حياك الله أختي نور الإيمان وجعل مسائك وصباحك وكل حياتك نور في نور يارب
وأشكر لك إهتمامك بموضوعي إللي دخل في موضوعك بالعرض وأنا أعتذر منك يانور إذا كنت ثقلت عليك وفتحت لك شغله معاي هنا في مشكلة أولادي
أخاف إني أحرجتك معي وقسم الإستشارة هناك يكونوا بحاجتك وأنا أخذت من وقتك وجهدك الكثير فأرجوا منك السموحة وأنا غصب عني طرحت مابخاطري لأني كنت فعلا بحاجة لرأي سديد علشان أستنير به في هاذي المشكلة ولأني بحاجة لحلول لهاذا الوضع
وأنا كمان نفسيتي تعبت من التفكير في مشاكلهم الحين أنا في البيت أمسك كل واحد من الإثنين على حده وأجلس أمدحه أول شئ وأثني عليه وعلى أخلاقه وبعدين أناقشه وأفهمه إنه هو العاقل والحليم والرجال البطل وإنه يحب إخوانه
ومايرضى في أي أحد منهم تمسه حتى الشوكة وأجلس أشرح له كيف الإخوة في الإسلام والمحبه بين الإخوان والترابط والتكاتف والتراحم وإن إخوانك هما بحاجتك وأنت بحاجتهم فلازم إنك تعاملهم بالحسنى طبعا بدون ما أخصص أحد بعينه من إخوانه

