عفوا يا معدن الرجولة اكيد واحد فينا فاهم السؤال غلط
السؤال بيقول (كيف تبلغ زوجتك بقراراتك المهمة) المهمة
روحة السوق مو موضوع مهم.
ولمن الاهل ينوو يزوروا بعض ما يمكن القرار يكون (لا) عند أي اصيل واصيلة.
دوريات البنات كمان مو قرار مهم يحتاج مشاركة في اخد القرار.
سفرك هادا موضوع يفرضو عليك عملك ومصلحه الاسرة العامة انك تسافر وقت ما احتاجك عملك للسفر

انا ما اقصد كل دي الامور. انا اقصد امور يكون القرار الكامل عند الزوجين والقرار دا يمسهم هما الاتنين ويجي واحد منهم يقرر لوحدو.
زي مثلا، يجي البيبي تروح تسجل اسمو من اختيارك انتا لوحدك بدون ما تشاورها.
مثال تاني. تقرروا انكم حتشتروا اوتعمروا بيت. تقوم انتا لوحدك تقرر الحي وتختار البيت وتروح تشتريه بدون ما تشاورها وهيا شريكتك بحياتك.
مثال تالت. تقرر انتا انك تعزم اهلك او اصحابك (ولاحظ انتا اللي تقرر يعني منك تجي العزيمه) فتروح لهم تقول لهم الله يحييكم اليوم الفلاني الغدا عندي. وانتا مو عارف ايش ظروف زوجتك تقدر ما تقدر، ولا تاخد رايها ولا تكلمها بالموضوع الا لمن تقول لها انا عازم اهلي او اصحابي ع الغدا اليوم الفلاني. (بذمتك اي استهتار دا بيها وتجاهل لشخصها وعدم احترامها)

لآخر كلمة وانتا ترجع تقول لي بيروقراطية ودكتاتوريه وكيميائية. وما اعرف ليش انتا مصر على انو الموضوع دكتاتورية وتسلط. وملفات علاقي. وعلبه سردين يكتموا الزوجين بعضهم فيها
لا محد قال كدا. ومحد يختار يعيش بالطريقه دي الا الناس المصابة بعاهات نفسيه.

اذا كان التشاور عندك يعني مفاقشة وانو احد الطرفين يمسح قرار التاني ويكتم ع نفس التاني ويسجن حريتو، فهادا المعنى عندك انتا لوحدك، ومو شرط يكون هوا الصح حتى لو انتا شايف انو صح الصح.
الي انا بقولو التشارك والتشاور اللي يكونو قمة التقارب العاطفي والاسري واللي منو تكون القرارات الزوجية الناجحه واللي بيه نطبق كلام ربنا (وامرهم شورى بينهم).
انا اقصد التشارك والتشاور الي يكونو برغبة كامله من الطرفين. او واحد فيهم ع الاقل
وبما انك ما تحب دا النوع من المشاركات في اخد القرارات ولا تتعامل بيه فهادي حريتك الشخصية
وربي يوفقك ف اسلوب الحياة الي انتا اخترتو لنفسك ولزوجتك.