سبحان الله ..
فكرتيني بقريبتي ، كان الفارق بينها وبين زوجها بسيط وتزوجوا وهم طلاب
نفس القلق ، نفس المشاعر الملخبطة ، نفس البكاء ، ...
والحين بسم الله عليهم كناري

يا ما بنات تزوجوا شباب اصغر منهم وعاشوا حياتهم مبسوطين ومرتاحين ..
الناس ما يرضيهم شيء ولا يتفقون على شيء ..
ناس يقولوا أفضل السن يكون متقارب ، وناس يفضلوا الفارق الكبير ..

والرجل مهما كان عمره ومهما كان عمر زوجته يحتاج يكون طفلها المدلل
إنتِ متحسسه من حاجة زوجك لكِ كأم لأنك متحسسه من الفارق العمري بينكم ..
شوفي الأمثال والفلاسفة اش يقولوا ، الكل يتفق على إن الرجل طفل كبير

أنا مو شايفه مشاكل بينكم ، أنا شايفة بنت قلقة وعامله من الحبة قبة ..

وبعدين زوجك متحمس لشهر العسل ، إذا سألك فين تبغيه قولي ودي بكذا ..
هو رجال ويصرف نفسه إما المكان والتكاليف تناسبه وإما تتفقوا على مكان جديد ..
وكمان إنتِ قلتي إنه متحمل أمور أبوه العقارية ، أكيد أبوه صارف له راتب ..
والعقار ما شاء الله يكسب ذهب ،،

انظري لنصف الكوب الممتلئ ولا تنظري لنصفه الفارغ ..
تأخر الزواج وطالت فترة الملكة ، قولي فرصة أتعرف أكثر على شخصية زوجي ..
أطور نفسي أكثر في المطبخ ، أدخل دورات تثقيفيه للمقبلين على الزواج ..
أقطع شوط في دراستي الجامعية لأن الزواج ممكن فيه حمل وطفل وهذي جدا جدا
مرهقه مع الزواج .. واسأل مجرب ولا تسأل طبيب ..
يعني في حالتك صراحة أحس تأخير الزواج له مميزات كثيرة أهمها الجامعة ..

إذا كنتِ محتاجه لجرعة حنان من زوجك اطلبيها بأسلوب أنثوي ساحر
لا تكتمي عواطفك في قلبك .. اللي محتاجته اطلبيه ..
هو احتاج حنان ودلال وطلبها ، انتِ كمان تحتاجي مثلك مثله ..
حلو لما يحس الرجل إن زوجته محتاجته ..
لما يقولك إن موضوع تأخير الزواج مضايقه لا تتظاهري أن الموضوع عاااادي عندك
قولي له والله حتى أنا كان نفسي يتقدم الموعد ، كان نفسي يلمنا بيت واحد ..
لكن قدّر الله وما شاء فعل ، وإن شاء الله كل تأخيره فيها خيره ..
أما إنك تتصنعي المثالية وإن الموضوع ولا فارق معاكِ مو صح ..
قولي رايك وقولي مشاعرك وفي النهاية اتركي له القرار مع أهله ..
ممكن يكون بيحاول أكثر مع أهله على تقديم الزواج لكن مع كلامك يتراخى ..
لأنك "مو فارقه معك" أو ما أبديتي له رايك الحقيقي ..

عمومًا .. صفات زوجك قلما تجديها في هذا الجيل فلا تضيعيه بأسباب
اسمحي لي أقولك إنها "سخيفة" ..
لا تنظرين للي مثلك متزوجين بناس يقاربونهم بالعمر ..
انظري لمن هم أقل منكِ .. نساء متزوجات برجال يصغرونهم في العمر ..

والله يوفقكم يا رب ...