بسم الله الرحمن الرحيم..

الصراحة.. حاولت اني انام.. او بالاحرى اتهرب بالنوم..
تعبت من الكبت.. وما احب اشكي لاحد,, غير لنفسي و لربي.. لكن يمكن بديت اشوف نفسي احتاج لنصيحة تهدي بالي و روعي...

انا معقود قراتي من حوالي 3 شهور.. ومن ذيج الفترة وانا اعيش في صراع مع نفسي ليل نهار.. الحمد لله زوجي انسان طيب وخلوق و يعرف ربه.. واهم ما في الموضوع انه محافظ على صلاته.. بار بوالديه.. انسان يعترف بخطأه اذا اخطأ وغيرها من الصفات الطيبة و لله الحمد..

خطبتنا تمت عن طريق الاهل.. ومن اول يوه في الملجة سألته عن هدفه الاساسي من الزواج.. وكانت الاجابة انه يحصل على زوجة تعينه على طاعة الله وتساعده على الالتزام..

طيب راح تسالون وين المشكلة..
ما ادري يمكن اني ابالغ بعض الشي.. لكن فعلا الشي هذا امضايقني.. زوجي.. ابدا ما باح بمشاعره لي.. لا بزين ولا بشين.. طلبت منه الشي هذا كذا مرة لكنه يرد علي و يقول ان الرجل بالفعل لا بالكلام.. دخلت معاه في حوار حاولت افهمه ان المرأة تحتاج للكلمة الطيبة اكثر من اي شي ثاني.. لكن من دون فايده.. الصراحة.. والله اني ما احس اني مالجة ابدا ولا احس اني اعيش اي جو من الرومانسية.. اللي كنت احلم بها دوم مع شريك حياتي.. حتى زياراته مو ذاك الزود.. مرة في الاسبوع لانه ايقول انه هو ما يحب ايثقل على اهلي بكثرة الزيارات.. وما انكر انه وقت الزيارة فعلا يكون معي انسان ثاني.. ومو انه جاي بس لمجرد الجنس.. بالعكس يبدأ يتكلم و يتكلم عن الشغل و الحياة و كل شي.. واحاول بقدر المستطاع اني ما اثير اي شي يضتيقه خاصة يوم ايون معاي علشان ما يكره الزيارة ولا يتملل..

المكالمات اللس اسمع عنها في اخر الليل ما اشوف منها شي.. مع اني اتمناها.. على الرغم من انه يكلمني في اليوم على الاقل 3 مرات الا انها كله كلام عادي عن الشغل وعن المكان اللي هو رايح له الحين..

اليوم انا جالسة وحدي في البيت كلمته انه يجيني.. لكنه رد علي وقال اليوم لا لان مزاجي امعكر.. اعرف انه رايح عند ربعه.. وا لشي هذا يذبحني اكثر لاني احس في اغلب الاحيان انه يعتبرهم افضل مني..

و الله اني خايفه انه بعد العرس يكون نفس الشي.. ويعاملني بنفس الجفاف.. و الله اني صرت اخاف امسك يده.. او حتى احاول لمسها.. ما ادري ليش لكن اخاف..
وفي الوقت نفسه.. و الله انه هو انسان جدا عفوي و طبيعي.. ومب حقود على احد ابدا.. واذا جا يوم وزعلني.. ما تصير نص ساعة الا وهو امراضيني بكلمة اسف..
ويخبرني عن كل اللي يصير معه في اليوم..
لكني احتاج بعد انه يبين لي مشاعره اتجاهي.. احب انه يدلعني.. يناديني بحبيبتي.. .. يدلع اسمي.. ما اشوف الشي هذا ما ادري ليش؟!

و الله اني طلبت الشي هذا منه مرات و مرات.. لكن يرد علي و يقول.. انتي ليش مستعجلة.. وبعدين ما يصير الريال يدلع حرمته..وانتي شوفي افعالي مو لازم الكلام و الدلع هذا..

