السلام عليكم ورحمة الله وبركاته
مساء الخيييير لجميع أعضاء هذا الصرح الشامخ فعلا منتدى فيه من الفائدة ماالله به عليم

أبغى رايكم
انا تزوجت وعمري 28 سنه وبعد سنه انفصلنا
والآن عمري 34 سنة وخطبني واحد عن طريق زوج صديقتي من مدينة غير مدينتي بس خايفه أوافق لاننا مانعرف شي عنه وماقلت لاهلي لسه لان اذا وافقت يروحوا يخطبوني من أخواني بس ماادري آش راح يكون مصيري مع واحد متزوج وعنده ولد وماعنده وظيفه بس عنده شقق مفروشة وانا معلمة ولكن زوج صحبتي يمدح فيه بس انا مااثق بالناس
آش رايكم خاااايفه مررره أستخرت بس لسه خااايفه مرات أقول آش ذنب زوجته وانا ماادري ليش يبغى يتزوج الله يستر
آش رايكم

__________________

وعليكم السلام ورحمة الله وبركاته

والله شقوولج ياعزيزتي
آنا أقوول أول شي
انتي خبري أهلج بالموضووع
شوفي وش يقولون
في حال موافقين
خلهم يسالون عنه في منطقته
يسألون عنه بشكل مكثف
يشوفونه زين ولا لا
هذا أول شي

الشي الثاني
في حال صار كل شي تمام
وسألوا عنه وطلع اووكي
وجا خطبج
تقدرين تسأليه حزتها
و لو إني أفضل إن من البداية
من لما يخطبج يسألونه أهلج
ليش يبي يعرس على زوجته !

الأهم من هذا كله تكونين مقتنعة
يعني لو أهلج وافقوا وانتي مب مقتنعة من البداية
ما أنصحج تقدمين على هالخطووة إلا عن قنااااعة تاااامة
يعني فكري زين
شوفي شنو الأسباب اللي بتخليه يتزوج
وهو ماعنده وظيفة
وحتى لو عنده شقق
بيقدر يصرف على بيتين
هل زوجته تدري إنه ناوي يتزوج
حطي في بالج شي مهم
انتي في حال وافقتي
خلي في بالج
إن له بيت ثاني
زوجة أولى
ولد
يعني بتلاقينه عاطي بيته الأول الأولوية في حياته

أعلم بمدى قلقج وخووفج
مع كل هالظروف
و مثل ما تقولين ما تثقين بكلام الناس
ومعاج حق في هالسالفة
في حال صارت الأمور تمااام
حاولي تتكلمين معاه
تعرفينه عن كثب
إذا حسيتي إن الرجال زين
وارتحتي له
وأهلج موافقين
وانتي اقتنعتي
توكلي على الله
أما إذا من البداية شفتي إن لا
في أمور متلخبطة
وفي أشيا وايد مب مرتاحة منها
ما أنصحج بالاستعجال
لأن مثل هالأمور ما ينفع فيها العجلة
وحطي ف بالج
منطقة ثانية
يعني ما بتكونين يم أهلج
كل هالأمور فكري فيها
واوزنيها
وإذا لقيتي نفسج بعد كل شي ف حيرة
استشيري شخص
تثقين فيه
شخص تقتنعين بكلامه
شخص تعرفين إن صاحب عقل راجح
و آارائه حكيمة

و ربي يكتب لج اللي فيه الخير والصاااالح
ويووفقج إن شاءالله
ودي

__________________
"إخوان سنـة وشيعـة هذا الوطن ما نبيعـه ,, خذ هالشعار و ذيعه و تذووب الطائفيـة"
( منصووووووووووووورين والناصـر الله )

ماتدرين ليش يبي يتزوج؟؟

فرضا عرفتي.. وش راح يقدم أو وش راح يأخر؟؟

قالك احبها واغليها بس عندي رغبة للزواج.. أو يقول والله مقصرة معاي وفيها اخطاء ..

انتي شنو استفدتي من معرفة السبب!!!


