6 اشهر او سنه بعدها خلي اهلك يبحثو مرا ثانية يعني لاتخطب في دي الفترة ..
ثانيا : بالنسبة للي يرد عليكم بمافي نصيب بدون سبب : انا الصراحة استغربت كف مايعطوا سبب واضح المعروف لما ترفض تقول سبب الرفض حتى الواحد يعرف سبب الرفض ..
طيب في حاله الخطبة وتم الرفض لاسمح الله (وان شاء الله يتسهل امورك ويوافقون ) حاول ان الوالدة تقولهم انو ممكن نعرف السبب بس باسلوب ماتبين انها زعلت او تضايقت حتى ماتنحرج الي ردت عليها وتقدر تقولها السبب الحقيقي ..
ثالثا: اما الي مايتزوج قبائل :
أنا الي اعرفو انو الغير قبيلية تتزوج القبيلي لانو اعلى من الغير قبيلي اما الغير قبيلي مايتزوج القبيليه لانو ماينفع تاخذ اقل منها
(بتفكير العادات والتقاليد ) طبعا هذا المعروف عندنا فاستغربت انهم مايزوجو قبايل ..
رابعا: اما البيت الي رد عليكم بدون مايسال عنكم :
الصراحه كل واحد يصير فوق راسي علامة تعجب اكبر من الثاني
كيف يردو خاطب بدون لايسالو حتى لو في نيتهم الرفض لازم يسالو عشان يتاكدو انو رايهم في مكانه او لا
انا تقدملي واحد مع انو رفضت واهلي رافضين بس برضوا سالنا عنه وعن اهله عشان نكون واثقين انو ردنا صح وما اندم
خامسا:بالنسبة للي يرد عليكم بعد الخطبة بساعتين :
المفروض يتم الرد ثاني يوم من الخطبة حتى لو كان في بالهم الرفض ذوقا
فهذا استغربت منه !
سادسا : بالنسبة لزواج الاقارب :
انا كنت مفكرة انك تاخذ من احد اقاربك لانهم يعرفو ظروفك واخلاقك بس لما شفت ردك غيرات رايي!
بس احس السالفه لها سبب بالرفض المتكرر
لانو احتمال الناس اما يكونو متخوفين من سالفه الطلاق وبالذات انك طلقت على طول في بداية الزواج
او انو يكلمو طليقتك ويعرفو سبب الطلاق
بس الغريب بكاء البنت بشكل مفاجئ مع انكم كنتو كويسين مع بعض
هل قلت شي او سويت شي خلاها تبكي ؟
لان بكاها غريب والرفض بدون سبب اغرب .
سابعا:الشوفة الشرعية:
من البيوت الي دخلتها هل صارت الشوفة الشرعيه ؟
لان الشوفة الشرعيه تحبب بين القلوب وتالف بينها
اذكر بنت خالتي كانت رافضة الزواج وشايلة الفكرة من راسها وانخطبت في البدايه رفضت وقالت مابغاه وحاولو فيها وقالو لها انتي شوفيه واذا ماعجبك بنتقبل ردك وبنرفض
بعد الشوفه وافقت مع انها شافتو بالصور بس كانت الشوفه غير لانو تكلم معاها وكذا والله يوفقهم
ثامنا:الاستخارة:
استخير قبل اي خطبة وقبل ماتقدم على اي شي
والله يوفقك ويرزقك بالزوجه الصالحة
اللهم امين
وشكرا

السلام عليكم اختي الكريمة

لا كلها ما حصل فيها شوفة شرعية و السبب واضح لأنهم مو موافقين من البداية تخيلي كل البنات اللي اهلي شافوهم اهلي وافقوا عليهم لكن المفاجأة تكون انه امها ترد و تقول مافي نصيب و الله يوفق ولدكم
و كلهم يردون قبل ما يسألون عني

اللي طلقتها في فترة الملكة كانت قريبة لي و ما اقول الا الله يوفقها و يسعدها فين ما تكون و حسبي الله و نعم الوكيل على اللي كان السبب و فرقنا و يعلم الله اني ما عمري زعلتها

عندنا و عرفنا انه الشوفة الشرعية ما تحصل حتى توافق الفتاة و تستخير و ترتاح مبدئياً لموضوع الخطبة

وصلت المواصيل انه جاتنا 3 ردود سلبية في شهر ذو الحجة

والله اني ما احسد اخواني لكن كلهم من اكبرهم الى اصغرهم تزوجوا من "اول خطبة"

الرد السلبي صار عندي مثل شرب الشاي احياناً تجيني امي و تقولي ام البنت الفلانية ردت و قالت مافي نصيب و اقولها هالكلمة "طيب"

نشوف متى تجي هالسندريلا وان جات لأنفجر في وجهها واصيح واقولها فينك من سنين ادور عليك؟!!!

{رَبِّ لا تَذَرْنِي فَرْدًا وَأَنْتَ خَيْرُ الْوَارِثِينَ}