السلام عليكم يا عاشقات ...
انا كنت معاكم هنا من سنه تقريبا ..... كانت أخر مره دخلت فيها لقسم العاشقات والمنتدى كله وكنت خارجه من تجربه مريره ومحزنه جدا بسبب عمليه منظار
ولسه فاكره رد أختى زهور لما قعدت تواسينى...فاكره كل اخوانى زهور الدعاء وزهور البستان وعاشقه الطفوله وحلمى قريبو مرميس و منى وكوكار وماريا و دودى وكل البنات هنا بحبهم قوى وبجد وقفوا جنبى وواسونى ...

بس انا من يوم المنظار قلت انا هاغير حياتى وحطيت الحمل قدامى هدف وقلت مش هدخل هنا تانى غير لما أكون حامل بأذن الله وامره حتى لو بعد سنين ...,والحمد لله والشكر له الف مره أنا الان حامل وبدون اى شئ...

ولما تعرفوا حالتى ايه هتستغربوا أكتر !! بس انا نويت اكتب اللى حصلى علشان بجد محدش ينسى ربنا فى قصه الحمل دى نهائى وعلشان تعرفوا يا بنات ان دائما فيه امل طالما ربنا موجود حتى لو حالتك صعبه
مش هطول عليكوا ..من سنه تقريبا شهر 5 2010 عملت منظار..وطلع عندى اندوميتريوسيس على الحوض والدكتور شاله بس اللى دمرنى انه لقى القنوات فيها التهاب شديد ..وواحده منهم مقفوله تماما
مش عاوزه اشرح لكوا أنا ساعتها اتدمرات قد ايه وتعبت نفسيا جدا وحالتى كانت لا توصف
كان ساعتها بقالى سنتين ونص متجوزه وكنت مقضياهم عند الدكاتره

وكانوا كلهم بيقولوا عندى ضعف تبويض ..والتبويض عندى بيحصل من مبيض واحد ..ياما اخدت منشطات وظبت ايام التبويض وجماع بيوم ويوم ..وبرضه مفيش فايده
المهم الدكتور اللى عملى منظار قالى مفيش قدامك غير( الحقن المجهرى) ودخلت فى مشكله تانيه الحقن محتاج انى ماديا اكون مستعده له ,,ومحتاج انى نفسيا اكون كويسه علشان يحصل الحمل

علشان كده بصراحه بعدت عن المنتدى خاااااالص وعن اخبار الحمل والتعب والمرض ..لقيت انى كده بتعب نفسى اكتر ولقيت نفسى كل ما بقرأ مشاكل البنات حالتى بتزداد حزن وتعب
وبعد بكاء مع نفسى وصلوات طويله فى وقت القيام وشكوى لربنا ..حسيت انى قويه وان حتى لو القنوات مش سليمه فأنا هاحمل بأذن ربنا ..بدأت انا وزوجى فى تدبير مبلغ العمليه ..وبدأت ابحث على النت عن المراكز اللى بتعمل الحقن

تقريبا على ما جمعنا مبلغ العمليه كان على شهر 12 وبدأت فى العلاج والحقن ..واللى عملت الحقن عارفه يعنى ايه تاخد اكتر من 40 حقنه فى اقل من اسبوعين

والحمد لله تمت العمليه ..بس ربنا لو يرد لى الحمل ...انا وضعت الاجنه يوم 26 يناير 2011 ..يعنى تقريبا تانى يوم الثوره عندنا فى مصر ..كان لازم اكون هااااديه وحالتى مستقره ..لكن اللى حصل ان كنت بسمع صوت الدبابات من الشباك يوميا ..وانا بطبعى حساسه شويه طبعا اتخضيت كذا خضه محترمه وكنت ببكى وبصراحه امى ساعتها وزوجى البيت كله كان مضطرب ومش عارفين ايه اللى بيحصل ...المهم هو فى الاخر نصيب لكن اعتقد ان توترى الشديد اثر على اررجاع الاجنه ونزلوا ال3 أجنه
طبعا حالتى كانت لا توصف ودخلت فى حاله سيئه مره تانيه بس مطولتش شهر ونص كده وبعدين نصحونى أستعيد نفسيتى علشان أرجع الاجنه اللى عندى ويحصل المره دى ان شاء الله
هاكمل بعد شويه يا بنات ...

__________________