بكل الحالات لا تعتمدين في قبولك لهذا الزواج على شنو سبب زواجه..
انتوا عليكم تسالون عن الرجال وعن اخلاقه..
ناسبكم الحمدلله استخيري وتوكلي..ما ناسبكم خيره بغيره الحمدلله الدنيا موواقفه على هذا الرجال وبس..

لكن من البداية حطي في بالك انه عنده زوجه هل عندك القدرة على تقبل الزواج من معدد؟
لأنه كثير من الزوجات بعد ماتتزوج تستوعب انها تزوجت زوج معدد .. تقول انا موقادرة اتقبل انه زوجي عنده بيت غير بيتي!!
وأصعب شعور لي لما أتخيل انه زوجي يعاشر زوجته الاولى!!!!
على الرغم انها عارفة من البداية انها بتتزوج زوج متزوج.. طيب ليش تغيرت النظرة بعدالزواج.

بكل بساطة تقول : ما كنت أعرف معنى الحب.. لكن بعد ما تزوجته تحركة مشاعر الحب عندي والحين اتمنى يكون لي لحالي وماتشاركني فيه اي وحدة؟!!!!

وربي يكتب لك اللي فيه خير لك وصالح..

__________________
سئلت اي الرجال تحبين؟؟
قلت : من اختلط عنده الحب والخوف علي..
عذرا- ليس هناك حب كحب ((أبــــــي))

لا توافقين على شخص ما يشتغل
والطامه الكبرى انه متزوج وعنده ولد
وجهت نظري انج ترفضيه وما تفكري فيه ابدا
لانه في هالحاله هو بيكون طمعان في راتبج كونج انتي موظفه وبعدين لاتنسي انه عنده زوجه غيرج
يعني بتموتي من الغيره لما يكون عندها
اهون لج تكوني معززه مكرمه في بيت اهلج ولا انج تنقهرين ويرتفع عليج الضغط والسكري اذا كنتي مصابه به الله يشفيج ويشفينا منه

أهم شي يكون عنده وظيفه مو تتزوجين وتتغاضين وتمشين الحال ( عشان الستر ) وفي النهاية تلاقين نفسك انتي اللي تدفعين مصروفك وأجار شقتك و كل شيء يخص بيتك ، حبيت أنبهك لأن صديقتي والله العظيم وقعت في نفس المشكله ـ اكتفى زوجها بالنفقة عليها في بداية حياتها الزوجية تقريباً سنة ، وبعدها هي اللي تدفع أجار بيتها ونفقتها ونفقة أولادها ومصاريفهم ومقاضيهم وكل شي ، وهو بس يهتم بمصروفات زوجته الأولى وأولاده منها وإذا إعترضت قال انتي موظفه وما عندي فلوس أصرف على بيتين أنتي أدفعي لبيتك وأنا أدفع لبيتي !!!!
يعني بس زوج منظر فقط ، ما قدرت تصبر على الوضع وطلبت الطلاق وعندها 3 أطفال ..

__________________

اللهم يسرأمرها

واكتب لها الخيرحيثماكان,ويسره لها

المهم ان يكون لديه دخل ثابت وظيفة وملزم بالنفقة وضعيها شرط من شروط
وبالتووفيق لك اختي

اجل اشلون بيعدل واحد ماعنده دخل ثابت؟!!
كل واحد قال ابي اتزوج ونسي شرووط التعدد!!
لازم تسألو عنه بديرته
وتكوني مستعده للزواج من معدد
وتحطي شرووطك من الحين مو تتنازلي وبعدين تجلسي تقولي ظلمني ومايعدل وووووالخ
الله يوفقك

__________________
[ ﯾٱﻟﻟہ ﺣﺳﻥ ﺂﻟﺧٱﺗﻣہ

معلمه +زوج = حياة غير سعيده الا مارحم الله
عاطله +زوج = حياة سعيده ان شاء الله

تراه ماتقدم لك بشخصك ... متقدم لراتبك ..والدليل لو انه جاد جاء مع الباب .... اذا وافقتي عليه راح يقولك احمدي ربك انك لقيت زوج هذا كلام المجتمع والله يوفقك..