بالنسبه لكلامك يا أخت نور عن منصور وطريقة مبالغته في لفت نظر أبوه له ويبكي بشدة ويصيح وقت حدوث المشكلة أي نعم يسويها وأنا لاحظت عليه وقت ماتصير مشكلة بينه وبين سلطان وأبوه ليس موجود بالبيت يجي عندي أنا يشتكي من سلطان بس بدون صراخ وعويل يعني يشر ح المشكلة بدون ذرف دمو ع ومبالغة زايدة لاكن لو أبوه موجود بالبيت صياح منصور يوصل الشارع عاد لو وصل الأمر وسلطان مد يده عليه منصور يطيح ماعاد يتحرك من مكانه ويصيح بأعلى ماعنده كل هاذا بس علشان أبوه يجي ويشوفه طايح ويقوم يهاوش سلطان على إللي سواه فيه طبعا أبوسلطان بعض الأوقات إذا صارت بين سلطان ومنصور مشكله أنا أطلب منه مايتدخل طبعا هو ما عاد يتدخل بينهم ويقبل على مضض بس يقول لي خلاص روحي حليها طبعا أنا
ماعندي إلا حلين مافيه غيرها يا إنهم يتحاسبوا ويتعاقبوا سوى أو إنهم يتراضوا ويتسامحوا وعفى الله عن ماسلف والحمدالله مرة يتعاقبوا ومرة يتسامحوا وإذا كان الخلاف على شئ مثلا لعبه أوأي شئ أشوف هي تخص من فيهم وأرجعها له والثاني إذا صمم على أخذها أعاقبه ليش ياخذ شئ مايخصه طبعا أبو سلطان كان من أول إذا منصور طالب بأي شئ خاص بإخوانه كان أبوه يشيله ويعطيه له بس صارت بيني وبينه مشكله على هاذي السالفه وبعدها إمتنع عن هاذي العاده وصار منصور لوطلب من أبوه شئ عند إخوانه
يقول له رو ح شوف أمك وأنا أقنعه بطريقتي لأن بعض الأوقات أبوهم يعطي كل واحد فيهم مبلغ 50 ريال لما يروحوا السوق وكل واحد فيهم ياخذ لعبه له خاصه يختار إللعبه إللي يبغاها طبعالما يجوا البيت كل واحد عنده لعبة مختلفه منصور يصير له نفس إنه يجرب لعب إخوانه علشان إنها تختلف عن لعبته يقوم يطالب بها أبوه علا أساس إنها أعجبته ويبغاها طبعا أنا أرفض وأبوه يمتنع يقول لها أنا مادخلني في لعب إخوانك روح شوف إن أعطوك تلعب فيها هاذي لعبهم و هم أحرار فيها وأنا لما يجي يطلب مني مثلا لعبة فلان أخوه أقول له خلاص هو يلعب بلعبتك ويعطيك تلعب بلعبته بس بشرط بعدين ترجعها له طبعا يوافق على طول ويتبادلوا باللعبات مع إخوانه وتمشي الأمور
بالنسبه لسالفة إن أبو سلطان يدخل معانا المنتدى هاذي مستحيله زوجي لو بكيفه حتى الجوال ما يحطه بجيبه لايحب جوال ولا نت ولاتلفزيون ولا أي شئ تقني زوجي يحب المسجل يستمع له إذا كان قرآن أو محاضرات أو شعر ويحب يقرأ جرايد وكتيبات لاكن الباقي لاتقربينها حوله هو يدري إني مشتركة بالمنتدى ودائما يسألني عن أحوال الأعضاء إللي فيه لأن أنا صرت متأثرة بالمنتدى وأي موضو ع أقراه على طول أقول له عنه ونجلس نتناقش فيه وبعد فترة يجي يسألني عن العضو هاذاك وش سوى في مشكلته وإيش قالوا له الأعضاء من حلول أي قصة أقولهاله من المنتدى مستحيل ينساها وحتى الأخبار أحيان يتابعها بالتلفزيون وأحيان يسألني عنها وش فيها جديد بالنسبه لرساله طبعاهو يحب أسلوب الرسائل وراح تنفع معاه لاكن لو أنا أواجهه وأناقشه في الموضو ع وجها لوجه ولحالنا هو مستمع جيد ومايقول لا ولايخالفني وأحيان يتعدل وينتبه لطريقته لأنه هو بذات نفسه عارف إن أسلوبه وطريقة تعامله هاذي غلط في غلط بس تاخذه العاطفه ويتصرف بتسرع عند حدوث المشكلة ما يتأنى في إتخاذ قراره على طول تصدر منه ردة فعل قوية
تجاه سلطان بالذات إن زوجي عنده مرض السكر ويعصب وينفعل بسرعه عاد تعرفي مريض السكر كيف ردة فعله مايقدر يمسك نفسه ويهدي أعصابه وأنا سكوتي وقت نقاشي له ليس ضعفا مني أو إن حجتي ضعيفه لا مو هاذا السبب أنا أتأثر بكلامه عن وضع منصور الصحي وعن حالته فما عاد أقدر أواصل نقاشي معاه
ومن شدة تفكيري اجلس أحاسب نفسي أقول ياربي لويصير في منصور شئ ماراح أسامح نفسي أنا أحيان أقسى عليه وإذا غلط أتكلم عليه حتى بعض الأحيان يبكي وأحيان أضربه إذا كان غلطه كبير ومكرر
بالرغم من إني إذا ضربته أو تكلمت عليه والله إنه يجي يبوس راسي ويدي ورجولي ويقول خلاص يا أمي أنا آسف
ماعاد أكررها سامحيني خلاص أوعدك إنها آخر مرة عكس أبوه مثلا أبوه بعض الأوقات يصارخ عليه مثلا لو مارضي ياخذ علاجه أو مثلا شرب ماء أو عصير شديد البرودة لأنه يخاف عليه من إلتهاب اللوزتين والصدر أو إذا طلع برى الشارع بين الحر الشديد أو كان الجو هواء وغبار أبوه يصارخ عليه خايف عليه لمصلحته لأن هو منصور مناعته ضعيفه وياخذ العدوى بسهوله وأبوه يجلس يصارخ ويتكلم عليه طبعا منصور يزعل من أبوه ومستحيل يعتذر منه حتى أبوه يجي ويراضيه ويطلعه معاه البقاله أو مكان العاب ويشتري له إللي يبغى ذاك الساع منصور يرضى على أبوه .
بالنسبه لإدخال طرف ثالث أنا فكرت بالدكتور الخاص بمنصور بس قلت خلني أنا أحاول مع أبو سلطان عساه يتغير طبعا هو مايقصر أحيان يتعاون معي ويسمع إللي أقوله له ويلتزم فيه بس فترة وينسى إلتزامه لي ويرجع لنفس الإسطوانة بالذات لو صارت المشكلة بين سلطان ومنصور قدام عينه على طول ينفعل ويعصب وتنهار كل إتفاقياتنا أنا وياه يعني أبو سلطان ماعنده موقف ثابت في هاذا الخصوص ولايلتزم بإتفاقه معي والله هو أبو سلطان عارف إن طريقته خطأ وغلط وهو مشكلته إنه يبغى كل الأسرة تفكر بنفس تفكيره تجاه منصور وتعامله بنفس طريقته هو وأنا صراحة أشوف إن هاذا إفساد لمنصور وليست تربية وإهتمام مثل مايظن وفي نفس الوقت أشوفها تدمير لشخصية سلطان وكيانه وإحساسه بأن ليس له مكانه عند أبوه بالذات إن سلطان لما كان عمرة 9 سنوات كان هو الإبن المفضل والمدلل عند أبوه بس لما جاء منصور نافسه على هاذي المكانة وأخذها منه وبعدها سلطان تحطمت نفسيته بالذات لما شاف إهتمام أبوه الزايد بأخوه منصور .

إلى هنا ياأختي الغالية وأستأذنك وأنا كلي آذان صاغية لكلماتك وبإذن الله تعالى سأنفذ
كل حلولك وإذا كنتي تريدين أن تكتبي لولدي سلطان نصيحة من عندك فهو مستعد لأن يقرأ كلامك له وسأطلعه على ماتقولينه له لعلا وعسى أن يفهم منك ويسمع منك أكثر مني
وتقبلي تحياتي وشكري وإمتناني لكي أختي الفاضلة .

__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق




اشهد ان لا إله إلا الله وأن محمد رسول الله