انا مريت باللي مريتي فيه بالضبببط
و الشي الأمر منج اني في بلد الغرب ، يعني لبس بناتهم ..... لا تعليق

الصراحه في البدايه كنت أجن و اعصب و اقلب الدنيا ، و تييني فترات احس اني بديت اكرهه
مع ان زوجي ملتزم نوعاً ما و يعرف ربه و احس انه يحبني وايد و ادري انه مو متعمد يطالعهم
و للعلم ..انا مو مقصره كلش معاه .. شكلي حلو و لبسي في البيت حالي حال اللي برا

عقب فتره طويله من نظرات و ردة فعل زوجي هذي من بعد ما يشوف بعض البنات ، حسيت بردت اعصابي و خفت غيرتي من كثر ما تكررت هالشغلات .. يعني قلبي شبه ماات

بعدين قمت افكر بالموضوع في فترة هدوء اعصابي و لقيت ان هذي فطره في الرجل ، مهما كانت نوع الرجل و علاقته في ربه .. اذا لقا شي يشده ما يقدر ما يطالعه ( سواء نظره اولى و سريعه ، او انه يمعن النظر لثواني زياده )
و هم بهالشي ما يقصدون اهانه لنا او انهم فضلو البنات علينا

ادري هالشي يحرق القلب ، و انا حاسه فيج
بس حرام تخربين علاقتج و حبج لزوجج عشان هالامور
لان مثل ما قلت لج ، هذي فطره فيهم

نصيحه مني ..
حاولي تطنشين شوي و لا تهتمين ، لان اذا ظليتي شايله هم هالسالفه محد بيتعب غيرج
و الاهم انج ما تبينين له غيرتج هذي خاصه من هالناحيه ، لأنج اذا بينتي له ممكن تصير مشاكل بينكم مثل ما صار معاي في البدايه
و تأكدي ان مهما كلمتيه و حاولتي فيه ، ماااكو فايده .. ما راح تكون عناد عليج بس اهو جذي ما يقدر ما يطالع


والله يعينج حبيبتي و يسخر لج زوجج