و الله اني متضايقة.. ادعي ربي ليل نهار.. بعد كل صلاة في الثبث الاخير من الليل انه يغرس في قلبه محبة لي.. ويجعلني قرة عين له..

وبعد ابغي النصيحة منكم..ليش انا خايفة لهذي الدرجة؟

اختي الصديقة حياك الله

ليس هناك حتى الان ما يزعج


واقول لك زيما قال لك ليش مستعجلة

انتي تبين زوج من الي نراهم في الافلام مستعجلين على كلمات الحب وترديدها زي الببغاء لا اكثر

التفاهم بين الزوجين يبنى على ثقة كاملة وحب قلبي صادق وتفاهم صريح وواضح متاني

فلا تستعحلي واستعيني با لله تعالى والدعاء وهو وحده السميع لمن دعاه والمجيب

اختي .....

مبين على خطيبك انه يحبك وميال الك كثير
ولاتنسي انتي لهالحين تعتبرين حاجه جديده بحياته

عكس ربعه اللي اكيد يعرفهم من زمان ويمكن من سنوات
انتي اختي بطريقتك تقدرين تجذبينه لك
اذا كنتو مع بعض واتكلم عن شغله اسمعيه باهتمام
واعطيه تعليقات(يعني مو بس تهزين راسش وايه ايه)
ناقشيه بموضوع حياتي حسسيه بحبك ،وحنانك وصدقيني بينسى ربعه

الرجال اكثر مايحتاجون الكلمه الطيبه والافعال الطيبه وكثييييير من الحنيه

وبعد االزواج عاد يبدا الشغل اتزينين له وغيري دايم بللباس
ووسعي ثقافتك، كوني على قولتهم امراه ججديده كل فتره
فاجئيهه الحين بهدايا ناعمه


اختي مدام انه مدين ومحافظ على فروضه كل شي سهل بعده

واحمدي الله على خطيبك شباب معظمهم هالايام مضيع صلاته
عافانا الله
تمنيياتي لك بالسعاده

اي صح نسيت
ترى فيه رجال مايتكلمون ويحبون يسوون اكثر من انهم يتكلمون
وكماااان احمدي ربك غيره بس كلاااام على فشوش
وترى الرجال ببداية ارتباطهم نوعا خجولين ويمكن ماتقاربتو مع بعض لدرجه يعرفك وتعرفيك ترى حلاة الكلمه تطلع من القلب
مو بس كلام على الهوا وهو مو قاصده
واستني عليه وبعدين ماراح يناديكي الا بحبيبتي

سلام

اختي الكريمه
زوجك باذن الله سيكون زوجا مثاليا بالمستقبل
لانه فعلا زوج عقلاني اي يستعمل عقله اكثر وقبل قلبه
وهذا النوع من الرجال لا تخافي منه ابدا تحسين بانه قاسي
وشديد ولكنه في الوقت نفسه عطوف ورحيم وطيب القلب
وتشعرين بانه غير رومانسي ليس مشكله ولكن بعد الزواج ستعجبين به اكثر
ويصبح حنونا اكثر .
بالنسبه لسهراته ولربعه اسالي من كان بها خبيرا
اذا احسنت معاملته وملئت وقت فراغه فسينسى كل هذه الجلسات والسهرات
ويصبح دائم الامساك بالسهر معك ولكن يجب ان توجدي المناخ الملائم للك وايضا عدم الضغط عليه
بمقاطعة ربعه مقاطعه نهائيه فكثيرا يحتاج بعض الازواج الخروج مع شللهم وربعهم ولكن بحدود المعقول
ومبروك سلفا
ولا تخافي فانه رجل ونعم الرجال

__________________

أختي صديقة جديدة بعض الرجال لا يبيحون بمشاعرهم ومن كلامك أنا متأكد أن الزوج يحبك كثيرا ولكن لا تستعجلي تأخذي برأي الغير ممن يقول لك بأنه لا يحبك ولكن تو الناس صدقيني راح تسمعين كلام عسل وتضحكي على نفسك عندما تفكري بهذه الفترة صدقيني ............
زوج فاهم

__________________