وعليكم السلام ورحمة الله وبركاته

أختي أنا نفسج كنت حاطة مشكلتي من قبل .. وعن أختي الحقودة الله يهديها..

هي من يوم وأنا صغيرة تحقد علي وتغار مني بشكل فظيع ..عيونها علي بكل شي بدراستي بشكل بالخطاطيب..
تبا تكون أحسن وحدة بالبيت ودايما تحاول اطلع عيبي بشكل غير مباشر ..

المهم مشاكل ومواقفي معاها كثيرة..

الحينة بدت معاملتي تتغير معاها ..
بديت معاها بمبدأ التطنيش..أي حركة أو أي كلام تقولي اياه ..أخلي عمر ما سمعتها وأطنشها ..أو أبتسم ..

بتشوفينها زادت غيظ..
وبتشوفج أكبر من جيه..

وتعرفين أنا اكتشفت الشي اللي يخليها تحب تنرفزني ..وأكيد أختج مثلها..

هي تعرف إنج تتنرفزين لما توجه لج الكلام واتحطين بخاطرج وتصيحين..
يعني باختصار تعرف نقطة ضعفج ..فتستغل نقطة ضعفج وتحب تشوفج حزينة ومكسورة الخاطر..

الصراحة أنا ما ابين لأحد نقطة ضعفي أو ليش زعلانة ..عشانهم لا اراديا بتشوفينهم على طول يذكرونج وينرفزونج..

حاولي أبدا ما تتضايقين جدام أحد ..وخليج فرفوشة ..وإذا قالت لج بتعنسين ومن هالكلام ..
قولي لها يزاج الله ألف خير وايي منج أكثر..

وقولي لها كل شي بيد الله ..وخليج كوول وطبيعية ..

ولا تعطينها ويه وايد ..وحاولي تتجنبينها اذا حسيتيها تبا تسوي مشاكل ..

ما عليه أختي أنا وااايد عانيت ولين الحينة أعاني ..
بس لما أتذكر قصة يوسف عليه الصلاة والسلام وأقراها في القرآن ..أحس براحة عجيبة ..
وأقول سبحان الله كيف وصل سيدنايوسف عليه الصلاة والسلام وكيف تغيرت أحواله واستوى أحسن من أخوانه..

يمكن ابتلاء من رب العالمين..

عيشي حياتج ولا تخلين شي تافه يكدر عيشتج ..

ترى باجر ان شاء الله بتعرسين وبتروحين بيت زوجج ..

الحمدالله أنا الحينة أحسن من قبل وااايد وصارت ما تهمني ..
واقري على عمرج واقري المحصنات..

والله يسعدني ويسعدج حبيبتي..وأي تطورات خبيريني.. أوكيك..